Pablo Tesalónica Anoafo Kirika Kenexõ Fomani
1
Pablo a afe rafeafo feta a Tesalónica anoxõ Nios Ifofaafo ato kirika kenexõ fomani
Ẽkĩa Pablo, nõ mato kirika kenexõ fomai, Silvano ikaino Timoteo ikaino nã tiito nõ mato fomai. Nã pexe rasi Tesalónica anoxõ Nios Ifofaafo nõ fomai, anoxomãi Epa Nios yafi nõko Ifo Jesucristo mã Ifokõi faafono. Epa Nios feta nõko Ifo Jesucristo mato noikĩ mato sharafanõ fekaxtetama mã isharakõinõ.
Tesalónica anoafãfe Jesús Ifokõi fakaxõ ato õimanifo
Mẽxotaima nõ matoõxõ Epa Nios aicho fakĩ nõ kĩfikĩ iskafa fafafãini. “Epa Niosi, na Tesalónica anoafãfe, mia noikakĩ mia yonoxosharamisfo, nãskakaxõ fena fenakãkima nõko Ifo Jesús manasharamisfo nokoki anã oi kiki,” ikaxõ. Nãnori pena tii ẽ mato kĩfixõfafãini. Efe yora mĩshtichi, Niospa mato fãsi noikĩ mato katoni afe yorafo mã inõ. Nõ mato Niospa meka sharaõnoa yoimis afeskax nõ afe ĩpaxatiromãki. Akka nõko mekapas nõ mato yoimisma, askatamaroko Niospa Yõshi Sharayaxõ ãfe kerex sharafoyaxõ nõ mato Jesúsnoa nã meka chanĩmakõi nõ mato yoimis. Akka mã mã tãpia nõ mato fe isharapaoni. Nõ askaino mã Jesús Ifofakõini.
Akka nõ Jesús Ifofai keskafakĩ mãri Ifofani. Nãskakẽ Niosnoa meka shara nõ mato yoiaito inimakõiyanã mã nikakõini, Niospa Yõshi Sharapamãi mato inimamakõiaino fetsafãfe mato omiskõimafiaifono. Nãskakẽ mã isharakõixõ mã ato õimakõia nã Nios Ifofaafo Macedonia anoafo yafi Acaya anoafo. Matoõxõ nõko Ifãfe meka shara nikakĩ taefanifo Macedonia anoafo feta Acaya anoxõ. Akka anoxos nikanifoma. Nã pexe fetsafo anoxori nikanifo. Nãskaxõ mã tãpiafo mã Nios Ifokõifakẽ. Nãskakẽ nõ anã matoõnoa ato yoitiroma, mãmãi matoõnoa tãpikõiafono. Askatamaroko fetsafãfe nokoõnoa ato yoimisfo iskafakãki: “Tesalónica anoafãfe nõko Ifo Nios Ifofakõinafo, nãskaxõ Pablo yafi a afe rafeafo ato sharafayanã a yoiaifo keskara ato nikakõimisfo. Nãskakaxõ afara fetsa onifakaxõ, ‘Na nõko niosra,’ ikaxõ anã kĩfimisfoma, Nioskõi Ifofakakĩ. Nãskakaxõ nã nipanaka Nioskõi yonoxomisfo. 10 Akka nã Niospa Fake Jesús mã manakõi nai mẽranoax anã oaitĩa. Akka Niospa ãfe Fake otofani. Nãato noko ifitiro a omiskõiaifo mẽranoax nõ omiskõinõma.”