1 Wnná Jesusen':

—Bi gek zédlele. Le chejḻé' che Dios, na' le chejḻé' chia' neda'. 2 Latje zan zej den liž X̱a'. Chela' bi naken ki, neda' ba gožkza' ḻe'e. Cha'a neda' na'a, chejkweza' latje chele gan chejsoale. 3 Cha' chejkweza' latje chele gan chejsoale, na' yeḻá'a da' yoble, nich yechi'a ḻe'e latje chian', nich gan chejsóa' neda', ḻezka' ḻe'e chejsoale ga na'. 4 Nnézkzelele gan cha'a, na' ḻezka' nónbia'le nez.

5 Mas gože' Ḻe':

—X̱an, bi nnezlto' gan chejo'. ¿Nakx̱kze gak gónbia'to' nezen'?

6 Bechebe Jesusen', na' gože' ḻe':

—Neda' nakkza' nez ḻi, na' naka' da' nak dot da' li, na' naka' Benne' zej nbanḻen benách ka'. Ni'a chia' nedza' gak ḻa' no benne' gan zoa X̱ažo Dios. 7 Chela' nónbia'le neda', ḻezka' nónbia'le X̱an'. Na'a, nónbia'le-ne' na' ba bḻé'elele-ne'.

8 Naž Lip gože' Ḻe':

—X̱an, bḻoe'el neto' X̱on', ná'teze.

9 Bechebe Jesusen', na' gože' ḻe':

—Lip, scha ba goken zóaḻena' ḻe'e. ¿Bi nónbi'o neda'? No benne' ẕḻe'ele' neda', ḻezka' ẕḻe'ele' X̱an'. ¿Na'a nno': “Bḻoe'el neto' X̱on'”? 10 ¿Bi žejḻi'o zóaḻenkza' X̱a', na' X̱an' zóaḻenkze' neda'? Da' ki da' ẕcháḻjḻena' ḻe'e, kege žakze chia' ẕchaḻjan', san X̱a' zóaḻenkze' neda', na' Ḻekze' žone' žin ki. 11 Le chejḻé' chia', zóaḻenkza' X̱a', na' X̱an' zóaḻenkze' neda'. Cha' bi gak gonle ki, le chejḻé' chia' neda' ni'a che žin da' žona'. 12 Da' li žapa' ḻe'e: da' ka' žona' neda', ḻezka' gon bennen' žejḻi'e chia' neda', na' da' ẕenže ka' gone' dan' yeyá'a gan zoa X̱ažo Dios. 13 Yógo'te da' nnáblele X̱ažo Dios, na' wkónlele žin la' neda', neda' gona' dan' nnable, nich wḻoe'ela' ḻaw neda', Ẕi'n Dios, yeḻa' baní' ẕen che X̱ažo Dios. 14 Bíte'teze dan' nnable, na' wkónlele žin la' neda', neda' gonan'.

15 Ḻezka' wnná Jesusen':

—Cha' nží'ilele neda', le gon da' žapa' ḻe'e, 16 na' neda' gáta'yoela' X̱ažo Dios, na' Ḻe' seḻe'e Benne' yoble, Benne' gákḻene' ḻe'e, Benne' gon choche' ḻe'e, na' sóaḻenteze' ḻe'e. Bennen' nake' Dios Be' La'y, Benne' ẕnnakze' da' li. 17 Benách ka' nníta'gake' yežlyó nga bi gak si' ḻo ná'gake' Ḻe', dan' bi gak ḻé'egekle' Ḻe', na' bi gak gónbia'gake' Ḻe', san zóaḻenkze' ḻe'e, na' soe' ḻo yichj ḻáẕdo'le. 18 Bi wka'na' ḻe'e ka x̱kwide' wzéb ka'. Yeḻá'a, na' yedjsóaḻena' ḻe'e. 19 Yetó chí'ido'ze, na' benách ka' nníta'gake' yežlyó nga biž ḻé'egekle' neda', san ḻe'e yeḻé'elele neda'. Dan' zoakza' nbana' neda', ḻezka' ḻe'e, to chi'ize soale nbanle. 20 Ža na' katen' Dios Be' La'y na' yedjsóaḻene' ḻe'e, nnézkzelele zóaḻenkza' X̱ažo Dios, na' ḻe'e zóaḻenle neda', na' neda' zóaḻenkza' ḻe'e. 21 Nóte'teze benne' ẕzi' ḻo ne'e x̱tiža'a, na' žone' kan ẕnnan, nak bia' nži'ile' neda'. X̱ažo Dios ži'ile' bennen' nži'ile' neda', na' neda' ži'ila' bennen', na' wḻoé'e ḻawa' ḻawe' ḻe'.

22 Judas gože' Ḻe', (kege Judas Iskariote), na' wnné':

—X̱an, ¿nakx̱kze gak wḻoé'e ḻawo' ḻawto' neto', na' bi wḻoé'e ḻawo' ḻawgak benách ka' nníta'gake' yežlyó nga?

23 Bechebe Jesusen', na' gože' ḻe':

—Nóte'teze benne' nži'ile' neda' gone' kan ẕnna x̱tiža'a, na' X̱ažo Dios ži'ile' ḻe', na' yedjsóaḻento' ḻe' ḻo yichj ḻáẕda'we'. 24 Nóte'teze benne' bi nži'ile' neda' bi žone' kan ẕnna x̱tiža'a. Da' bénlele, da' bchaḻja' neda', kege chia' nedzan', san naken che X̱ažo Dios, Bennen' bseḻe'e neda'.

25 ’Žapkza' ḻe'e da' ki kate' ne zóaḻena' ḻe'e, 26 san Dios Be' La'y, Bennen' seḻa' X̱ažo Dios chele, gákḻene' ḻe'e, na' gon choche' ḻe'e dan' wkónlele žin la' neda'. Wsedle' ḻe'e yógo'te, na' wsé'e ḻáže'le kan nak yógo'te da' ba goža' ḻe'e.

27 ’Wka'na' da' wká'n ži yichj ḻáẕdo'le. Dan' wká'n ži yichj ḻáẕdo'le da' gonna' chele, bi naken ka da' ẕnéẕjwgak benách ka' nníta'gake' yežlyó nga. Bi gek zédlele, na' bi žébele. 28 Ba bénlele da' ba goža' ḻe'e, wnnía': yeyá'a, na' yeḻá'a, na' yedjsóaḻena' ḻe'e. Chela' nží'ilele neda', na' yebélele katen' goža' ḻe'e yeyá'a gan zoa X̱ažo Dios, dan' nakže blo X̱ažo Dios ka naka' neda'. 29 Na'a, ba goža' ḻe'e zga'ale kate' gaken, nich kate' gaken ki, chejḻe'le chia' neda'.

30-31 ’Biž wcháḻjḻena' ḻe'e da' zan, dan' za' da' x̱iwe', dan' ẕnna bian' benách ka' nníta'gake' yežlyó nga. Ḻa'kze bi de ḻo nan' bi da' gonen chia' neda', ki žaḻa' gaken nich nnézgekle benách ka' nníta'gake' yežlyó nga nži'ila' X̱ažo Dios, na' žona' kan ba gože' neda' gona'. Le so ža', na' le cho'o.