Tagnaˈ sulat si Paul si meˈ aˈa Tessalonikahin
Pahāti sabab tagnaˈ sulat si Paul si meˈ aˈa Tessalonikahin
Niyaˈ dambuwaˈ puweblo laˈi si lahat Makedoniya inēnan Tessalonika. Puweblo miyaˈan gaˈi du tala teˈed amban puweblo Pilipi. Palumengngan si Paul kaminduwenen hap pī si meˈ kalahatan magusihat sabab Almasihin, padeheng iye duk meˈ saweˈnen si Tessalonika magusihat si meˈ aˈa malaˈihin. Saweˈ si Paulin si Silas duk Timoteo. Gaˈi du tiggel pagusihatden laˈi, saguwaˈ ekka meˈ aˈahin kahagad ne pu si Isa Almasi. Saguwaˈ niyaˈ meˈ pagkaside Yahudi nguntarahan siye duk kinawul weˈ de meˈ aˈa si lahat miyaˈan nguntarahan siye isab. Hangkan tahalaˈ disi Paul duk ujud tekka siye si puweblo Korinto. Suse si Paul sabab meˈ masandel pu si Isa malaˈi si Tessalonikahin kaw lebbahande sandelden bang siye bininasa weˈ meˈ manguntarahan siyehin. Hangkan dinaˈak weˈ si Paul si Timoteo hap pī si Tessalonika mayaman siye.
Pagbalik si Timoteo inakahan weˈ ne si Paul bang saˈingge siye. Sābu laˈi si Paul si Korinto, sinulatan weˈ ne meˈ aˈa Tessalonikahin. Magsukul iye si Tuhan peggeˈ teteg du siye pu si Isa Almasi duk inasig isab weˈ ne ateyden. Dinaˈak weˈ ne pinapagen sandelde pu si Isa Almasihin bisan siye dem kabinasahan. Duk sinambungan isab weˈ ne meˈ tinilewde sabab pabalik Almasihin.
1
1 Sulat inin amban aku, si Paul, duk meˈ saweˈkun si Silas duk Timoteo. Pasampay kami inin piyu si puweblo Tessalonika si kaˈam kēmon meˈ sukuˈ si Samate bi Tuhanin duk si Panuhutanten bi Isa Almasi. Karayaw weˈ luwal kaˈam ipat Tuhanin duk karayaw luwal sanyang dem ateybin.
Magsukul disi Paul sabab meˈ aˈa Tessalonikahin
2 Luwal kami magsukul si Tuhan sabab kaˈam kēmon duk luwal kaˈam subahat kami kahabaˈ kami ngampun-ngampun si Tuhan. 3 Sābu kami ngampun-ngampun si Samate bi Tuhanin, luwal teˈed taˈesseb kami meˈ kahāpan luwal hininangbin sabab sandelbi pu si Isa Almasi, Panuhutanten bi. Gaˈi isab takayipat kami pagluˈugbin hawal lasabi si iyehin duk pagtuyuˈbin peggeˈ ase-asebi teˈed weˈ pitu balik Panuhutanten bi. 4 Meˈ kapungtinaˈihanku, kinalasahan kaˈam weˈ Tuhanin duk kataˈuhan kami weˈ tapeneˈne kaˈam, 5 peggeˈ aka-aka hāp inusihat kami si kaˈamin dumaˈin bissā manusiyaˈ hadja saguwaˈ amban balakat Niyawa Tuhanin, duk kataˈuhan kami weˈ asal bennal teˈed bissā kamihin. Takite isab kawul-piˈil kamihin paluˈu kami si kaˈamin. Kēmon hinangan kamihin para si kahāpanbi. 6 Binatukan weˈ bi kawul-piˈil kamihin duk kawul-piˈil Panuhutanten bi. Bisan du kaˈam bininasa peggeˈ tuhutbi lapal Tuhanin, saguwaˈ kēgan pe teˈed kaˈam peggeˈ pinakēg kaˈam weˈ Niyawa Tuhanin. 7 Duk kuweˈitu binatukan isab kaˈam weˈ meˈ masandel pu si Isa si lahat Makedoniya duk Akayahin. 8 Duk aka-aka hāp bakas inakabi sabab Panuhutanin bawag si lahat Makedoniya duk Akaya. Duk dumaˈin hadja inin saguwaˈ aka-aka sabab sandelbi si Tuhanin takale isab si kēmon kalahatan. Gaˈi ne kami subey magaka sabab sandelbin. 9 Siye ne mangakahin. Magaka siye bang saˈingge panayimaˈbi kamihin papiyu kami si kaˈamin. Magaka isab siye weˈ tinayikutan ne weˈ bi meˈ tuhan-tuhanbin, duk kuweˈitu iye ne tinuhutbin Tuhan maˈellum duk mabennalin. 10 Magaka isab siye weˈ luwal inagad-agad weˈ bi katekka Anak Tuhan amban surgaˈin, si Isa bakas pinakellum Tuhan amban kamateynen. Duk si Isa inin, iye manimbul kitehin bi amban mulkaˈ Tuhan sōng pinatekka si meˈ aˈahin.