66
1 ¡Le wká'n ẕen Dios ḻo yeḻa' žebele, ḻe'e zoale dot yežlyó!
2 ¡Le goḻ ka nak yeḻa' ẕen chie' Ḻe'!
¡Le wká'n ẕene' kate' we ḻawle Ḻe'!
3 Le ye' Dios: “¡Žebáneḻe'elto' che da' beno' ḻe'!”
Ni'a che yeḻa' ẕen che yeḻa' wak chio' benne' ka' bi ẕḻé'egekle' Le' chawe' žóngake' ka ẕnna x̱tižo'o.
4 Benne' ka' nníta'gake' dot yežlyó we ḻáwgake' Le',
na' góḻgake' chio' Le', na' che La la'y chio'.
5 Le da, ḻé'elele da' ẕen ka' da' ben Dios,
da' ẕenḻe'e da' bene' ni'a chegak benne' chie' ka'.
6 Bene' ga beyák nisdo' yo biž,
na' wdegak benne' chie' ka' ḻen ní'agakze' gan wzóa to yegw zil.
Žoa'a nisdon' bebéḻe'egekle' ḻaw Dios.
7 Ḻen yeḻa' wak chie' nna bi'e to chi'ize.
Ẕwíakze' da' žongak benne' ka' yógo'te yež ka'.
Benne' ka' ẕží'igake' chie' Ḻe' bi gata' yeḻa' ẕen chégake'.
8 Ḻe'e, benne' ka', le wká'n ẕen Dios chežo.
Le wzenle benne' ka' da' žoe ḻawle Ḻe'.
9 Ḻekze' žape chi'e žo'o nich soažo nbanžo,
na' bi bi'e latje chejchégwžo.
10 Le', Dios, bwio' neto' ḻo da' ka' bento'.
Bdio' neto' ḻo da' wẕáka'to' kan žongak benne' ka' ẕdégake' ya plat ḻo yi' nich ga'nen chawe'.
11 Beno' ga bejchazto' to ḻo do yeḻj.
Bdo'o x̱kóže'to' to ywa' zí'iḻe'e.
12 Beno' ga wdegak benne' zej žie' bžina' chie' ka' ḻo yichjto'.
Wdeto' da' naken ka to ḻo yi', na' to ḻo nis zil,
na' bebejo' neto', na' bzo' neto' to latje gan zoato' ḻo yeḻa' ba nez.
13 Cho'okza' ližo' nich wzeya' biado' ka' ḻawo' Le'.
Gonna' chio' da' wchebe ḻaža'a gona'.
14 Bchebe ḻaža'a gonan',
dan' wnnía' katen' wžé' zédḻe'ela'.
15 Wzeya' biado' ka', bia ženne' ka', ḻawo' Le',
na' kwen žen chegak ẕíla'do' ka' wzeya'-ba' gan zo',
na' gota' beždo' ka', na' chibo byo ka' ḻawo' Le'.
16 Le da, yénlele, yógo'tele ḻe'e ẕžébele Dios.
Wzenla' ḻe'e da' bene', gókḻene' neda'.
17 Dot ḻaža'a bḻiža' Ḻe', na' bka'n ẕenkza' Ḻe'.
18 Chela' wzé ḻaža'a to da' ẕinnj bi benle X̱anžon' chia',
19 san da' likze benle Dios chi'a,
na' bze nage' da' wnnabla' Le'.
20 Bi bzoe' cheḻa'ale da' bcháḻjḻena' Ḻe',
san beyache' ḻáže'le' neda'.
¡Ga'n ẕen Dios!