METHIU
Ro Muawie
Yaophi
Methiu pha Muawie yao pha ji ne Isu ne Ragia ro sbang rek, ai chiang shii Hamangkhung-aphuii è ihèg surua shii awai branthek shii sbangthek rek pha ji duiine zab rey yi. Hì pha mua wie jine Jewish branthek jia shii asidoh bie ro, jishii zab pha sohjambling shii, hanyie thek duchoi shii Isu giak ne sieng pha ji shii de ro.
Methiu pha jigigam ne gayiigdang ne zey marui ro. Hì ne Isu giak pha è jao ne, airo khowo nane chuajan, ji pha idoh shii Galili hà airo muyua nane gang rek phi pha ji ìd yi. Jithek zey ched ne Isu è Galili è Jerusalem wuii dun, chiih-è idoh pha habda aishii bai hà ziin ne ua muii chiih-è ai hòi din chiih-è nyie rey pha miyao ji de zey ne um ro.
Hì pha Muawie è yao pha ji ne Isu ne, hanyie shii Hamangkhung-aphuii pha Iphey ji shii yua mua pha riichai um, chiih-è Hamangkhung-aphuii pha Sajathua chiang yuaphi pha bajoboh Masdo ro. Ai muyua marui pha miyao khrab pha ji ne guii rang shii rab ne zey pha miyao ro: (1) Phiing giu shii yua pha muyua ro: Hamangkhung pha Sajathua shii rai pho ro bujuii, bliathek, chua, nane phariang ishak nane hì zab pha chiang shii yao. (Itho 5-7); (2) samoy snanyi shii blia khi-èrek chiid pha ji yua pha jigigam ro (itho 10); (3) Hamangkhung pha Sajathua shii najang yao (itho 13); (4) samoy izai rek pha miyao siu yao pha jigigam ro (itho 18); (5) thuh shii um pha ishak ji jong ne Hamangkhung-aphuii pha Sajathua thog sharuii pha miyao ji de zey ne um ro (ithothek 24-25).
Iliing shii um pha ji
Achinmoi nane Isu giak pha ji (1:1—2:23)
Jon khowo ro Blia (3:1-12)
Isu shii khowo phi pha ji nane chuajan (3:3—4:11)
Isu è Galili shii hong ne blia rek (4:12—18:35)
Galili è Jerusalem (19:1—20:34)
Idohhè pha habda Jerusalem hà chiih-è inui shii (21:1—27:66)
Ithong hòi pha nane dong pha (28:1-20)
1
Isu Masi ro blangthek
(Lug 3:23-38)
1 Hì ne Isu Masi pha blangthek, Dawid ro riingthek, hanyie yi Abraham ro riingthek, ithek ro sasab ro boh phabi.
2-6a Abraham re-è yie dang ne Dawid Saja khama blangthek um pha ne ichiih luii shii zey muii ro: Abraham, Ishak, Jakhob, Juda chiih-è airo khuiinothek, ji pha idoh Pherez nane Zera (ithek amuii ne Thamar ro), Hezron, Ram, Aminadab, Nasa, Salmon, Boaz (ai amuii ne Rahab ro), Obed (Ithek ro amuii ne Ruth ro), Jese nane Dawid Saja.
6b-11 Dawid Saja sieng pha ishak re-è yie dang ne Israel pha bran shii Babylon hà zum ne noh dun pha blangthek de ichiih luii shii zey muii ro: Dawid, Solomon (airo amuii ne Uria yiy ne raijong noh pha bimi ji ro), Rehoboam, Abija, Asa, Zehoshaphath, Zehoram, Uzia, Zotham, Ahaz, Hezekhia, Manase, Amon, Josia nane Jehoiachin nane airo khuiinothek.
12-16 Babylon hà zum ne rai marui pha ishak è yie dang ne Isu giak pha ishak thogdang pha blangthek ne ichiih luii shii zey muii ro: Jehoiachin, Shealhthiel, Zerubabel, Abiud, Eliakhim, Azor, Zadokh. Achim, Eluid, Eliazer, Muthan, Jakhob nane Joseph, hanyie è Isu giak pha amuii Mery shii yiy pha bufuii ji ro. Hanyie shii Masaiya rone ho muii pha ji ro.
17 Ji-è, chiihphado Abraham è Dawid Saja thogdang pha blang ne snawi um ro, chiih-è, Dawid pha ishak è Babylon hà zum ne raidun pha ishak thogdang pha blangthek ne snawi um ro. Babylon è yie dang ne Isu Masi giak pha blangthek de snawi um ro.
Isu Masi giak
(Lug 2:1-7)
18 1:18: Lug 1:27 Hì ne Isu Masi khi-èrek ne giak pha ji ro. Ai amuii Mery ne Joseph è shadiiegang rekjong ne ruii pha bimi ro. Jishii, ai ne ayiy-agey ba pha ibi shii ai ne Ragung So è ani wiig yi pha doh. 19 Joseph ne idang giang sieng ne rai pha bran ro, jiè ai ne Mery shii ug ne che pha saro, nyieliieshii ai è Mery shii hong ne biwo rek yi pha ayang ro. 20 Ai è ji è now ramuii shii, Ithong pha hamangkhliie jia ai ibang shii dongkhlei ruii ne aishii yao, “Dawid riing è giak pha Joseph, Mery shii na yiy rek ne noh pha arum chid rabo, ai ani ji ne Ragung So re-è wiig yi ro. 21 1:21: Lug 1:31 Ai è ani bufuii jia giak ruii phro, na ne ji pha ani shii Isu beng bo, nyieliieshii, ai è awai branthek shii awaithek layog è ragia rek phi ruii phro.”
22 Thuh hìthek rey ruii pha ji è Ithong è awai chaigthek è khi-èrek ne yao yi pha jithek zab rey sharuii pha ji ro. 23 1:23: Aij 7:14 (LXX) “Ayiy-agey ba pha miliao bimi jia è ani wiig ne dufuii jia giak ruii phro, ai ibeng ne Imanuel beng ruii phro” (Jipha miyaosiu ne, Hamangkhung-aphuii ne gethek rog shii um ro).
24 Ji-è Joseph sieng srane Ithong pha hamangkhliie è khi-èrek ne yao pha duiine Mery shii awai yiy rek noh. 25 1:25: Lug 2:21 Jishii, ji pha ani agiak sapho ne ai è ji pha Mery rog shii ò amen ro. Chiih-è Joseph è aishii Isu rone beng.