1 ཀྱེ་ཀྱེ་ཡ་ཝཱེ་ཁྱེད་ཀྱིས་ངེད་ཅག་སྡུག་བསྔལ་དྲན་པར་མཛོད། ། ངེད་ཅག་རྣམས་ཀྱི་ངོ་ཚ་སྣང་མེད་མི་བསྐྱུར་གཟིགས་སུ་གསོལ། ། 2 ངེད་ཀྱི་ནོར་སྐལ་ཕྱི་པར་དབང་བ་དང་། ། ངེད་ཀྱི་ཁང་པ་དེ་ཡང་ཕྱི་པར་དབང་། ། 3 ངེད་རྣམས་ཕ་མེད་དྭ་ཕྲུག་བཞིན་དུ་ལུས། ། ངེད་ཀྱི་མ་རྣམས་ཡུགས་མོ་ཡིན་ཚོད་འདུག ། 4 ངེད་ཀྱིས་ཆུ་རིན་སྤྲད་ནས་ཆུ་འཐུང་ཞིང་། ། ངེད་ཀྱི་བུད་ཤིང་གཞན་གྱིས་བཙོང་བ་ཡིན། ། 5 ངེད་ཀྱི་སྐེ་ལ་གཉའ་ཤིང་ལྕི་མོ་ཁུར་བའི་ཕྱིར* འདིར་ངེད་ཀྱི་སྐེ་ལ་གཉའ་ཤིང་ལྕི་མོ་ཁུར་བའི་ཕྱིར་ཞེས་པ་ནི་འགྱུར་ལ་ལར་འདེད་མཁན་རྣམས་ཀྱིས་ངེད་ཀྱི་གཉའ་ནས་བཙིར་ལ་ཉེ་ཞེས་ཀྱང་བསྒྱུར་ཡོད།། ། ངེད་ཅག་ཤིན་ཏུ་ལུས་ཐང་ཆད་ཀྱང་ངལ་གསོ་མེད། ། ད་དུང་མི་ཡིས་ངེད་ཀྱི་རྗེས་སུ་འདེད་པར་གྱུར། ། 6 ངེད་ཅག་ཟས་ཀྱིས་འགྲང་ཕྱིར་ཨེ་ཅིབ་དང་། ། ཨ་སུར་པ་ཡི་ཕྱོགས་སུ་མགོ་བོ་བསྒུར། ། 7 ངེད་ཀྱི་མེས་པོས་སྡིག་པ་བྱས་ན་ཡང་། ། དེ་རྣམས་སྔར་ནས་འདས་ཤིང་མི་འདུག་གོ ། དེ་ཚོའི་ཉེས་པ་ཐམས་ཅད་ངེད་ཀྱིས་ཁུར། ། 8 བྲན་གཡོག་དག་གིས་ངེད་ལ་ཚོད་བཟུང་སྟེ། ། ངེད་རྣམས་དེ་ལས་སྐྱོབ་མཁན་སུ་ཡང་མེད། ། 9 དབེན་སྟོང་ཡུལ་གྱི་རལ་གྲི་རྣོ་དྲགས་པས། ། ངེད་ཀྱིས་རང་སྲོག་བསྡོས་ཏེ་ཁ་ཟས་ཐོབ། ། 10 བཀྲེས་སྐོམ་ཕྱིར་དུ་ངེད་ཀྱི་ལུས་པོར་ཚ་རྒྱས་ཤིང་། ། ངེད་ཀྱི་སྐྱི་མོ་མེ་ཐབ་བཞིན་དུ་ཚ་གདུག་ཆེ། ། 11 བུད་མེད་རྣམས་ལ་ཛ་ཡན་ཡུལ་དུ་བརྙས་བཅོས་ཐེབས་པ་དང་། ། ཡ་ཧུ་དཱ་ཡི་གྲོང་དུ་མོ་གསར་དག་ལ་བཙན་གཡེམ་བྱས། ། 12 འགོ་དཔོན་རྣམས་ནི་མི་ཡིས་མར་དཔྱངས་ཏེ། ། རྒན་པོ་རྣམས་ལ་གུས་བཀུར་མ་ཐོབ་བོ། ། 13 ན་གཞོན་རྣམས་ཀྱིས་འཐག་རྡོ་བསྐོར་བས་སྡུག་མྱངས་ཤིང་། ། བྱིས་པ་དག་གིས་བུད་ཤིང་ཁུར་བས་སར་འགྱེལ་ཏོ། ། 14 རྒན་རབས་དག་ནི་མཁར་སྒོར་མི་སྡོད་ཅིང་། ། ན་གཞོན་རྣམས་ཀྱི་གླུ་ལེན་གར་རྩེད་མེད། ། 15 ངེད་ཅག་སེམས་ཀྱི་དགའ་མགུ་ཡལ་བ་དང་། ། བྲོ་གར་འཁྲབ་པ་སྐྱོ་གདུང་རང་དུ་གྱུར། ། 16 ངེད་ཀྱི་ཅོད་པན་མགོ་ནས་ས་ལ་ལྷུང་། ། སྡིག་པ་བསགས་པས་ངེད་ལ་ཆག་སྒོ་བྱུང་། ། 17 དེའི་ཕྱིར་ངེད་ཀྱི་སེམས་ནི་རྒུད་པར་གྱུར། ། ངེད་ཀྱི་མིག་ཟུང་ཡང་ནི་རབ་རིབ་གྱུར། ། 18 ཛ་ཡན་རི་བོ་སྟོངས་ཤིང་སྟོང་གྱུར་པས། ། ཝ་མོ་དག་ཀྱང་རི་བོའི་སྟེང་དུ་རྒྱུགས། །

19 ཀྱེ་ཀྱེ་ཡ་ཝཱེ་ཁྱེད་ཉིད་གཏན་དུ་རྒྱལ་པོར་བཞུགས། ། ཁྱེད་ཀྱི་བཞུགས་ཁྲི་མི་རབས་ཀུན་ཏུ་གནས་པར་འགྱུར། ། 20 ཁྱེད་ཀྱིས་ངེད་ཅག་ནམ་ཡང་བརྗེད་དོན་ཅི། ། ཁྱེད་ཀྱིས་ངེད་ཅག་ཡུན་རིང་བསྐྱུར་དོན་ཅི། ། 21-22 ཀྱེ་ཀྱེ་ངེད་ཀྱིས་ཡ་ཝཱེ་ཁྱེད་ལ་ཞུ། ། ཁྱེད་ཀྱིས་ངེད་ཅག་ཡོངས་སུ་བསྐྱུར་བ་འམ། ། ངེད་ཕྱོགས་རབ་ཏུ་ཁྲོས་པ་མ་ཡིན་ཚེ། ། ཁྱེད་ཀྱིས་ངེད་རྣམས་ཁྱེད་ཕྱོགས་བསྐོར་བར་མཛོད། ། ངེད་རྣམས་ཁྱེད་ཕྱོགས་འཁོར་ཞིང་འཁོར་བར་ངེས། ། ངེད་ཀྱི་ཉིན་མོ་གནའ་ལྟར་མཛད་གསོལ་ལོ།། །།