1 N ma diina, n ma falane suxu.

I n ma yamarine suxu.

2 N ma yamarine suxu

alogo i xa kisi.

N ma xaranne mara i bɔɲɛni

alo i yɛ kɛsɛne makantanma kii naxan yi.

3 E xidi i yiin na,

i yi e sa i bɔɲɛni.

4 Fe kolonna suxu alo i magilɛna,

xaxilimayana alo i kon kaana.

5 E i ratangama nɛn yalunde ɲaxanla ma,

e nun muxu gbɛtɛna ɲaxanla marakunfa falane.

6 Lɔxɔna nde,

n yi tixi n ma banxi foye soden na

n yi tanden matoma,

7 n foninge keden nakɔrɔsi banxulan fe kolontarene yɛ.

Xaxili mi yi na banxulanna ma.

8 A yi danguma kiraan xɔn,

dɛnaxan maso ɲaxanla nde konna kira fataden na

a yi danguma a banxin mabinni.

9 Sogen godomatɔɔn nan yi a ra,

kɔɛna a li waxatin naxan yi,

dimin yi so.

10 Ɲaxanla yi mini a ralandeni,

a maxidixi alo yalundena,

kɔtɛ ɲaxin yi a bɔɲɛni.

11 Xurutaren nan yi a ra

naxan mi yagima,

a mi luyɛ a konni mumɛ!

12 Waxatina nde, a sa kirane xɔn

waxati gbɛtɛ a sa yama malandene yi,

a dɔxi xɛmɛne yɛɛ ra kira xunne birin na.

13 A yi na banxulanna suxu,

a yi a sunbu.

A yi a fala a xa a yɛɛni yalanxin na, a naxa,

14 “N bata yi dɛ xuiin tongo

n xa bɔɲɛ xunbeli saraxan ba Ala xa.

To n bata a ba, na suben sa banxini.

15 Nanara, n bata mini i ralandeni.

N yi i tan nan fenma,

anu n bata i to!

16 N bata n ma sadeni tɔn bitingan faɲine ra,

Misiran yamanan taa dugine.

17 N bata mirihi latikɔnɔnna sa a ma,

e nun wudi ige xiri ɲaxumɛn

nun sinamon wudi ige xiri ɲaxumɛna.

18 Fa be, en fa kafu han xɔtɔnni,

en lu marafanna ɲaxunni!

19 N ma xɛmɛn mi banxini,

a bata siga yire makuyeni sigatini.

20 A bata a gbeti saseen xali,

a rafexi,

a mi fama fɔ kiken na kɔxɔ.”

21 A to fatan falan tiyɛ,

a yi a mabandun,

a yi a rakunfa

a fala ɲaxumɛne xɔn.

22 Sanɲa ma kedenni,

a yi bira a fɔxɔ ra

alo ɲingen naxan sigama a kɔɛ raxabadeni,

alo daxun naxan xidima

alogo a xa xuru,

23 han xalimakunla yi a bɔɲɛn sɔxɔn,

alo xɔliin naxan so luti ratixin na,

a mi a kolon a niin nan bama.

24 Nanara, n ma diine,

ɛ tuli mati,

ɛ n ma fala xuine fe liga ɛ yeren ma.

25 Ɛ bɔɲɛn nama mayenden

ɛ bira na ɲaxalan sifan fɔxɔ ra,

ɛ lɔ ayi a kirane xɔn.

26 A bata muxu wuyaxi rabira.

A bata xɛmɛn yatɛn naxanye faxa,

ne nun gali sɛnbɛmaan xasabin lan.

27 A banxin findixi gaburun kira yisoxin nan na

siga laxira yi.