135
1 ¡Le wká'n ẕen La la'y che X̱anžo Dios!
¡Le wká'n ẕene' Ḻe', ḻe'e, wen žin ka' che X̱anžon',
2 ḻe'e zoale ḻo yodo' che X̱anžo Dios, ḻo ḻi'a yodon' gan zoakze Dios!
3 ¡Le wká'n ẕen X̱anžon' dan' nake' chawe'!
¡Le goḻ da' wká'n ẕenle La la'y chie', dan' nake' ži'i ḻaže'!
4 X̱anžo Dios wžíe' ẕa'só Jakob ka'.
Wžíe' ẕa'só Israel ka' nich gákgake' benne' chie' ka'.
5 Nnézkzelžo ẕente nak X̱anžo Dios.
Nakže' ẕen ka yógo'te dios chegak benne' zi'to' ka'.
6 Žon X̱anžon' yógo'te da' žénele' gone' ẕan ya'abá,
na' ḻo yežlyó, na' ḻo nisdo',
na' ḻo da' zoan gže' ẕan nisdon'.
7 Žone' ga že' bejw do ẕente yežlyó.
Žone' ga žasgak yes wzió' kate' žak yejw.
Žone' ga žak be' gáte'teze.
8 Ḻe' betkze' bi' byo nežw ka' chegak benne' Egipto ka'.
Gotgak bi' byo nežw ka' chegak benne' ka',
na' bia néžwdo' ka' chegak bia yix̱e' chégake' ka'.
9 Bene' yeḻa' wak ka' che ya'abá, na' da' ẕente ka' kate' bchinnje' yežlyó Egipton',
da' ka' ben Dios che benne' Faraón,
na' chegak yógo'te benne' wen žin ka' che Faraón na'.
10 Bžia yi'e benne' ka' chegak zante yež ka',
na' bete' benne' wnná bia' ka', benne' ẕenḻe'e ka'.
11 Bete' Sehón, bennen' wnná bi'e benne' amorreo ka',
na' Og, bennen' wnná bi'e benne' Basán ka',
na' yógo'te benne' wnná bia'gake' benne' Kanaán ka'.
12 Beké'e yežlyó nga ḻo na'gak benne' wnná bia' ka'.
Bneẕjwen' chegak benne' chie' ka', benne' Israel ka'.
13 X̱anto' Dios, to chi'ize zoa La la'y chio'.
Chejsá' ḻáže'tezgak benách ka' Le'.
14 X̱anžo Dios ẕchi'a ḻaže'e benne' chie' ka'.
Žeyache' ḻáže'le' žo'o, wen žin chie' ka'.
15 Lo'a ka' chegak benne' zi'to' ka' zej naken ya oro, na' ya plat.
Zej naken da' ka' bengak benne' ka'.
16 Zej de žoá'agaken san bi ẕnnégaken.
Zej de yej ḻáwgaken san bi ẕḻé'egeklen.
17 Zej de nággaken san bi žéngeklen,
na' bi zóagaken nbángaken.
18 Benne' ka' žóngake' lo'a ka' zej nake' kan nákgaken.
Ḻezka' zej nak benne' ka' žx̱en ḻáže'gake' ḻégaken.
19 Ḻe'e, benne' ẕa'só Israel, ¡le wká'n ẕen X̱anžo Dios!
Ḻe'e, benne' ẕa'só Aarón, ¡le wká'n ẕen X̱anžo Dios!
20 Ḻe'e, benne' ẕa'só Lebí, ¡le wká'n ẕen X̱anžo Dios!
Ḻe'e, nol-le ẕžébele X̱anžo Dios, ¡le wká'n ẕen X̱anžo Dios!
21 Ḻe'e zoale yež Sión, ¡le we ḻaw X̱anžo Dios,
Bennen' zoakze' yež Jerusalén!
¡Ga'n ẕen X̱anžo Dios!