2
1 Ɛ malan, ɛ bode to,
ɛ tan yama yagitarena,
2 benun waxati saxin xa a li,
benun lɔxɔni ito xa dangu
alo se dagin foyeni,
benun Alatalaa xɔlɔ gbeen xa ɛ li,
benun Alatalaa xɔlɔ lɔxɔn xa fa ɛ ma.
3 Ɛ Alatala fen,
ɛ tan yamanan muxu xuruxine,
ɛ tan naxanye a sariya kɛndɛn ligama.
Ɛ tinxinyaan fen,
ɛ lu yɛtɛ magodoni.
Waxatina nde, ɛ tangama nɛn
Alatalaa xɔlɔ lɔxɔn ma.
Gbalona siyane xa
4 Gasa taan nabeɲinma nɛn,
Asikalɔn taan halagima nɛn,
Asadodi kaane yi kedi yanyin na,
Ekirɔn yi raxɔri.
5 Gbalon na muxune xa,
naxanye dɔxi fɔxɔ igen dɛ
siyaan naxanye sa kelixi Kereti yamanani.
Ɛ tan Kanan kaane,
ɛ tan Filisitine,
Alatala falan tima ɛ xili ma,
a naxa, “N na ɛ raxɔrima nɛn,
muxu yo mi luyɛ ɛ yi.”
6 Fɔxɔ igen dɛxɔnne findima nɛn
xuruse rabadene nun kula yirene ra xuruse kantanne xa.
7 Mɛnne findima nɛn Yuda muxu dɔnxɛne gbeen na.*2.7muxu dɔnxɛne: Yuda kaane fama suxudeni yɛngɛni nɛn. Muxun naxanye luma e nii ra yɛngɛn ɲan xanbini, ne nan ma fe falaxi be.
E yi e xuruseene raba na.
Ɲinbanna ra,
e sa e sa Asikalɔn kaane banxine kui.
Bayo, Alatala, e Ala,
e malima nɛn,
Ala yi e muxune raxɛtɛ e ma
naxanye yi suxi yɛngɛni.
8 N bata Moyaba konbi ti xuine mɛ
e nun Amonine n ma yamaan magelema kii naxan yi,
e yi e yamanan danne fari sa,
ba Isirayila bɔxɔn na.
9 Alatala Sɛnbɛn Birin Kanna falan ni ito ra,
Isirayilaa Ala naxa,
“N tan habadan Ala,
n bata n kɔlɔ n yɛtɛni,
Moyaba yamanan luma nɛn
alo Sodoma taana,
Amoni yamanan yi lu
alo Gomora taana,
sɛxɛ ɲaxine dɛnaxan yi,
fɔxɔn gema dɛnaxan yi,
dɛnaxan halagixi han habadan.
N ma yamaan muxu dɔnxɛne yi ne yii seene tongo.
N ma muxun naxanye na lu,
ne yi e bɔxɔn tongo.”
10 Na fena e sɔtɔma e wason saranna nan na,
bayo e bata Alatala Sɛnbɛn Birin Kanna yamaan konbi
e yi keli e xili ma.
11 Alatala ɲaxuma ayi nɛn e ra,
bayo a e gbee alane birin naxɔrima nɛn yamanani.
Hali yire makuyene yi,
siyane birin a batuma nɛn e konne yi.
12 Ɛ tan Kusi kaane,†2.12Kusi: Yamanan naxan Misiran faxa ra Nila baan dɛ. Fati fɔrɛ yamanan nan yi a ra.
n na ɛ fan yɛngɛma nɛn,
n yi ɛ faxa.
13 A kelima nɛn sogeteden kɔmɛnna binna yamanan xili ma,
a yi Asiriya raxɔri.
A yi Niniwa taan halagi,
a na findi tonbonna ra.
14 Xuruseene yi na findi e kuruden na,
e nun suben sifan birin.
Singbinne nun sagalene yi xi a sɛnbɛtɛn longonne nun kondene yi.
Sɔnxɔ xuiin minima nɛn foye soden na, a naxa,
“Taan bata kala fefe fɔlɔ so dɛɛn ma,
bayo suman xalanbene birin bata mini kɛnɛnni.”
15 Taa faɲi makantanxini ito mato,
naxan yi a falama, a naxa,
“Ba n tan na, gbɛtɛ mi na!”
Taani ito kalaxi di,
a findi subene birin konna ra?
Naxan yo na dangu a dɛxɔn,
na kanna kolinma a ma nɛn,
a yiin ti a ma, a kabɛ.