1 Ɛ falani ito ramɛ,

ɛ tan ɲaxanla naxanye belebele

alo ɲinge turaxin naxanye Basan bɔxɔn ma.

Ɛ tan naxanye dɔxi Samari geyaan fari,

ɛ tan naxanye sɛnbɛtarene yigbɛtɛnma,

ɛ tan naxanye tima tɔrɔ muxune fari.

Ɛ a falama ɛ xɛmɛne xa, ɛ naxa,

“Ɛ fa minseene ra nxu xa, yo!”

2 Marigina Alatala bata a kɔlɔ a sariɲanni, a naxa,

“A mato, kiti lɔxɔn fama ɛ xa.

E fama ɛ suxudeni wure kɔnkɔrɔnxin nan na,

e yi ɛ tan nun ɛ diine xali.

3 Ɛ minima nɛn ɛ taa nabilinna yin kalaxin kui,

birin tixi a bode xanbi ra.

E ɛ xalima nɛn e yire makantanxini.”

Alatalaa falan nan na ra.

4 “Ɛ siga Betɛli yi,

ɛ sa yulubin liga na.

Ɛ siga Giligali yi,

ɛ sa yulubin fari sa.

Ɛ xa saraxan ba xɔtɔnna birin yi,

ɛ mɔn xa yaganna ba

ɲɛɛ saxan yo ɲɛɛ saxan.

5 Ɛ burun ba barika bira saraxan na

buru rate seen naxan yi.

Ɛ xa ɛ kanba ɛ ɲɛnige ma saraxane yi,

bayo na fe sifan nafan ɛ ma,

ɛ tan Isirayila kaane.”

Marigina Alatalaa falan nan na ra.

6 “N bata yi kamɛn naso ɛ taane birin yi.

Donseen yi dasa ɛ konni.

Koni hali n to na birin liga,

ɛ mi tubi n ma.”

Alatalaa falan nan na ra.

7 “Kike saxan to yi luxi xɛɛn xa xaba,

n tondi nɛn tulen nafɛ ɛ ma.

N bata a liga taana nde yi tulen sɔtɔ,

taana nde mi a sɔtɔ.

N bata a ragidi xɛɛna nde xa tulen sɔtɔ,

xɛɛna nde nama tulen sɔtɔ.

8 Muxune yi e masiga taane yi ige fendeni,

koni hali min xɔnla,

a mi ba e ra.

Hali n to na birin liga,

ɛ mi tubi n ma.”

Alatalaa falan nan na ra.

9 “N bata furen nafa ɛ sansine ma,

n bata e xara.

Tuguminne bata ɛ nakɔne kala,

e nun ɛ manpa bili nakɔne nun ɛ xɔdɛ binle

nun ɛ oliwi binle.

Hali n to na birin liga,

ɛ mi tubi n ma.”

Alatalaa falan nan na ra.

10 “N bata fitina furen nafa ɛ ma,

alo n na a liga Misiran bɔxɔn ma kii naxan yi.

N bata ɛ banxulanne faxa silanfanna ra,

han ɛ yi wasa e binbine xirin na ɛ konni.

Ɛ yaxune yi ɛ soone tongo.

Hali n to na birin liga,

ɛ mi tubi n ma.”

Alatalaa falan nan na ra.

11 “N bata ɛ ɲaxankata

alo Sodoma nun Gomora.

Ɛ luxi nɛn

alo wudi ganmatɔɔn naxan baxi tɛɛni.

Hali n to na birin liga,

ɛ mi tubi n ma.”

Alatalaa falan nan na ra.

12 “Nanara, n fama ɛ tan Isirayila kaane ɲaxankatadeni nɛn.

N na a ligama ɛ ra nɛn.

Ɛ xa ɛ yitɔn ɛ dɛntɛgɛ feen na ɛ Ala xa.”

13 Naxan geyane nun foyen daxi,

a a miriyane makɛnɛn adamane xa,

naxan subaxan findima kɔɛɛn na,

naxan sigan tima yire matexin fari,

a xili nɛn Alatala, Ala Sɛnbɛn Birin Kanna.