Revelation
Jesus-el ileyel, nthakenharl irreyneyenh arrwekel
Angka nhenhan alakenh aynteyel
Artwamp anyentel John-el angka nhenhan ingkwernew pip-warl. Ra anenh kwertengerl Jesus-wenh, Zebedee-wenh alerikwan.
John-an alhenh, angka mwerr-angker Jesus-akert ilerl-apenh. Rome-areny-rnem atyetyart-rnem ikwer-wety arlkarerrenh, rernemap renh thwenew apmer akely-warl Patmos-warl, ahern ingwer-warl kwaty alay ampep-warl. Rap anenh tyaylel-apeny. Rarl ikwer-itwew anenh, Jesus ikwer angkew altyerr-angkwarr. John-elap ingkwernew-anem altyerr renh pip-warl. Alakenh-anyem Christian ingwer-rnemel iterl-areyew, alakenh-anyemarl irreyenh ingwer-ingwer.
Ikwereng-arey Rome-areny-rnemel Christian-rnem irrwernenh artewentyel inngey, ingwer-rnem-then atwenh ipmew-antey. Apmwarl ayntenheng-arey, Christian-rnem arrkernelhenh-antey, Akngey-wenh-angkwarr apent-aynteyew. Alakenh-wety Akngeyel angka nhenh anthew John-ew, rernemaw rlterrkerreyew-awaty, ater-weny anaynteyew.
Angka nhanyem picture-talk-akert. Akngeyel Christian-rnem ilew, angka irrpety-angkwarr renh-rnem akalty-antheyew.
Namp 1: Arraylenty-rnem artwa apmwernem-thenan aley aneyel, rernemap Akngey-wetyarl ilperteleyel akngerr. Rernemap ingwer-rnem pwerep-antheyel, Christian-rnem irrwern-aynteyew. Apmwernemel apek renh-rnem ipmew atwem.
Namp 2: Jesus Christ-an ilkwarl ingkerr-angkwarr. Ingwer-ingweran ra ipmew atweyenh Akngey-wetyarl arlkarerreyel-rneman.
Namp 3: Ahern-thenarl alker-then ywerreyelpeyenh-penhel, Akngeyel ahern ngwampeny-then alker ngwampeny-then arnwarneyenh-anem. Ikwerenh-rnem ahern awankeny-itwewarl anenheng-arey, rernemarl rlterrk ikwerant iterrenh, Akngeyel renh-rnem ineyenh, akngeyneyenh, ikwer-itwel aney-alpeyew intem-antey. Rap ikwerenh-rnem ineyenh, akngeyneyenh, ikwer-itwel aney-alpeyew intem-antey, rernemarl rlterrk iterrenh ikwerant.
1
Angka nhenhelan ileyel, ingwer-ingwer ahern nhenh-itwew aynteyenh
1 Akngeyel angka anthew Jesus Christ-ew, ra ileyew ikwerenh-rnemew, alerl-antey ingwer-ingwer alakenharl aynteyenh-akert. Rap antyerl ikwerenh thwenew warrkenh ikwerenh-warl atyeng-warl John-warl. Antyerl ra ilek-ilek lwewarrernew atyeng. 2 Atha nhenh ingkwerneyel, ilek-ilek atharl arew-penh. Angka nhenhan Akngey-wenh, Jesus-elarl lwewarrernew antyerl ikwer. 3 Ingwerentyel angka nhenhan ilerl-anenty, Akngeyel renh arntarnt-arayntem. Ingwerentyan awelhenty mwanty iterremel, Akngeyel renh arntarnt-arayntem arrpemarl. Arlta arrer-anem irreyel.
John-el angka nhenhan ingkwerneyel Akngey-wenh-rnemew
4 Ya, alakenh atha pip nhenh ingkwerneyel Christian-rnem-warl, apmer Asia-ampeny-warl. Arrantherrarl aneyel apmer 7-itwel, arrantherrap Akngey-warl-athek akarrerrem apmelerr, renh nakeyew.
Akngey ran arrwekeleny anenh, ahern nhenh arnwarney-angenhel-antey. Iteth ra aneyel, iteth ra anayntem intem-antey. Atha nhanyem katy ayerneyel arrewantherr, ra athamerremel arntarnt-araynteyew. Alakenh-angkwarran arrantherr mwerrant-arey anaynteyew. Inweng-rnem 7 Akngey arrerentyarl aneyel, rarl chair ikwa atyetyart-wenh-itwew. Renh-rnem atha ileyel, arrewantherr katy ayerneyew, Akngey ra athamerremel arrenhantherr arntarnt-araynteyew. 5 Ya John-el atha Jesus Christ-then ayerneyel. Rant iley-angker Akngey-wenh-angkwarran. Atha renh ayerneyel arrewantherr, ra athamerremel arntarnt-araynteyew, arrantherraw mwerr-angkwarr anaynteyew. Jesus-tangkwel Akngeyel itethelew ipmepenh. Ahern nhenh-itwewan artwa alkenh-rnem apmer arrpanenh-areny aneyel. Jesus Christ alkenharl ingkerr-angkwarr ahern nhenh-itwew aneyel.
Anantherr ingkerrenh intwemel-alhenh Akngey-wety. Jesus-anap aletharl ilkelhenh anewantherr. Ra katy ilwew, apmwa akngeyew anantherr-wety. Arrnga ikwerenh thelew, anenhantherrenh angkepeleyew Akngey-warl-ilwengk. 6 Aleyan Jesus-el anenhantherrenh arrernew, warrkenh Akngey-wenh-rnem-anem anaynteyew. Nakeyn-aynteyew Jesus renh, rarl alkenh aneyel intem-antey! Ya, arratyarl yanh!
7 Awelhenh-arey atyeng arrantherran! Ingwer-ingweran Jesus apey-alpeyenh ahern nhenh-warl. Arrantherrap renh areyenh, rarl apey-alpeyenh kwenpay-angkwarr. Ingkerrelan areyenh anngel. Weth-rnemel renharl atwew-rnemel-then areyenh arrpemarl. Ingkerrenh apmer arrpanenhel artnalhelerreyenh ikwer. Ya, arraty wenh! Alakenh-anyemarl aynteyenh!
8 Akngey alakenh angkeyel, “Ayengan arrwekel anenh. Awank-akerr ayeng anenh, ahern nhenhan arnwarney-angenhel-antey. Aleyan ayeng iteth-anteyarl aneyel. Ahern nhenh-then alker nhenh-then aleth-antey ywerrenheyenharl, ayengan iteth intemarl anerl-aneyenh. Ayengan Atyetyart Ilkwa Ingkerrenhew aneyel.”
John-el Jesus areyel altyerr-angkwarr
9 Ayeng John, Jesus-wenh warrkenh arrantherr-apeny. Ra alkenharl aneyel warrkenh ikwerenh-rnemew. Ingwer-rnemel ayenh irrwerneyel arrenhantherrenh-apeny. Kel mwerrarl alakenh. Anantherr renh apent-ayntem angkeperrey-angenh, rarl anenhantherrenh rlterrkel-ayntem. Ayeng alhenh, angka mwerr-angker Jesus-akert atha ilerl-apenh. Rernem ayenh antwerrkew, thwenew-anem apmer nhenh-warl Patmos-warl. Apmer ahern akelyarlap ran, kwaty alay ampep-itwew, tyayl-apeny.
10 Weth-antey Akngey-wenh arltel ayeng angkenh ikwer-warl-ilwengk. Ra Inweng ikwerenh thwenew arawerrng rlterrk-akert atyeng-warl. Athap awew ingwerenty-anem, artep-angkwarr angkey-alhenty. Rap atayel inngey angkey-alhew terampet-apeny. 11 Rap atyeng angkew, “John-ay! Atha ngkweng ilek-ilek lwewarrerneyew. Pip ina. Ingkwerna ilek-ilek nhaym, atharl ngkweng lwewarrernem. Ntwap thwena Akngey-wenh-rnem-warl, apmer 7-areny-rnem-warl. Rernem Akngey-warl-athek akarrerrem apmelerr. Thwena Ephesus-areny-rnem-warl, Smyrna-areny-rnem-warl, Pergamum-areny-rnem-warl, Thyatira-areny-rnem-warl, Sardis-areny-rnem-warl, Philadelphia-areny-rnem-warl, Laodicea-areny-rnem-warl-akerr. Thwena ingkerrew-antey.”
12 Athap artepang arew-anem. Atha areyew, angwenh atyeng angkeyelan. Athap arew-anem, ampwal-rnem 7 inngarl rtnenh, gold-penharl arnwarnew. Irrwerl-itwewan ikwer-rnem-itwew ayntenh irrkwernem anter olive-angketyarr, lherrmarl ampenh-akert. 13 Ampep-itwewan rtnenh Artwa Inngarl Akngey-wenh-apeny, arnkwa arlpenty-akert ingketyew-atety. Arnelty-angkwarran pilt gold-el-apenyarl arrtyernenh. 14 Altan arlterel kwenpay-apeny. Annga atherran lherrmel-apenyarl arrtyernenh. 15 Ingkety atherran ampenh, ayen rwenp rwethey tyerrenty-apeny. Atayel ra angkenhan kwaty atnyerr anterrenty-apeny. 16 Rap antyarr 7 antwerrkenh itep arraty-ampenyel. Arrakert-theyan nayp arlpenty-apeny tyerrelhenharl, arreylp atherr-angkwarrarl. Inngerrelan arrtyernenh ingkeny arlta ampepel-apeny.
17 Atharl artepang aremel renh arew, ayengap kwenerremel aytnew ipmapeny. Itep arraty-ampenyel-anem ayenh arnew, rap angkew, “Atererrey-angenh. Ayengan arrwekel anenh. Awank-akerran ayeng anenh, ahern nhenhan arnwarney-angenhel-antey. Ahern nhenh-then alker nhenh-then ywerrenheyenharl, ayengan iteth intemarl anerl-aneyenh. 18 Ayengan iteth aneyel! Ayeng ilwew-tangkwel, aleyan ayeng intem-antey iteth-anemarl. Ingwer-rnem atha itetheleman, ingwer-rneman atha ipmemarl, rernem aynteyew ipmernem-itwelarl.
19 Ya, John, ingkwerna ingkerrenh ilek-ilek, ntwarl arew altyerr-angkwarr. Ingkwerna, ilek-ilek arlta nhenhelarl ntwa arew. Ingkwerna, ingkerrenh nhanyem atha ngkwengarl lwewarrernew, ingwer-ingwerarl aynteyenh. 20 Ntwa areyel ampwal-rnem 7, gold-penharl arnwarnew-rnem? Atha anayntelem ngkweng, ntwa iterl-araynteyew. Rernem Akngey-wenh-rnem ileyel, rernemarl akarrerreyel apmer 7-itwew. Ilekarlap antyarr 7 nhenh-rnem, atharl antwerrkeyel itep arraty-ampenyel? Athap ngkweng anayntelem arrpemarl, ntwa iterl-araynteyew. Rernem ileyel antyerl-rnem 7-arl, rernemarl Akngey-wenh-rnem arntarnt-areyel apmer 7 weth-rnem-itwew.”