118
Kaem kager te nunga saongam wore ko amilmil tusan
1 Yawe amilmil tualko, mu awuk, nu ningo;
noko kua ningara mu kumik menara mena.
2 Nina Israel kariimet iwita balalko,
“Noko kua ana nangara mu kumik menara mena,” malko.
3 Se nina Aaron ko gue te priest alo butatala balalko,
“Noko kua ana nangara mu kumik menara mena,” malko.
4 Se nina kariimet Yawe ko kua kapa
lagasan, mu den koma suanta tala balalko,
“Noko kua ana nangara mu kumik menara mena,” malko.
5 Ani ikup yaman ningi baga se aga niara Yawe kote beterem,
se nu ani agiring iluwam ale aga ikup menawuram.
6 Yawe ani agarak bagoso se ani me nguangasam;
awiri ani awuk aga bitirukko? Mena.*Hebrews 13:6.
7 Nu ani agarak bagoso; nu aninga
saonga kari; se ani am amilmil ago
bagarik se kariimet ani agarak
barimawasan mu dagulamonko.
8 Nina ali kari kote me loaga se lagaralko;
bare ningo mu, Yawe te ira sanamaralko.
9 Nina ali ko kari supuling alo nongote me loaga se lagaralko;
bare ningo mu, Yawe te ira sanamaralko.
10 Sor wonong suen la aga laturman,
bare ani Yawe nup te nunga ita batutumu warem.
11 Nuna ani koma suen la te aga laturman,
bare ani Yawe nup te nunga ita batutumu warem.
12 Nuna beras iwita aga tuguman,
bare tam sikariring tairate kani namoso
iwita, nuna tairate kua namaman;
ani Yawe nup te nunga ita batutumu warem.
13 Ani aga diruwuman se pelerem ale dagulekko pingi arem,
bare Yawe aga saongam.
14 Yawe mu aninga sokel se aninga bitua;
nu aninga sangaru ta kari.
15 Kager te mariraman ko amilmil wur
kariimet ningo diram mu nunga sasal ningi barasuwoso:
“Yawe kuting te kiwem bibiya beteram!
16 Nu amilmil te ko kuting sengam mu patawuram;
nu kuting te kiwem bibiya beteram!”
17 Ani me kuerik, bare marak baga se,
Yawe kiwem beteram ewere ko balu pagikko.
18 Nu ani ikup yaman biya aisam,
bare agarkiwaram se me kua namerem.
19 Yawe ko kuwim ningo diram mu ko songkuring kagaru aisalko;
ani kasu nagurek ale amilmil tuekko.
20 Imi Yawe ko songkuring;
kariimet ningo diram wore te ningi kasu nagusan.
21 Ani nika nip patawusam,
mu awuk, ni ani agiring ikiem ale kager memek ko sokel menawurem;
ni aninga sangaru ta kari.
22 Kawam te kaola ko manga bo, kawam
kaola kari alo ari meman, bare mu manga borta aitak kawam giwoso.
23 Yawe butata beteram,
se ana arigiman mu yawarakala, se ko amilmilasan.†Mark 12:10 se 1 Peter 2:6-7 ago arikko.
24 Tom aitakta imi Yawe te mariraram;
se ana ko amilmilanak ale amilmil tunakko.
25 Yawe, nanga sangaruko!
Nanga sangaru se kager te mariranakko!
26 Marak yawara awiriya Yawe nup te taiso mu kote kaparukko!
Ana Yawe ko temple ningi baga se marak den balu ningarsan.‡Luke 19:38 ago arikko.
27 Yawe mu nu Kaem Biya;
nu ko nikim nangaram.
Buta se, nene se sanis sapa sisuwu se,
ana nangarak iru seseka se altar duap kaoralko.
28 Ni aninga Kaem, se ani amilmil kisekko;
ni aninga Kaem, se ani nika nip patawurikko.
29 Yawe amilmil tualko, mu awuk, nu ningo;
noko kua ningara mu kumik menara mena.