62
1 Toze ḻen Dios ẕga'n chawe' be' da' nakkza'.
Ḻekze' žeslé' neda'.
2 Toze' Ḻe' žape chi'e neda', na' žeslé' neda'.
Nake' Bennen' žox̱e' neda', na' bi chejchegwa'.
3 ¿To chi'ize wkwezle da' gonle chia' neda', yógo'tele žon byenle wžía yi'le neda'?
Žonle ka žon to benne' ẕchinnje' to ze'e da' zoa bix̱en, o to ḻe'je da' nožon'.
4 Žonle toze diža' kan yebejle neda' ḻo yeḻa' ẕen chia'.
Nží'ilele da' wen ḻaže'.
Ḻen žoá'ale ẕchaḻjle cháwe'do'
san yo'o yichj ḻáẕdo'le da' ẕinnj da' gonle.
5 Le', be' da' nakkza', wléz ḻaže' toze Dios.
Nake' Ḻe' Bennen' žx̱en ḻaža'a.
6 Toze' Ḻe' žape chi'e neda', na' žeslé' neda'.
Nake' Bennen' žox̱e' neda', na' bi yedó ḻaža'a.
7 Nak Dios Bennen' žeslé' neda', na' nake' yeḻa' ba nez chia'.
Nak Dios Bennen' žape chi'e neda', na' Benne' žon choche' neda'.
8 Le kwez ḻaže' Ḻe' to chi'ize, ḻe'e, benne' ka'.
Bḻoe'el Ḻe' da' ẕdan ḻáže'le.
Nak Dios Bennen' žon choche' žo'o.
9 Da' ḻi, da' dáche'ze zej nak benne' ka',
na' ka to da' wen ḻaže' zej nak benne' ẕen ka'.
Bi náḻe'tekgekle' to ḻo ẕgons.
Zej nakže' ža'ze ka to be' da' žeká'a ḻáže'žo.
10 Bi wx̱én ḻáže'le da' gak gonle žakze chele.
Bi wká'n ẕen kwinle ni'a che da' ka' ẕbanle.
Cha' chan yeḻa' wnni'a chele, bi kwe'le wnné yoe chen.
11 To chi'i wnné Dios, na' chope chi'i benla' da' ni.
“Che Dios nak dot yeḻa' wak.”
12 X̱ana' Dios, ḻo no'o za' yeḻa' žeyache' ḻaže'
dan' žebi'o che to to benne' ka nakkze da' bene'.