'Fluba tɛdɛ nɛn Pɔl -a crɛn -tɛ
Korɛnti
'nɔn lɛ
1
'An 'bɔ Pɔl bɛ, Bali 'bɔ 'ci 'sɔ 'a nɛn yaan laabʋ 'nan 'an drɛ Zozi Crizi -le 'pasiazan -a. Mɛɛn 'fluba 'gʋɛ -a crɛn -tɛ 'kʋ 'vale -kaa "bʋɩ Zozizan Sostɛn -a. Kʋa crɛn -tɛ Bali -le -leglizi nɛn Korɛnti fla bɛ -a -ji 'nɔn lɛ. Bali ciɩla Zozi Crizi -va, ɛn e 'ka drɛ 'saun 'e 'lɛ 'nan -e 'ka 'kɔn 'yee minnun -a. Bali 'ka laabʋ 'nan -e 'ka 'kɔn 'yee minnun -a 'ka 'vale minnun nɛn o ya fɛ -tʋdʋ pɛɛnɔn 'nan te o -kaa san Zozi Crizi trʋ "baa bɛ waa.
-Kaa "tɩ Bali 'lee Minsan Zozi Crizi 'o 'wee "yi 'lee 'wee -fʋdɩ -trɔɔ -nɔn 'cɛɛ.
Pɔl Bali muo "fɔ 'wɩ nɛn Bali -a drɛ Korɛnti 'nɔn lɛ bɛ -a man
An Bali muo -fɔa "tʋ pɛɛnɔn man "yi "nɛn Bali ciɩla Zozi Crizi -va yaa drɛ 'cɛɛ bɛ -a man. 'Wɩ 'kpa nɛn, Bali ciɩla Zozi Crizi -va ɛn e "yi 'tɔ 'tʋdʋ pɛɛnɔn drɛ 'cɛɛ. -Yee "wɛan nɛn minnun a 'ka yei ɛn o Bali -le 'wɩ "paaman 'ka 'ji. Ɛn Bali -le 'wɩ tɩglɩ bɛ waa -ci maan 'kpa tɩglɩ. 'Ka "trɔɛn "tɔ 'wɩ nɛn Crizi -a drɛ ɛn waa 'vɩ 'cɛɛ bɛ -yrɛ, ɛn ka ya 'ka 'tɔdɩ "da 'plɛblɛ. -Yee "wɛan 'bɛ nɛn 'gʋɛ, Bali -le "yi "tʋ 'ka 'e 'klɩdɩ 'ka man dɩ. Ɛn ka ya -a man -pɛnnan 'nan -kaa san Zozi Crizi 'e 'ta pee wʋ. Bali -tɔa 'ka 'wlu, 'dʋ -e 'ka 'pɛ 'e vɩlɛ 'e plʋ dɩ -trilii -e tʋ zɩɛ 'e bɔ. Bali -a dra zɩɛ 'nan -e tʋ nɛn -kaa san Zozi Crizi -taa "man "bɛ 'tɔ 'tʋ 'e vɩlɛ 'e 'kɔn 'e 'padɩ 'ka man dɩ. Bali 'ka laabʋ 'nan -e 'ka 'vale -a -pɩ Zozi Crizi nɛn -kaa san -a bɛ waa, 'ka yei 'e 'kɔn 'e 'sɛndɩ 'e cin va. Bali zɩɛ -te e 'wɩ 'vɩ bɛ, yaa dra.
Pɔl 'wɩ pla Korɛnti Zozinɔn lɛ o cɛɛn 'e cin man -le "wɛan
10 'An "bʋɩ Zozinɔn, -kaa san Zozi Crizi 'tɔ da an 'ka trʋ "baa 'nan, 'ka yei 'e 'kɔn 'e 'sɛndɩ 'e cin va. Te 'cɛndɩ 'e cin man 'e 'kɔn 'ka yei "fo "dɩ! 'Pian 'ka 'ci wɩ 'e 'kɔn -tʋwli, ɛn 'ka 'wulo -ji "nrɔn 'wɩ 'tʋwli "da. 11 'An "bʋɩ Zozinɔn, fɛ -le "wɛan nɛn an 'wɩ zɩɛ -a 'vɩ bɛ, Kloe mangulinun -a 'sinan 'pa 'mɛn 'nan 'wɩ 'fɔla 'ka yei. 12 'Wɩ nɛn maan 'nan 'an ve bɛ -nyrɛn 'gʋ, maan 'man 'nan 'ka 'va min -mienun -a ve 'nan 'o ya Pɔl -srunɔn 'a, ɛn min -mienun -a ve 'nan 'o ya Apolo -srunɔn 'a, ɛn min -mienun -a ve 'nan 'o ya Piɛri -srunɔn 'a, ɛn min -mienun -a ve 'nan 'wɛɛ cɩ Crizi -srunɔn 'a.
13 E ya "le 'an 'wɩ 'tʋ laabʋ 'ka 'lɔ. -Tɩɛ 'vɩ 'cɛɛ 'nan, Crizi a 'e 'cɛndɩ 'e cin man? Ɛn maan laabo "nyian 'ka 'lɔ 'nan: «'An 'bɔ Pɔl nɛn, minnun -a pɛin yiba "plan da 'cee 'wɩ 'wlidɩ "le "wɛan?» -Cɛjɛ. Ɛn "nyian bɛ: «'An 'tɔ da nɛn o 'ka -batize drɛ?» -Cɛjɛ. 14 An Bali muo -fɔa 'nan, ma'an min -tʋ -batize drɛlɛ 'ka 'va dɩ, -te yaa 'silɛa Cripu 'lee Gai -a dɩɛ. 15 E drɛ "yi ɛn 'wɩ zɩɛ e drɛ. 'Bɛ 'le vɛ bɛ ka'a 'kɔlaman -e 'ka vɩ 'nan 'an 'tɔ da nɛn o 'ka -batize drɛ dɩ. 16 -A -cin -trɔa 'an 'ji "nyian 'nan, an Sefana -batize drɛ 'o 'vale 'e 'mangulinun -a. -Te an min pee -batize drɛ "nyian bɛ, -a -cin 'ka 'an 'ji "fo "dɩ. 17 Kɔɔ Crizi 'ka 'an 'palɛ -sia 'nan 'an 'ta minnun -batize drɛ dɩ. 'Pian yaan 'pa 'sia 'nan 'an 'ta 'yee 'wɩ 'nɔnnɔn vɩ minnun lɛ. Ɛn 'wɩ zɩɛ blamin -le 'wɩ 'tɔdɩ -dandan "cɛɛ maan "sia -e 'an vɩ minnun lɛ dɩ. Maan dra zɩɛ 'nan -e Crizi -le -ka nɛn yaa 'wʋ yiba "plan da bɛ, -yee 'plɛblɛ 'lɛ 'e 'fʋ "man.
Bali -le 'wɩ 'tɔdɩ -dan "mlian blamin -le 'wɩ 'tɔdɩ da
18 Crizi -le -ka nɛn yaa 'wʋ yiba "plan da bɛ, minnun nɛn o ya 'o 'sidɩ Bali man -kɔɔbli bɛ, waa -nan wɩ maan klin "tɛ wɩ -a. 'Pian -kaa nɛn Bali -taa -kaa 'silɛ 'wɩ 'ji bɛ, -kaa -ci maan 'nan Bali -le 'plɛblɛ nɛn. 19 'Wɩ 'kpa nɛn, kɔɔ 'wɩ nɛn 'e 'crɛn -tɛdɩ Bali -le 'fluba 'ji bɛ -nyrɛn 'gʋ. E ya 'e 'crɛn -tɛdɩ 'nan:
«An -taa "blamin -le 'wɩ 'tɔdɩ klu 'sʋlɛ.
Ɛn an -taa -yee ci "nrɔndɩ -nan -nyanlɛ.»
20 -Mɛ "wɩ nɛn 'wɩ 'tɔzan -kɔlaman -a vɩdɩ -a "nyian? Ɛn -mɛ "wɩ nɛn 'fluba 'ci vɩzan -kɔlaman -a vɩdɩ -a "nyian? Min nɛn e 'wɩ man -wɛɛman bɛ, -mɛ "wɩ nɛn e -kɔlaman -a vɩdɩ -a "nyian? Wa'a 'kɔlaman 'wɩ 'tʋ vɩdɩ -a "fo "dɩ. Kɔɔ Bali blamin -le 'wɩ 'tɔdɩ ta 'bɔla 'nan -yɛɛ cɩ klin "tɛ wɩ -a. 21 Fɛ -le "wɛan nɛn an 'wɩ zɩɛ -a 'vɩ bɛ, -yɛɛ cɩ 'nan blamin 'ka 'kɔlaman -e 'e Bali -tɔ 'yee 'wɩ 'tɔdɩ -a dɩ. Bali 'bɔ 'bɛ 'wɩ zɩɛ -a drɛ 'yee 'wɩ 'tɔdɩ -a. Yaa 'yɩ "yi 'nan, min nɛn e yi -tɛra 'wɩ nɛn kʋa ve 'cɛɛ bɛ -a da bɛ 'e "sia 'wɩ 'ji. 'Wɩ zɩɛ te kʋ ya -a vɩnan 'cɛɛ bɛ, minnun -a maan "le klin "tɛ wɩ -zʋ.
22 Zuif 'nɔn a "va 'nan -cɛ "srɔn wɩnun nɛn "o -nan ye. Ɛn Grɛk 'nɔn a 'wɩ 'tɔ wɩnun -wɛɛnan. 23 'Pian -cee vɛ bɛ, Crizi nɛn waa -tɛ yiba "plan da bɛ, -yee 'wɩ nɛn -kaa ve minnun lɛ. 'Wɩ zɩɛ e "naan Zuif 'nɔn man, ɛn minnun nɛn o 'ka Zuif 'nɔn 'a dɩɛ, "o maan "le klin "tɛ wɩ -le 'wɩ 'zʋ. 24 'Pian minnun nɛn Bali o laabʋ 'nan -e 'e o 'si 'wɩ 'ji bɛ, -te o ya Zuif 'nɔn 'a oo, ɛn -te o 'ka Zuif 'nɔn 'a dɩ oo, waa -tɔa 'nan Crizi a Bali -le 'plɛblɛ 'a, ɛn e ya Bali -le 'wɩ 'tɔdɩ -a. 25 'Wɩ nɛn Bali -a drɛ zɩɛ minnun -a "siala "le klin "tɛ wɩ -le 'wɩ 'zʋ. -Wee tin 'ka 'nɔnnɔn "fo "dɩ, kɔɔ Bali -le 'wɩ 'tɔdɩ "mlian blamin -le vɛ da -kɔɔbli. Ɛn "nyian bɛ, 'wɩ 'bɔ zɩɛ -a drɛdɩ bɛ, blamin -a "siala 'nan Bali 'ka 'plɛblɛ dɩ. -Wee tin 'ka 'nɔnnɔn "fo "dɩ, kɔɔ Bali -le 'plɛblɛ "mlian blamin -le vɛ da -kɔɔbli.
26 'An "bʋɩ Zozinɔn, 'wɩ nɛn maan 'nan 'an ve bɛ, e ya "le 'ka 'fli -nanjɛn -e 'ka -tɔ 'ka 'bɔ 'a. Kaa nɛn Bali 'ka laabʋ 'labɛ, minnun nɛn blamin o "siala 'wɩ 'tɔnɔn 'a bɛ, o 'ka 'ka yei "bʋʋ "dɩ. Ɛn min tanɔn 'ka 'ka yei "bʋʋ "dɩ. Ɛn min -dandan nun 'ka 'ka yei "bʋʋ "dɩ. 27 'Pian minnun nɛn blamin o "siala -blʋnɔn 'a bɛ, o 'bɔ nɛn Bali o 'si "va. Yaa drɛ zɩɛ 'nan -e minnun nɛn 'wɩ 'tɔnɔn 'a bɛ, 'yra 'e o -tɛ. Ɛn "nyian bɛ, minnun nɛn blamin 'ka o "siala fɛ -tʋ -a dɩɛ, o 'bɔ nɛn Bali o 'si "va. Yaa drɛ zɩɛ 'nan -e minnun nɛn min tanɔn 'a bɛ, 'yra 'e o -tɛ. 28 Ɛn "nyian bɛ, minnun nɛn o 'ka min -dandannun -a dɩɛ, ɛn blamin yiɛ 'ka 'naan o man dɩɛ, o 'bɔ nɛn Bali o 'si "va. Minnun nɛn o 'ka fɛ -tʋ -a dɩɛ o nɛn. Bali -a drɛ zɩɛ 'nan -e minnun nɛn blamin o "siala fɛ -tʋ -a bɛ, o -nan wɩ 'e vɩlɛ 'e 'kɔn dɩ. 29 E ya zɩɛ 'nan -e 'trɛda blamin -tʋ 'e vɩlɛ 'e -dandan 'tan Bali 'lɛ dɩ.
30 -A -tʋwli "nɛn 'cee vɛ -a. Bali 'bɔ 'bɛ 'ka drɛ Zozi Crizi -le vɛ -a. Zozi Crizi zɩɛ, 'wɩ 'tɔdɩ nɛn e 'si Bali va bɛ -nyrɛn, ɛn -yɛɛ drɛ -cee vɛ -a. Kɔɔ Crizi 'bɔ 'le "wɛan nɛn Bali -kaa 'sia min tɩglɩ 'a, ɛn e -kaa 'si "va 'yee vɛ -a "fo, ɛn e -kaa 'si 'wɩ 'wlidɩ "le nɔanba -ji. 31 Bali -a drɛ zɩɛ 'nan -e 'wɩ nɛn 'e 'crɛn -tɛdɩ Bali -le 'fluba 'ji bɛ, -kaa ta wɩ drɛ. E ya 'e 'crɛn -tɛdɩ 'nan:
«-Te min a "va 'nan
'e -dandan "taan Bali 'lɛ bɛ,
'wɩ nɛn Minsan -a drɛ -yrɛ "bɛ -a 'bɔ 'e vɩ!»