1 We ḻawa' X̱anžo Dios ḻen dot yichj ḻáẕda'wa'.

Ẕente nako' Le', X̱ana' Dios.

Laže' da' nako' naken yeḻa' x̱tan, na' yeḻa' ẕen.

2 Ẕwakw kwino' yeḻa' baní' ka ẕa lano'.

Bzaḻo'o ya'abá ka to yo'o laže' chio'.

3 Beno' ližo' ḻawle nis da' žen' ža'le.

Ẕkonlo' žin bejw ka' ka to karreta gan ži'o Le', dan' ẕden ḻo be'.

4 Ẕkonlo' žin be' žaken ka wbás chio',

na' yes wzió' ka' ka wen žin chio' ka'.

5 Bzoa chocho' yežlyó nga ḻo lenen,

na' bi be gak wkwasen'.

6 Bwako' yežlyó nga ḻen nisdo' ka žon to benne' žakwe' ẕa lane',

na' nisen' bwakwn ya'a ka'.

7 Kate' btiḻo' nisen', na' beẕonnjen.

Bebigan' kate' benlen wnnó' zižje.

8 Nisen' dan' bwakwn ya'a ka' bejsóan ḻo yegw ka',

na' bžinen latjen' da' beno' Le' che nisen'.

9 Bzo' gan ze ḻaw chejsóan, na' gan biž gak ten,

nich biž yewakwn yežlyó bižen'.

10 Beno' bej ka', da' ka' žáljgaken žoa'a yégodo' ka',

na' yegw ka' ẕdégaken ládjwgak ya'a ka'.

11 Ḻo yegw ka' že'jgak bia yix̱e' ka' nis,

na' ẕdoan yeḻa' ẕbiḻe nis chegak burro yix̱e' ka'.

12 Byínnedo' ka' žóngakba' x̱ó'ngakba' ka' ḻo yag ka' zégaken žoa'a yegw ka',

na' žóḻgakba' ládjwgak ni'a ná'gaken ka'.

13 Žseḻo'o yejw ẕan ya'abá dan' žaken ḻaw ya'a ka',

na' želje yežlyón' ḻen da' chawe' da' žono'.

14 Žesgolo' yix̱e' da' žawgak bia yix̱e' ka',

na' kwando' ka', da' ka' žawgak benách ka',

na' da' ka' ẕkóngekle benne' ka' žin nich góngake' yeḻa' waw,

15 na' uba ka', da' ka' žóngake' x̱is uba waḻ dan' žonen ga žebégekle benne' ka',

na' olibo ka', da' ka' žóngake' set dan' ẕgó'ogake' yíchjgake',

na' ẕoa' da' žóngake' yet nich sóagake' nbángake'.

16 Yag sedro ka' da' zej zen ḻaw Ya'a Líbano ẕzí'gaken nis yejw.

Zej naken chio', X̱anto' Dios, dan' gozo' ḻégaken.

17 Ḻo yag ka' žẕíagak byínnedo' ka' x̱ó'ngakba' ka',

na' ḻo ni'a ná'gaken že'gak liž byinne sigwenya ka'.

18 Zej zoa chibo yix̱e' ka' ḻaw ya'a ẕen ka',

na' ḻo bloj ka' ẕangak ya'a ka' zej zoa bẕižo' ka'.

19 Beno' byo' dan' ẕḻoe'elen to byo' to byo' che yiz,

na' wbíž nnezlen kate' žaḻa' yenen.

20 Beno' yel, na' kate' ba goḻen,

na' ẕžojgak bia yix̱e' ka'.

21 Ẕbéžeya'agak bež yix̱e' ka', žíljgakba' da' gáwgakba'.

Žíljgakba' bia ka' wnnakzo' gáwgakba'.

22 Kate' ẕḻa' wbíž, na' žeyéjgakba' ḻo bloj chégakba', gan ẕtásgakba' te ža.

23 Naž ẕžojgak benne' ka', na' žjake' wen žin,

na' žóngake' žin na' zejte žen wbíž.

24 X̱anto' Dios, da' zante zej nak da' beno'.

Ḻen yeḻa' žejní'il ẕente chio' beno' da' ka'.

Nža' yežlyó nga da' ka' beno' Le'.

25 Zoa nisdo' ga na', dan' naken ẕen, na' zil-ḻe'e,

gan zej yo'o bia zante ka', biado' ka', na' bia ẕen ka'.

26 Ḻo nisdon' zej nnita' barkw ẕen ka',

na' zoa bia ẕen ḻo nisdon', bian' beno' Le', nzi' laba' lebiatán.

27 Yógo'te bia ka' žx̱en ḻáže'gakba' Le',

nich gonno' da' gáwgakba' kate' gaḻa' chégakba'.

28 Ẕneẕjon' chégakba', na' ẕzí'gakban'.

Žónnḻi'o da' žáwgakba', na' žéljgeklba'.

29 Kate' bi žape chi'o ḻégakba', na' ẕžébegakba'.

Kate' žekwaso' be' žeká'gakba', na' žátgakba', na' žeyákgakba' bix̱te yo,

30 san kate' žeseḻo'o be' chio', na' žebángakba'.

Ẕneẕjo' yeḻa' nban kob chegak da' ka' zej zoan ḻo yežlyó nga.

31 To chi'ize ga'n ẕen X̱anžo Dios.

Žaz ḻaže' X̱anžon' da' ka' benkze' Ḻe'.

32 Ẕwie' yežlyó nga, na' žẕon'.

Ẕgane' ya'a ka', na' ẕžoj žen che yi' ga na'.

33 Goḻkza' che X̱anžon' x̱ak zoa' nbana'.

Yógo'te ža zoa' nbana' goḻa' da' we ḻawa'a Dios chia'.

34 Žak ḻaža'a chaz ḻaže' X̱anžon' da' ka' ẕlab ḻaža'a,

na' žebézela' ni'a che X̱ana' Dios.

35 Kwia yi'gak benne' doḻa' ka' nníta'gake' yežlyó nga,

na' biž soagak benne' ka' ẕbej yíchjgake' Dios.