3
Yesu dangu Nabi Musa ra
1 Nanara, ngaxakeden muxu rasariɲanxine, Ala bata ɛ tan naxanye xili, ɛ xaxili lu Yesu a fe xɔn, Alaa Xɛraan nun Saraxarali Kuntigi Singena, en naxan ma fe falama yamani. 2 Muxu tɔgɔndiyaxin nan yi a ra Ala xa, naxan a sugandixi alo Musa yi kii naxan yi Alaa banxin birin yi.*3.2 A mato Yatɛne 12.7 kui. 3 Banxi tiina xunna kenla gbo dangu banxin yɛtɛɛn na. Nanara, Yesu a xunna kenla gbo Musaa xunna kenla xa. 4 Awa, muxune nan banxine tima, koni Ala nan seen birin daxi. 5 Musa tan tɔgɔndiya nɛn wali kɛdeni Ala xa a banxin mumɛni, a sereyaan ba lan na feene ma Ala yi fama naxanye ligadeni. 6 Koni Alaa Muxu Sugandixin tan luxi na alo Alaa Dii Xɛmɛn naxan a banxin xun na. En findixi a banxin nan na, xa en na en wɛkilɛ, en yi en ma yigin namara en naxan matɔxɔma.
Matabuna Alaa yamaan xa
7 Nayi, alo Alaa Nii Sariɲanxina a falaxi kii naxan yi, a naxa,
“Xa ɛ Ala fala xuiin mɛ to,
8 ɛ nama ɛ bɔɲɛni xɔdɔxɔ
alo ɛ yi murutɛxi Ala ma waxatin naxan yi,
ɛ yi matoon xun ti Ala ra tonbonni.
9 Ɛ benbane n bunba nɛn mɛnni, e yi n matandi,
hali e to n kɛwanle birin to ɲɛɛ tonge naanin.
10 Nayi, n xɔlɔ nɛn na waxatin muxune ma, n naxa,
‘E bɔɲɛn makuya n na waxatin birin,
e mi n ma kiraan xɔn.’
11 N yi n kɔlɔ n ma xɔlɔni, n naxa,
‘E mi soɛ n ma matabudeni mumɛ!’ ”†3.7-11 Yaburin 95.7-11
12 Ngaxakedenne, ɛ a liga ɛ yeren ma, bɔɲɛ ɲaxin nun dɛnkɛlɛyatareyaan nama lu ɛ sese yi naxan a ligɛ ɛ xɛtɛ habadan Ala fɔxɔ ra. 13 Koni ɛ bode ralimaniya lɔxɔ yo lɔxɔ, fanni en mɔn na waxatini Kitabun naxan ma fa fala “To” alogo ɛ tan nde nama tantan yulubin xɔn, ɛ tengbesenɲɛ ayi. 14 Amasɔtɔ en bata findi Alaa Muxu Sugandixin gbeene ra, xa en lu en ma tɔgɔndiyaan singeni, han a raɲanna.
15 Kitabun naxa,
“Xa ɛ Ala fala xuiin mɛ to,
ɛ nama ɛ bɔɲɛni xɔdɔxɔ
alo ɛ yi murutɛxi Ala ma waxatin naxan yi.”‡3.15 Yaburin 95.7-8
16 Awa, ndee yi ne ra, naxanye Alaa falan mɛ, e murutɛ a xili ma? Ne findixi muxune nan na Musa naxanye ramini Misiran yamanani. 17 Ala xɔlɔ ndee ma ɲɛɛ tonge naanin? Naxanye yulubin liga, e faxa tonbonni. 18 Ala a kɔlɔ ndee a fe ra, a e mi soɛ a matabu yireni? Naxanye tondi a falan suxɛ, a yi falan tima ne nan ma fe yi.§3.18 A mato Yatɛne 14.1-35 nun Yaburin 95.11 kui. 19 En bata a to nayi, fa fala e mi yi nɔɛ soɛ matabudeni lan e dɛnkɛlɛyatareyaan ma.