PHITHAR
Ro Nyichiieng Pha Jigigam
Yaophi
Nyichiieng pha Phithar ro jigi ne ibi pha dayiingdayang rey dun pha Masiphothek shii zey ro. Hì pha miyao sbang zey pha jine biidiie pha masdothek shii nane ithek muyua pha zab awie pha blia nane siulao shii khriig rek pha yao. Ji pha diigthek shii chang phane Hamangkhung-aphuii ro nane Ithong Isu Masi ro izai khani shii khomuii rone doh ro, hanyie awaithek è Isu shii doh chiih-è yua pha ji aishii è yoi pha khani ji è branthek re-è yoiphi. Hanyie è Masi ne iidoh athog phro ne yua pha ji shii isiie ruii srane zeypho è zey ro. Ai è yao Masi iidoh thog pha chia pha jine nyieliieshii izai Hamangkhung-aphuii ne “hanyie jia shii de mua yi pha ayang ro, jishii zab ne awaithek layog è khid bone yang ro.”
Iliing shii um pha ji
Yaophi (1:1-2)
Masipho shii ho (1:3-21)
Biidiie pha masdothek (2:1-22)
Idohhè shii Masi wuii ruii (3:1-18)
1
1 Isu Masi ro khiao nane guaphasamoy, Simon Phithar re-è—
Hanyie yi gathek ro Hamangkhung-aphuii nane Ragia Isu Masi pha rangsuathek ji è gathek ro igong migi duiine hanyie shii phi pha ji shii hìpha jigi phijong ro:
2 Gathek ro khani pha Hamangkhung-aphuii nane Ithong Isu ro bushun nane liijiing ne nathek shii ley è chua ne phi bo.
Hamangkhung-aphuii ro ho nane gua
3 Hamangkhung-aphuii ro hamangkhung blu ne hanyie è awai* 1:3: awai ro shii thang; giak jigizey um ai re-è. ro biisiie nane wiethek shii thang pha ho ro aishii gu è thieg pha khani ji re-è izai giangthek chai shii rai pha zab gethek è chid pha ji phijong ro. 4 Hì duiine ai è sbang rek pha bajo boh nane igong lasenthek phijong ro, ji è ji pha lasenthek è sohjambling pha awie pha chid pha ji è nyayao mua, chiih-è hamangkhung ziig shii nyathang mua. 5 Hìthek pha chiang è nawai migi shii wie chodo pha nawai ro wie shii khani chodo bo; 6 naro khani shii awai shii zud pha ji shii chodo; nawai ro awai shii zud pha ji è zud pha ji shii chodo bo; nawai ro zud pha ji shii hamangkhung-aphuii duiine è chodo 7 naro hamangkhung-aphuii duii pha ji shii ne khuiino ro miie shii miie chodo bo; chiih-è nathek ro Masipho chun pha ji shii miie chodo bo. 8 Hìthek pha ichua wie nathek è chid ro, chiih-è nathek zab yi ithek shii bajo um arone, ithek è nathek ro khani pha gethek ro Ithong Isu Masi shii wie nane chun pha rab phi. 9 Jishii nathek shii jithek oi arone nathek ne ruang ariig mua chiih-è nathek shii buyo layogthek è gang rekjong phi pha ji shii bia dun phro.
10 Ji-è chiihphado, gu iijiiakthek, Hamangkhung-aphuii è ho pha ji shii chiih-è ai è nathek shii ne idang lie um pha ji shii din nede muna gang bidiang bo; nathek è ji rek arone, nathek ne nawaithek migi† 1:10: nathek migi shii thomuii; dinne layog shii ley. shii khuchungde athoh phro. 11 Hì pha lumuii è nathek shii ne gethek ro Ithong nane ragia Isu Masi ro idang pha Sajathua shii khud pha ley rangsua phi ruii phro.
12 Chiih-è hìpha miyao ne gu idang nathek shii now yi pha ro, nathek ne ithek shii thiegjong chiih-è nathek è mua pha izai ji shii ne chuh reyjong ro. 13 Gu è now shii gu sieng ne rai ba shii hìpha miyaothek pha nathek ro nowkhlei pha ji shii nai pha ne gu shii rangsua um bie ro. 14 Khthiie gune ji pha iy pha siu shii thoh muii chid gune ji thieg, gethek ro Ithong Isu Masi è gu shii miang è yao. 15 Gu ne gui è rek muii pha ji rek pha ro, chiihphado, gu iy dun pha iidoh idang pha ishak shii nathek shii hìpha miyaothek now yi pha lumuii phi pha ro.
Masi ro biisiie shii riigpho
16 Gathek ne gethek ro Ithong Isu Masi ro riichaiboh ji wuii ruii pha nathek shii thieg yi pha phaluiithek rab ne yao pha ji è ayao ro. Gathek ro mieg è airo zabèboh ji doh ro. 17 1:17,18: Mth 17:1-5; Mrg 9:2-7; Lug 9:28-35 Aishii ne ilab nane Hamangkhung-aphuii Aphuii shii biisiie phi mage shii gathek de thiisa hà um, Bajoboh Biisiie è goh aishii thog mage shii, yao, “Hì ne guiro bushun Dufuii ro, hanyie rog shii gu è sang pha ji ro!” 18 Gethek ai rog shii so phiing hà um shii, guithek de ji pha goh ne hamangkhung è wuii ruii pha ji yoi ro, 19 Gethek ne din nede chaigpho re-è yao pha mua shii muna anow dak ro. Nathek ne ji shii isiie rek pha ne nyarek mua, nyieliieshii hìne hamiang pha dadiang yi nathek lubuthek shii chuang ne Inai arey sapho shii ne muchuang khlieng pha duiine ro. 20 Zab è muna ne hì shii, nowkhlei bo, jigigamthek shii chaig pha ji shii gethek hanyie magunde gethek lum ayao mua phro. 21 Chiih-è chaigthek ro mua bran è yang pha ji è athog ro, jishii branthek ne Ragung So iliing shii phrai ne ithek yao pha mua jine Hamangkhung-aphuii è thog ro.