1 X̱ana' Dios, ẕcháḻjḻena' Le' dot ḻaža'a.

2 Žx̱en ḻaža'a Le', Dios chia'.

Bi go'o latje yedoe'ela'.

Bi go'o latje benne' ka' bi ẕḻé'egekle' neda' chawe' wžía yí'gake' neda'.

3 Bi chíx̱gekle benne' ka' žx̱en ḻáže'gake' Le',

san yedoé'egekle benne' ka' ẕží'igake' che x̱tižo'o.

4 X̱ana' Dios, bḻoe'el neda' da' žak ḻažo'o gona'.

Bche' neda' gan žénelo' cha'a.

5 Bsedle neda' gona' da' naken dot da' li chio'.

Dan' nako' Dios, na' žesló' neda', wx̱én ḻáže'teza' Le'.

6 Bejsá' ḻaže', X̱ana' Dios, gako' ži'i ḻaže',

na' yeyache' ḻáže'lo' neda', kan žónteze žono'.

7 Bi chejsá' ḻažo'o doḻa' da' bena' kate' ne naka' benne' kwide', na' kan bži'a che x̱tižo'o.

Ḻo yeḻa' žeyache' ḻaže' chio', na' yeḻa' ži'i ḻaže' bejsá' ḻaže' neda', X̱ana' Dios.

8 Chawe', na' ḻi ḻaže' nak X̱anžo Dios.

Che ḻen wsedle' benne' doḻa' ka' da' žaḻa' góngake'.

9 Wḻoe'ele' benne' gax̱jw ḻaže' ka' da' naken chawe'

na' wsedle' benne' ẕen ḻaže' ka' da' góngake'.

10 Ḻo yeḻa' žeyache' ḻaže', na' ḻo da' li,

ẕche' X̱anžon' benne' ka' žóngake' kan ẕnna x̱tiže'e

dan' bénḻene' žo'o, na' ka nak da' žsedle' Ḻe'.

11 Dan' žono' ka nak da' ba wnnó', X̱ana' Dios,

yenít ḻawo' chia' doḻa' da' bena', da' naken ẕen.

12 ¿Zoa no benne' ẕžebe' Le', X̱anto' Dios?

Le' wsedlo' bennen' da' žaḻa' gone'.

13 Gak chie' to yeḻa' ba nez ẕen,

na' ẕa'sóe' ka' gata' chégakbe' yežlyó.

14 X̱anžo Dios nake' toze ḻen benne' ka' ẕžébegake' Ḻe',

na' gone' ga gónbia'gake' x̱tiže'e dan' bénḻene' žo'o.

15 Wx̱én ḻáže'teza' X̱anžo Dios

dan' beslé' neda' ḻo na'gak benne' ka' žénegekle' wžía yí'gake' neda'.

16 Bwia neda', na' beyache' ḻaže'l neda'

dan' zoa' toza', na' ẕzáka'ḻi'a.

17 Nyanḻe'e da' zede da' zej yo'on yichj ḻáẕda'wa'.

Beslá neda' ḻo da' zede da' ẕzaka'a.

18 Bwia ka ẕzáka'ḻi'a, na' ka žónḻi'a žin,

na' benít ḻaw che yógo'te doḻa' da' nbaga'a.

19 Bwia ka nyanḻe'e benne' ka' ẕžá'agake' neda',

na' kan ẕbia ḻáže'gake' neda'.

20 Bwia be' da' nakkza', na' beslá neda'.

Bi go'o latje yedoe'ela' dan' žx̱en ḻaža'a Le'.

21 Da' chawe', na' yeḻa' ḻi ḻaže', žon chóchgaken neda' dan' žx̱en ḻaža'a Le'.

22 X̱ana' Dios, beslá benne' Israel ka' ḻo yógo'te da' ẕzáka'ḻe'egake'.