Jon Shii
DONG
Yaophi
Jon shii dong pha ji ne Migiphothek shii diig phi pha ishak shii zey nyieliieshii ithek ne Isu Masi ne Ithong rone migi rek. Zeypho è airo thampho shii luthong nane lububo rek phi pha mugak rek phi, chiih-è ithek shii diig nane diigchiao pha ishak shii migi hà rai yi pha lububo rek phi.
Chiih-è jigigam shii ne bajo ichua ne ichinduii re-è dongthek nane chaigthek è miiriig nyuak re-è yao ro, jipa inai pha Migiphothek ne gao mua ro, jishii zab gaithek ne agao bsa hà rai mua ro. Thiibiingkhinkheb pha gow duiine, hìpha jigigam pha miyao ne bajo yoh-yoh re-è dong pha ichinduii re-è din ne yao. Ichiih ne jigigam pha yua pha jine yoh-yoh munow um magunde, duchoi pha miyao ne sang ro: Ithong Masi è, Hamangkhung-aphuii è iidohè chiih-è zab awairo makthek shii Sakhathong de lua ne yang ruii phro, chiih-è awairo zab yang mage shii awairo migi branthek rog shii iwo hamangkhung nane iwo sohnyiak pha khirzeythek phi ruii phro.
Iliing shii um pha ji
Yaophi (1:1-8)
Igobi pha dong nane charchthek miley shii jigigamthek (1:9—3:22)
Miley chebthek rog shii khung (4:1—8:1)
Thu-ung mileythek (8:2—11:19)
Hakhliingmuii nane buii ibeymuthungthek nyi (12:1—13:18)
Yoh yoh dongthek (14:1—15:8)
Hamangkhung-aphuii ro lijieg pha miley shiikhiiakhjam (16:1-21)
Babylon mua pha, nane buii ibeymuthung chiih-è biidiie pha chaigthek nane Sakhathong shii yang (17:1—20:10)
Idohhè pha chua (20:11-15)
Iwo Hamangkhung, sohnyiak, Jerusalem (21:1—22:5)
Jongsha (22:6-21)
1
1 Hì pha jigigam ne Isu Masi è dong pha miyaothek ji sasab rek ne ruii. Khthiie nyie rey ramuii pha jine awai khiaothek shii doh yi pha Hamangkhung-aphuii hìpha dong aishii phi. Masi è hì thek pha manathek airo khiao Jon shii thieg yi pha airo hamangkhliie yi aishii thoh ge, 2 chiih-è Jon ai è nyie doh pha ji yaojong ro. Hì ne Hamangkhung-aphuii ro mua è ò chiih-è izai ne Isu Masi re-è dong phi rone hìne airo phosro ro. 3 Hanyie jia magunde hìpha jigigam tham pha ne bajo sang ro, chiih-è hanyie è chaigthek pha mua pha miyaogamthek ji yoi ne jigigam shii nyie zey ne um pha ji nuii pho ne bajo sang ro! Hì thek pha manathek rey ruii pha ishak ne nui sha ro.
Charch miley shii salamthek phi
4 1:4: Ezkh 3:14; Dng 4:5 Asia du-ùa pha miley charch shii Jon re-è:
Bushun nane liijiing ne nathek shii Hamangkhung-aphuii re-è ro, hanyie yi um, hanyie yi umjong, chiih-è yi wuii ramuii pha ji, chiih-è airo biang moe shii è miley ragung um pha ji è, 5 chiih-è Isu Masi è, isiie khagi, igobi iy pha ji re-è hòi ne hanyie yi sohjambling pha sajathek lakhung shii khoh ro.
Ai ne gethek shii miie ro, chiih-è airo iy ne zid pha ji è ai è gethek ro layogthek è ichad rek 6 chiih-è airo Hamangkhung-aphuii nane Aphuii ro blia rek pha gethek shii phabithek pha sajathua rab phi. Isu Masi shii biisiie nane blu ne idang nane idang rai bo! Amen.
7 1:7: Aij 55:4; Chng 89:27 Riig bo, ai ne sakhamiingthek lakhung è wuiiramuii ro! Hanyie aishii giao pho è lao ne, zab aishii doh ruii phro. Sohnyiak pha zab branthek ne ai lakhung shii zo ruii phro. Ji-è ji rey ro!
8 1:8: Dng 22:13; Mul 3:14 “Gune igobi nane iidohè ro,” Hanyie yi um, hanyie yi umjong, chiih-è hanyie ne wuiiramuii ro Ithong Bohblu Hamangkhung-aphuii è yao ro.
Masi ro dong
9 Gu ne Jon, nathek ro khuiino, gu ne Isu rog luagieng chiih-è airo Sajathua è thog pha nathek ro diig shii lubu phiang rek ne zud pha gu ne nathek iijiiak ro. Gu shii ne Phathmos pha gachung shii ruii muii nyieliieshii gu ne Hamangkhung-aphuii ro miyaogam nane Isu è dong pha izai ji yao phi. 10 Ithong pha inai shii Ragung è gu shii phrai ne noh dun, chiih-è gu ne goh gang jia yoi, jine thu-ung duiine rone, guro iidoh re-è yao. 11 Ji è yao, “Na è nyie doh pha ji zey bo, chiih-è Jigigam yi rajan miley pha Charchthek: Iphisus, Smyrna, Phergamum, Thyathira, Sardis, Philadelphia, nane Laodisia shii thoh ge bo.”
12 Gu shii hanyie mulo lei ne gu è iidoh khid ne shan ne riig shii, gu è san pha bunthruak miley doh, 13 1:13: Dan 7:13; Dan 10:5 chiih-è ithek duchoi shii bran duiine, yung yi awai lai shii thog pha guii pha duiine chiih-è ai rinyie shii san pha rathang reing pha duiine doh ro. 14 1:14: Dan 7:9 1:14,15: Dan 10:6 Airo khaziang yi miiriing mo nane imo hayun mia, chiih-è airo mieg yi bai duiine hùb; 15 1:15: Ezkh 1:24; 43:2 airo lai yi bala duiine khilieng chuang, chiih-è airo goh yi khasuang è ro pha duiine ro. 16 Ai è awairo phazoi wad shii dadiangthek miley khoh, chiih-è irey nyi um pha khamriie jia ai sem è fuang khia thog. Airo mizia ne inai duchoi pha hasiang duiine chuang. 17 1:17: Aij 44:6; 48:12; Dng 2:8; 22:13 Gu aishii doh mage shii, gu ne ai lai shii bran iy duiine chiih dun. Airo phazoi wad è gu lakhung shii khoh srane yao, “Arum rabo!” Gu ne igobi nane iidohè ro. 18 Gu ne isieng ro! Gune iy dun, Jishii thuh gu ne idang nane idang isieng. Gu ne iy pha lakhung shii riichai um ro chiih-è iypho ro sohjambling pha lakhung shii de riichai um ro. 19 Chiihphado, na è manathek doh pha, nyimanyi thuh shii um pha manathek nane iidoh shii rey ramuii pha manathek shii zey bo. 20 Hì ne na è guro phazoi wad shii doh pha miley dadiangthek nane san pha miley bunthruakthek pha ug pha miyaosiu ro: Miley dadiangthek ne miley charch pha hamangkhliiethek ro, chiih-è miley san bunthruak ne miley charch ro.