GUITS NE GLO PXEEḺ PABL LO
TIMOTÉ
1
¡Diuzh Timoté!
Naa nac Pabl, tib zha ne pxeeḻ Jesús nonee Xtiidz Ndzon me lo miech. Ible Dios meṉ ne psilaa ne lo doḻ, ni Jesús meṉ ne rnalo ne, me bnabey quiayuṉ naa dziin rii.
Laa naa rxeḻ guits rii lo luu, rzaac naa luu zig tib xpëëd naa ne squi dib zdoo luu rliladz luu Jesús. Dios meṉ ne nac Pxoz ne, ni Jesús meṉ ndzon ne rnabey ne, me yquia zdoo luu, me tsoxco grë zhizhgab luu zeeṉa peet tsienied guic luu. Miṉ co racladz naa, ni miṉ co rnab naa lo Dios.
Zigne psoque naa diidz lo luu leṉ dze ne laa naa za nëz xtan zha Macedon ga, laa luu biaaṉ Efés i; scagaa niina laaw rneque naa lo luu stib: Sca no luu i, bnee lo bla zha ne squi no i, cseetraade zho miech grë zhiwseed zho, sac ncuaaṉe paat rquiinda. Bnee lo zho, csaan zho grë cuent gox qui, zhale noyuṉnroobraa gooṉ dieṉ zharaa, peraa beeṉ grë xmeṉgol ne. Ncuaaṉe paat rquiind ga, loxaque ruṉctiḻdiidza miech; mazd lo lal ne nodiḻdiidz zho, tsoxco zho cseed zho miech gaṉle pe nactaa grë guieḻnzaac ne rgaa grë zha ne rquiabladz dib zdoo rliladz Jesús.
Laa naa rso diidz rii lo luu, sac racladz naa guiaaṉmbe zdoo grëse miech qui, guiaaṉmbe xquieḻrien zho ni dib zdoo zho gliladz zho Dios; zeeṉa scagaa grieelo gleynie zho samiech zho. Sac goṉ, no bla zha ne quiasaanle Xtiidz Ndzon Jesús miṉe nac diidzli, leḻ lo grë cuent ncuaaṉe paat rquiind co no zho. Racladz zho zha cseed miech zha nac xley Dios, ni niicle zha rieṉd zha naca; zeeṉe rseed zho miech ni zha rieṉdaque dieṉ pe rnee zho.
Ndioṉle ne gaṉle nli wen ley ne psaṉ Dios, per teḻ niaca miṉe yquiin miecha zigne psaṉ me yquiina. 9-10 Goḻguieṉ gaṉle, biaaṉd ley par gnabeya grë miech ne nole xnëz Dios, sinque laaw biaaṉ par gnabeya grë:
zha ne racndaan lo Dios,
zha ne rond xtiidz Dios,
zha ntseeb,
zha ngoopdoḻ,
zha ne rzacdraa ne meṉ nroob nac Dios,
zha ne rguitnie lë Dios,
zha ne rut pxoz,
zha ne rut xniaa,
zha ne rut samiech,
zha ne rionie zha ne led tsieeld,
zha ne nac mrazh,
zha ne rban samiech rieto zho zho stib nëz,
zha ne rquidie,
zha ne rzeet lë Dios par gliladz miech xtiidz zho, ni naṉpaa zho led diidzlid rnee zho.
Par grë zha rii nagoṉ biaaṉ ley; grë zha ne mband zigne nac Xtiidz Ndzon Dios; 11 wseed ne rlu gaṉle zha laa miech lo doḻ. Ni lëë wseed co goṉ pso Dios naa none naa lo miech.
Pquia zdoo Dios Pabl
12 Rded naa xquizh lo Jesús meṉ ndzon ne rnabey ne, porne bzooblo me naa guṉ naa xtsiiṉ me, ni noyacnieṉ me naa ne laaw quiayuṉ naa. 13 Ne nligaa rded naa xquizh lo me, sac glo ntseeb goc naa, bneenë naa me, ptsidiḻ naa grë zha ne no xnëz me, ntseeb goc naa lo zho. Ni niicle ne scataa nac grë ncuaaṉe beṉ naa, per pquia zdoo me naa; sac leṉ dze co gard gliladz naa cho nac Jesús, lega lo xquieḻnxen naa ga sca beṉ naa.
14 ¡Pa lotaa pquia zdoo Dios naa! Ga blu me gaṉle zha noxcotaa me naa, pxobnia me guic naa bliladz naa cho nac Jesús, ni zig nac niina dib zdoo naa rleynie naa me. 15 Miṉe rne naa nu niina, diidzliw, ni racladz naa grëse miech gliladz zho gaṉle, ible laa Jesús biaad lo guidzliu, biaadsilaa me grëse miech lo xtoḻ zho; ni naapaa goṉ goc tib zha ne mazdraa ngoopdoḻ. 16 Gacxe waa pquia zdoo Dios naa, niicle ne scataa miech ngoopdoḻ naa per psilaa Jesús naa. Ga blu gaṉle pa lotaa paciens ne rap me; ni ga gwi grëraa miech gaṉle, zha ne gliladz me, zgaa zho tib guieḻmban ne gdziṉd dze lozh. 17 ¡Tibaque sca goḻgotsaa dziuuṉnon ne me, goḻgotsaa gnee ne grë diidz ndzon lo me, zigtaa niinaw zigtagaa leṉ grëraa izdoo ne ziaada! Sac goṉ, me nac meṉ nroob ne rnabey, meṉ ne gdziṉd dze ne nitlo. Sca rieguiaḻa.
18 Timoté, xin, laa naa rso diidz lo luu goṉ: Tibaque dziits bzo, ib guiaaṉd zdoo luu; psoladz gaṉle scaque nac diidz ne bnee grë zha bets ne zeeṉe psiaab Dios guic zho bzeet zho pe nac grë miṉe pso Dios luu guṉ luu. 19 Bieṉ tibaque dib zdoo luu bliladz Jesús, ib guṉd luu ncuaaṉe naṉ luu ndzinlid, zeeṉa iṉe mbe xquieḻrien luu; sac goṉ no zha ne niicle rieṉpaa zho pa miṉ nac ncuaaṉe ndzinlid, ni laa zho ruṉa. ¡Miṉcocxe waa, grë zha ne sca nac, rsaanga zho miṉe bliladz zho! 20 Zig nac Himené grop Lejandr, sca beeṉ zho; per laa zho bzonëzle naa sca tsie zho xnëz meṉdox teḻne sca racladz zho; zeeṉa guieṉ zho gaṉle nodne gneenë zho Dios.