Te Guijtz Nani Biääd Loj Rebeṉ Hebree
1
Agunii Xi'n Dios xtidx Xtadni
Neṉ redxe galoo garen-garen mood guninäj Dios retoxtadgoldoonu. Xhidajlza huält guniini por reniguii ni bacuaa xtiidxni. Neṉ redxejre aguniini loonu por Xi'nni, lojzani badeed Dios yäḻrnibee guncheeni guedxliujre, badeedzani guira'ti lojni. Laani najc xtuxh xten xcäḻrdimbicha' Dios, laani najczani sigajc najc Dios, laazani rapchee guira'ti con xtiidxni ni rnibee. Cheni gulujx basiani xtojḻnu, gurejni xladbee Gueb Dios xhaguibaa te canibeeni.
Sacduxhru Xi'n Dios loj rexangl Dios
Ro'c gurej Xi'n Dios sa'csi sajcruni loj reangl xten Dios, sa'csi acua'ni yäḻrnibee si'c te bejṉ ni riannäj xhixten Xtadni. Lajzani sajcru lo relaj rexangl Dios. Sa'csi Dios di niäjb loj nicla tej rexanglni:
Luj najclu Xi'nä. Narä guleälu te guinibeelu.
Dizani niäjb xcuent nicla tej rexanglni:
Narä gacä xtadni, laani gacni xi'nä.
Niluxh che biädnäni Xi'n xtebni lo guedxliuj, guniini:
Guiraa rexangl xten Dios, ¡Coḻgaṉ Xi'nä!
Che gunii Dios xcuent rexanglni räjpni:
Rujnni ruxhuṉ rexanglni si'c bej, rujnni rbebajl rexmosni.
Niluxh xcuent Xi'nni guniini:
Luj najc Dios.
Nabajṉlu par tejpas;
xcäḻrnibeelu par tejpas najc te yäḻrnibesa'c.
Ahuinälajzlu xhigabsa'c, dipaclu nichaglajz xhigabguijdx,
ni'cni Dios ni najc Xtioslu, baniidxru yäḻrbalajz lojlu quela loj resa'lu.
10 Rniizani:
Luj, Dad, che guslojli bencheelu guira'ti,
bencheelu cad soob guedxliuj, ṉaazalu bencheelu reguibaa.
11 Laareni sinitlojreni, niluxh luj nabajṉlu par tejpas.
Guiraareni siujx si'c riujx te lajd.
12 Suse'tlureni si'c rie't te la' lajd, sidxaareni si'c rdxaa te lajd.
Niluxh luj dilu guidxaa.
Laḻgajctis nabajṉlu, di rexijzlu ted.
13 ¿Gucxha räjp Dios lo te xanglni scree, ä? Räjpni:
Gurej xladbeä te guinibeelu dxejli cheni gudzugä guiraa ni rdxe'ch lojlu ladz ni'lu.
14 Guiraa rexangl Dios najc sprit, ruxhaḻ Diosreni te chayacnäjreni rebejṉ ni xca' yäḻnabajṉ par tejpas.