Kitsy nii pkëë San Juan
1
Lëë xaa nii nak xtiits Dios biid lo kislyu
Klo worñee karty kwe kislyu kwyo tublan tiits kexka lo Dios aan lëë tiits ko nak Dios. Lo Dios kwyo tiits ko. Lëë tiits ko psaa kchë kchësy cos. Ni tu cos nii no kwyaady sin tiits ko. Lëë tiits ko nak kyalmbañ aan lëë kyalmbañ go nak bini nii xsaani lo meñ. Lëë bini go xsaani lo nguey aan kchilody nguey ksuuyo.
Lëë Dios pxaal tu xaa nii pcholë Juan biid këb lo meñ nii lëë xaa nii nak bini kiid parñee tsiñee kiid xaa kniladzy meñ xtiits xaa. Lëdy Juan nak bini, sink lëë xaa biid këb lo meñ nii lëë bini kiid. Tsigore biid bini nii nli xsaani lo meñ lo kislyu.
10 Lëë xaa nii nak bini go biid lo kislyu, aan nikxe nii lëë xaa psaa kislyu, byuumbeydy meñ xaa. 11 Biid xaa lo meñ xkyedzy xaa, per psaldy meñ xkyedzy xaa xaa. 12 Lëë xaa ptee tiits nii kchë meñ nii bniladzy xtiits xaa kak xiñ Dios. 13 Ni nli gaa nii xiñ Dios nak meñ go, per nakty meñ go xiñ Dios porñee koly meñ go sinak chaly xiñ chol meñ, sink lëë meñ go nak xiñ Dios porñee singo kwlaño styoo Dios.
14 Lëë xaa nii nak tiits ko biid lo kislyu aan lëë xaa kwyo lady no. Pkëstyoo xaa kchësy meñ ni bluuy xaa tiitsli, ni ptyon gaa noo kyalwnabey nii ptee Tat Tios lo xaa. Mëëd tusy nak xaa lo Tat Tios. 15 Lëë xaa nii nak tiits ko pseety Juan tsiñee chëb Juan:
—Mastre non tu xaa nii kiid tsiñee lëën kpi, por nol xaa worñee lëën koly.
16 Kchësy lo no xneetsy xaa kchë nii chap xaa ni xitsy xkwaa gaa kyalnsaak nii xneetsy xaa lo no. 17 Lëë Moisés biidni xley Dios, per lëë Jesucrist biidni kyalwkëstyoo ni tiitsli. 18 Ni tu cho karty kan Dios, xaktyee xiñ xaa nii tugak no lo xaa. Lëë xaa bluuy Dios lo no.
Lëë Juan Bautist xñee cho nak Jesucrist
(Mt. 3:11‑12; Mr. 1:7‑8; Lc. 3:15‑17)
19 Lëë meñ Israel nii no Jerusalén pxaal pxosy ni meñ levita nii chuñ yudar pxosy kunabtiits cho nak Juan. 20 Aan lëë Juan chëb:
—Kaazhkaa lëdy naa nak Crist.
21 Tsigo lëë xaa go kwnabtiits stub chëb:
—¿Cho nakoo tsigo busy? ¿Pe lii nak profet Elías?
Lëë Juan chëb:
—Lëdyo, lëdy naaw.
Loxsye ngo lëë xaa kwnabtiits stub chëb xaa:
—¿Lii tsigo busy nak profet nii no kiid?
Lëë Juan kwëb chëb:
—Lëdyo.
22 Tsigo lëë xaa go chëb stub:
—¿Cho nakoo busy? Por no nii kyo knii noo tiits lo xaa nii pxaal lëë noo. Kwnë dyon cho nakoo.
23 Lëë Juan chëb:
—Naa nak tsiy xaa nii xñee lo meñ tañ: “Kol kwii tu nëz tubli tedy xaa nii xñabey.” Singo kwnee profet Isaías.
24 Tsigo lëë bla xaa nii pxaal meñ fariseo chëb lo Juan:
25 —Deelñee lëdy lii tsigo busy nak Crist ni lëdy lii nak Elías ni lëdy lii nak profet, ¿penak nii xchoobnisoo?
26 Tsigo lëë Juan chëb:
—Nli naa xchoobnis con nis, per lady to no tu xaa nii xyuumbeydy to. 27 Lëë xaa kiid tsiñee lëën kpi. Xaa non xaa ni parñee kxakaa tuu kidy lab xaa xkiiñdyaa.
28 Betania nii nche kexka chu kiigwpee Jordán no kchoobnis Juan worñee kunee kchë xaa go lo Juan.
Lëë Jesús nak xaa nii xtsily xtol meñ
29 Lëë byaani lyu lëë Jesús kwey lo Juan aan tsiñee lëë Juan kon xaa, lëë Juan chëb:
—Kol kuy gaanoo, lëë xpëkwxiily Dios nii ktsily kchë xtol meñ sëëd ske. 30 Lëë xaa psetyaa worñee niyaa nii nare kiid tu xaa nii mastre non lon, por nol xaa worñee kolyaa. 31 Nikle nandyaa cho nak xaa, per lëën syely kchoobnis parñee kyuumbey meñ Israel xaa.
32 Lëë gak Juan chëb:
—Konaa byety Kyalbini Ntson kpaa sinak tu palom aan lëë Kyalbini Ntson byab lady xaa. 33 Nandyaa cho nak xaa, per lëë xaa nii pxaal naa syely kchoobnisaa con nis në lon: “Xaa nii kanoo kyab Kyalbini Ntson lady, xaa go kchoobnis meñ con Kyalbini Ntson.” 34 Lëë xaa konlaa ni lëën xñeli gaa nii lëë xaa nak Xiñ Dios.
Mëëdscuel nii klootyee kwle Jesús
35 Lëë byaani stu lyu lëë Juan nche misme gak lugar go ksa chop xpëëdscuel. 36 Tsiñee lëë Juan kon nii lëë Jesús sitedy siko, lëë Juan chëb:
—Kol kuy gaanoo, lëë xpëkwxiily Dios si ske.
37 Tsiñee lëë chop xpëëdscuel Juan biñ ngo, lëë xaa sinal Jesús. 38 Tsi lëë Jesús kon nii lëë xaa sinal, lëë Jesús chëb:
—¿Pe cos chakladzy to?
Tsigo lëë xaa chëb:
—Maestre, ¿pa nak liidzyoo?
39 Lëë Jesús kwëb chëb:
—Kol të gaanoo kuy do paw.
Tsigo lëë xaa kwey laañee no Jesús aan lëë xaa ptseñ lo Jesús porñee tsel siik las cuatro nak worñee pchoonal xaa Jesús.
40 Betsy Simoñ Pedre nii lë Ndresy nak xpëëdscuel Juan nii pchoonal Jesús. 41 Lëë Ndresy kukyub Simoñ aan lëë xaa chëb lo xaa:
—Lëë noo ptyon Mesías, xaa nii këmbëës no kiid. Lëë xaa nak Crist.
42 Loxsye ngo lëë Ndresy kuni Simoñ lo Jesús aan tsiñee lëë Jesús kon xaa, lëë Jesús chëb:
—Lii nak Simoñ. Xiñ Jonás nakoo, per lëël kcholë Cefas. (Tiits ko nak sinak nii xñee no Pedre.)
Lëë Jesús xkwetsy Felip ni Natanael
43 Lëë byaani stu lyu lëë Jesús kwlokyeñ tsi xtañ meñ Galilea. Lëë xaa ptsyool Felip aan lëë xaa chëb:
—Tënal naa.
44 Betsaida lë xkyedzy Felip. Xaa kyedzy ko gak nak Ndresy ni Pedre. 45 Loxsye ngo lëë Felip kukyub Natanael aan lëë xaa chëb:
—Lëë noo ptyon xaa nii tant xseety Moisés leñ libre nii kë ley ni lëë gaa xaa nak xaa nii tant pseety kchë profet. Lëë xaa nak Jesús Nazaret. José nak pxosy xaa.
46 Lëë Natanael chëb:
—¿Schilo nawen kchoo tu xaa buen leñ kyedzy Nazaret?
Tsigo lëë Felip chëb:
—Të gaanoo kuyoo.
47 Tsiñee lëë Jesús kon nii lëë Natanael mer ktsiñ lo xaa lëë xaa chëb:
—Lëë tu xaa nii nli nak xaa Israel sëëd ske. Ni tu kyalwkëti nody leñ styoo xaa.
48 Lëë Natanael kwnabtiits chëb:
—¿Xa xyuumbeyoo naa?
Lëë Jesús chëb:
—Antes nii ngwetsy Felip lii, konaa soboo xan yag yegw.
49 Tsigo lëë Natanael chëb:
—Maestre, lii nak Xiñ Dios. Lii nak xrey meñ Israel.
50 Lëë Jesús chëb:
—¿Pe xniladzyoo xtitsaa nayak xaktyee porñee niyaa nii lëën kon lii xan yag yegw? Nare kanoo cos nii mastre kuuñ ksee styool.
51 Ni chëb Jesús:
—Nli xñen nii lëë do kan kyaly kpaa ni lëë do kan nii lëë xangly Dios kyëp kyety lady mguiy nii pxaal Dios.