DÍDZAꞌDAUꞌ BURÓP BUZUJËꞌ LU GUICH SAN JUAN
1
Núnbëꞌruꞌ le nac gdutë li len yöl‑laꞌ nadxíꞌi
Nedaꞌ, bönniꞌ gul run chiꞌa bunách queëꞌ Cristo, rugapaꞌ liꞌ Dios, ngul rö queëꞌ Dios, tsazxö́n len yúguꞌtë zxiꞌnuꞌ. Nadxiꞌidaꞌ lbiꞌiliꞌ le núnbëꞌruꞌ le nac gdutë li, len clëg nedaꞌz, san lëzcaꞌ taꞌdxíꞌi lbiꞌiliꞌ yúguꞌtë nup chnúnbëꞌgac le nac gdutë li. Nadxiꞌituꞌ lbiꞌiliꞌ le núnbëꞌruꞌ le nac gdutë li, le zóalentecz rëꞌu. Rnabaꞌ lahuëꞌ Dios Xuz len Xanruꞌ Jesucristo, Zxiꞌnczëꞌ Dios, uzáꞌ ladxëꞌë queëliꞌ, len huechiꞌ ladxëꞌë lbiꞌiliꞌ, len gunëꞌ ga soa dxi icj ládxiꞌdauꞌliꞌ le núnbëꞌliꞌ le nac gdutë li len nadxiꞌiliꞌ lzaꞌliꞌ.
Budzíjitsquidaꞌ catiꞌ byöndaꞌ tunbiꞌ zxiꞌnuꞌ ca nac le nac gdutë li, le tunbiꞌ ca naꞌ gna béꞌinëꞌ rëꞌu Dios Xuz. Naꞌa, rátaꞌyuaꞌ lauꞌ, nguldauꞌ, gunuꞌ ca rna bëꞌ zxba queëꞌ. Cutu ruzujaꞌ quiuꞌ lu guich tu zxba cub. Ruzujaꞌ laꞌ leyz lë naꞌ gna béꞌinëꞌ rëꞌu dza niꞌtë, gnëꞌ ral‑laꞌ gdxiꞌiruꞌ lzaꞌruꞌ. Cni nac bëꞌ nadxíꞌiruꞌ‑nëꞌ Dios. Nac cni chquiꞌ runruꞌ ca rna le gna béꞌinëꞌ rëꞌu. Lë naꞌ gna béꞌinëꞌ rëꞌu nac quië gdxiꞌiruꞌ lzaꞌruꞌ ca naꞌ chbyö́niliꞌ dza niꞌtë.
Nup tëꞌni laꞌzíꞌ yeꞌi rëꞌu
Lë ni rguíxjöiꞌdaꞌ lbiꞌiliꞌ, le chtaꞌdá yödzlyú ni zian nup taꞌzíꞌ yëꞌ, nup naꞌ cutaꞌzíꞌ lu naꞌgac ca bidëꞌ Jesucristo, guquëꞌ gdu bunách. Nu naꞌ run cni, nac nu rziꞌ yëꞌ len nu rdáꞌbagaꞌ Cristo. Gul‑gún chiꞌi cuinliꞌ cui unitliꞌ le nadél‑liꞌliꞌ le benliꞌ xchinëꞌ Cristo, san gul‑güíꞌ ládxiꞌliꞌ gdél‑liꞌliꞌ gdutë le ral‑laꞌ siꞌliꞌ lu nëꞌë Dios.
Nútiꞌtëz nu rguel‑laꞌ nöz yubl len rucáꞌn xtidzëꞌë Cristo, cutu zóalenëꞌ nu naꞌ Dios. Nu daꞌtecz xtidzëꞌë Cristo, zóalenëꞌ nu naꞌ Dios Xuz lencaꞌ Zxiꞌnëꞌ. 10 Chquiꞌ nútiꞌtëz nu zaꞌ ga zoaliꞌ, len rusëdi zxba yubl, cutu ulë́biliꞌ lidxliꞌ nu naꞌ, len cutu guiëliꞌ lei: “Gyuꞌu len netuꞌ.” 11 Nu rë lei: “Gyuꞌu len netuꞌ”, run tsazxö́n lei ca nac le cunác run nu naꞌ.
Runëꞌ löz Juan gdxinëꞌ ga nacuꞌë böchiꞌ lzëꞌë
12 Zal‑laꞌ le zian ral‑laꞌ uzujaꞌ queëliꞌ lu guich, cutu rëꞌndaꞌ uzujaꞌ yúguꞌtë lu guich. Runaꞌ löz guidaꞌ ga zoaliꞌ, atiꞌ güiꞌruꞌ didzaꞌ yalj lulu, quië gac udzíjiruꞌ gdu ládxiꞌruꞌ.
13 Tuꞌgapbiꞌ Dios liꞌ zxiꞌnnu ngul zxiluꞌ, ngul rö queëꞌ Dios. Caꞌ gac.