1 Alaa Nii Sariɲanxin bata a fala a fixɛn na, a muxuna ndee xɛtɛma nɛn dɛnkɛlɛyaan fɔxɔ ra waxati raɲanne yi, e bira Setanaa ɲinan yanfantenne nun e xaranne fɔxɔ ra. 2 E tinma nɛn e yi mayenden wulen kawandi baane filankafuyaan xɔn, naxanye sɔndɔmɛ xɔdɔxɔ alo tɛɛ laruna. 3 Na muxu sifane tɔnna dɔxɔma futu xidi feen na nɛn e nun donseen sifana ndee, Ala naxanye da alogo dɛnkɛlɛya muxune xa e rasuxu barika birani, naxanye ɲɔndin kolon. 4 Amasɔtɔ Ala seen naxanye birin daxi, e birin fan. A mi lan muxu yo xa a mɛ ne ra, xa e birin nasuxu barika birani. 5 Amasɔtɔ Alaa falan nun en ma Ala maxandin ne rasariɲanma nɛn.

6 Xa i ngaxakedenne kawandi na feene ma, i findima nɛn Yesu Alaa Muxu Sugandixina walikɛ faɲin na, dɛnkɛlɛya falan nun xaran faɲin yi findi i balon na i biraxi naxanye fɔxɔ ra. 7 Koni xɛtɛ dina suxutare falane nun ɲaxalan fonne taline fɔxɔ ra, i yi i xaran Ala kolonna ma. 8 Fati maxɔdɔxɔn tɔnɔn na ndedi, koni Ala kolonna tɔnɔn gbo waxatin birin. Amasɔtɔ a iki nun habadan nii rakisin sɔtɔma nɛn. 9 Ɲɔndin nan falani ito ra, en birin xa la naxan na: 10 En tɔrɔma, en yi en yixɔdɔxɔ, bayo en to bata en yigin sa habadan Ala yi, adamadiine birin nakisimana, a gbengbenna dɛnkɛlɛya muxune.

11 I lan i xa yamaan yamari na feene nan ma, i yi e xaran ne ma. 12 I nama tin muxu yo yi yo i ma i ya foningeyani, koni findi misali faɲin na dɛnkɛlɛya muxune xa i fala ti kiin nun i fe raba kiini xanuntenyaan nun dɛnkɛlɛyaan nun sariɲanni. 13 I lu Alaa falan xaranɲɛ muxune xa, i kawandin ba, i xaranna ti han n fa. 14 Ala i kixi kiseen naxan yi fata nabiya falana nde ra, dɛnkɛlɛya yamaan fonne to e yiine sa i xunni, i nama i tunnaxɔlɔ na bun ma.*4.14 E e yiine sa a xunni Ala maxandini alogo e xa a ti wanla nde ra. 15 I yengi dɔxɔ feni itoe xɔn, i lu e fari alogo birin xa i sigati kiin to. 16 I yɛtɛ rakɔrɔsi, e nun i ya xaranna. I tunnafan feni itoe yi amasɔtɔ xa i na liga, i kisin sɔtɔma nɛn i yɛtɛɛn xa e nun naxanye na e tuli mati i ra.