30
1 X̱ana' Dios, bechiso' neda', na' ẕka'n ẕena' Le'.
Bi bi'o latje benne' ka' bi ẕḻé'egekle' neda' chawe' gon dítjgekle' neda'.
2 X̱ana' Dios, bḻiža' Le', na' beyono' neda'.
3 X̱ana' Dios, besló' neda' ḻo yi' gabíl.
Beyono' neda' nich bi choa'a yežw ba.
4 Le goḻ che X̱anžon', ḻe'e nakle benne' chekze' Ḻe'.
Le ye' Ḻe' “žóx̱keno'”, na' bejsá' ḻaže' nake' la'y.
5 To chí'ido'ze ẕže'e, san to chi'ize zoa yeḻa' ži'i ḻaže' chie'.
Kwéžežo to yelze, san zildo' yebéḻe'elžo.
6 Kate' wzóa' chawe' wnnía': bi be gak chia' neda'.
7 Ki wnnía' dan' bzoa chocho' neda', X̱ana' Dios, ka to ḻaw ya'a ẕen, na' ben chawo'o neda',
san kate' bkache' ḻawo' Le', na' wžé' zedla'.
8 X̱ana' Dios, wḻiža' Le', na' gáta'yoela' Le'.
9 ¿Biẕkze yeḻa' ba nez gaken chio' cha' gata' neda', na' choa'a yežw ba?
¿Wká'n ẕena' Le' kate' ba naka' bix̱te yo?
¿Wak wzenla' no benne' da' naken dot da' li chio'?
10 Bze nag chia', X̱ana' Dios, na' beyache' ḻaže'l neda'.
X̱ana' Dios, gokḻen neda'.
11 Beno' ga beyák yeḻa' ẕbeže chia' yeḻa' žia'a.
Bkwaso' yeḻa' nyache' ḻaže' chia', na' beno' ga bebéḻe'ela'.
12 Che ḻen goḻkza' chio'.
Nakkzo' Le' yeḻa' ba nez chia', na' bi soakza' žize.
X̱ana' Dios, wká'n ẕenkza' Le' to chi'ize.