BABYOR NI
NAHUM
Murung’agen e Re Ke Babyor Ney
Fare Babyor ni Nahum e ba’ riy e thin rok Nahum ni profet ni be weliy murung’agen yu Nineveh ni waer ko mael ni gonap’an 650 e duw u m’on ndawori yib Kristus. Nineveh e fare binaw nib ga’ u Assyria, ma yu Assyria e ke n’uw nap’an ni i par ni to’ogor rok yu Israel. Nineveh ni waer ko mael e nnang ni gechig rok Got ngak yu Assyria, ni ba nam nib kireb e girdi’ riy ma ba tolangan’rad.
Gathon e Re Ke Babyor Ney
Gechig ni yib nga Nineveh 1:1–15
Mul ni tay yu Nineveh 2:1—3:19
1
Irera’ e thin ni murung’agen yu Nineveh, ni ragon e n’en ni pilyeg e changar rok Nahum nge guy, ni be’ nu Elkosh.
Damumuw rok SOMOL ngak yu Nineveh
I SOMOL ni Got e dabiyag ni nge k’adan’ ko pi’in yad ma tagenging ngak;
ma gechignag e pi’in yad ma togopluw ngak.
Ma sulweg taban ngorad u fithik’ e damumuw rok.
I SOMOL e ba sowath nma damumuw,
machane ir e ba gel gelngin
ma der ma pag e pi’in kireb ndabi gechig nagrad.
 
Yungin ma yan SOMOL riy e ma sum yungi yoko riy;
pi manileng e aram e fiyath ni be tar u rifrifen ay.
I yog e n’en ni nge rin’ e day me mlik’ langgin!
Me mlik’nag yu pa’ i lul.
Yung i flang nu Bashan e go’ fengfeng daken,
me mroray daken e Burey ni Karmel,
me m’ay ra’en e floras nu Lebanon.
Pi burey e durru’ u p’eowchen SOMOL;
me ranran e yochi burey u p’eowchen.
Fayleng e rur u nap’an ni m’ug SOMOL;
fayleng nge girdi’ riy e ra t’on gad.
Nap’an e ra damumuw, me mini’ e rayag ni fas?
Mini e rayag ni fas u gelngin e damumuw rok?
I pu’og e damumuw rok ni be daramram;
me pilpil e war nge par ni bod e fiyath u p’eowchen.
 
I SOMOL e rib manigil;
ma yoror ko girdi’ rok u ngal’an e gafgow;
ma ayweg e pi’in nra pigichelgad ngar sapgad ngak.
Ni bod rogon e lul’ ni sugbur nib tomgin me thang mit e pi to’ogor rok;
me pag e pi’in yad ma togopluw ngak ngarm’ad.
Mang e ga be makathnag nib togopluw ngak SOMOL?
Bayi thangem.
Dariy be’ nra togopluw ngak nib yo’or ko ta’ab yay.
10 Bod yu pa’ i rachangal nike ololoboch ko pan nike mlik’
gimed e pi ta chingaw’ e bay ni urfiymed!
 
11 Nineveh, uwur e yib be’ riy nib sug ko sasalap, ni i makath nib togopluw ngak SOMOL. 12 Irera’ e n’en ni yog SOMOL ngak e girdi’ rok ni piyu Israel: “Yug aram rogon nu Assyria e yad ba yargal ma yad ba yo’or, ma yira thirifrad u but’ ngar m’aygad. Girdi’ rog, gu pagmed ngam gafgowgad, machane dabkug rin’ bayay.” 13 Ma chiney e bay gu taleg gelngin yu Assyria u dakenmed mug th’ab e pi chen nikan michgiymed ngay.
14 Irera’ e n’en ni duwgiliy SOMOL u murung’agen yu Assyria: “Dabi yib owcharad ni nge ululiy ngachalrad iyan. Bay gu kirebnag e pi liyos ni bay u lan e Tempel ko pi got rorad. Gu be fal’eg rogon ba low ko yam’ ni fan ngak yu Assyria — dariy rogon ni ngkur pired ni yad bfos!
15 Mu changar, ke yib bmal’og u daken e pi burey nike fek e thin ni bfel’! Ke yib ni nge weliy murung’agen e gapas! Gimed e girdi’ nu Judah, mmadnom niged e pi madnom romed ngam pi’ed ngak Got e n’en ni mu og niged ngak. Pi to’ogor e dakriy bi’id ni ku yad ra cham u lan tafenmed bayay. Ya yad gubin ni kan thang owcharad. Isa 52:7

1:15 Isa 52:7