Wosheetso P'awlos Shints Wosho
Teselonk'e Ashuwots Maants
Kindo
Teselonk'e Mek'odoniya eteets Rom shiritsi een kittuniye b teshi, P'awlos Teselonk'e Ik' moowu b́ need'i Filip'siyosi k'azk'rat b́ amiyakone, wotowa eree Ayhudi hayimanotiyo dek'osh t'int teshts Ik'i ash woterawwots P'awlos b́ t'intsiru Krstni woshon getseyat boteshtsosh ayhudiyots okoort P'awlosats fayo tuuztni bo teshi, manshowere P'awlos Teselonk'eyi fakshr Beriyo maants bíamo ooro b́falawok'o wot b́wtsi, ja'atnwere K'orontosits am b́ bodtsok'on bíyats karnt bín tep'f teshtso T'imotiwos Teselonk'e maants amt b́ aantsok'on Ik' mootse beyiru keewo ik ikon bísh b́ dani.
P'awlos b́ wosh shintso Teselonk'e ashuwotssh b́ guut' Krstiyaniwotsi kup'iyosha b́teshi, bo imnetiyona et bo shuni jango sheeng keewo b́ shishtsosh Ik'o b́ udi, P'awlos bo taalotse b́ datseyor awuk'o beyo b́ beetsok'o itsh gawituwe, maniyere okono Krstos aanar weyi jangosh aatets aatosh aaniyo b́ imi, aatetsanotsitsere k'atsuwots.
«Krstos aani b́ wooniyere shinon amanat k'irtso Krstos aani b́ woor b́ daatsitdúre dúr beyoke kaydek'etuwo wotituwe? Krstos awure aanar b́ weeti?» etiruwotsiye, P'awlos manatse tuut «Krstos aani b́weyi dano tewunon korfetsr manoor b́ borfetsosh it fino finore» ett boon b́ iziri.
Jamon mas'aafan b́detstso
Kindo 1:1
P'awlos gene'úwonat udon 1:2—3:13
Krstiyani beyosh wotituwo 4:1-12
Krstos aani b́ weyi jango daniyets dano 4:13—5:11
S'uwaatsi izets izo 5:12-22
Gúúpo 5:23-28
1
Jamo
1 1:1 Wosh. 17:1 Ik'o nihonat doonzo Iyesus Krstos jirwotsi wottsuwots Teselonk'e Ik'i maa ashuwotssh, P'awulosoke, Silasnat T'imotiwosoke wosheets woshoniye, s'aatonat jeenon itsh wotowe.
Teselonk'e ashuwots beyonat imnetiyon
2 Noo úni aawo Ik'o nok'onoor itn gawufetsat Ik'osh údo t'intsiruwone. 3 Noo Ik'o Izar Izewernat nonih shinatse it imnetiyo b́ finiruwo, shunosh it k'aliruwonat nodoonz Iyesus Krstosn it detstso jangat k'amoon it kotiruwo no need'irawon gawiruwone. 4 Shuneets eshuwwotso! Ik'o iti galb́dek'tsok'owo danfone. 5 Doo shishiyo itsh noshishiy noon keewu mec'ron b́woterawon angonat shayiri S'ayinone, dooshishiyo ariko b́wottsok'owo danfetsatniye, itnton noteshor itsha etaat awuk'o nobeetsok'o danfte. 6 1:6 Wosh. 17:5-9 Ay gond bek'o itats b́ bodaloru dab S'ayin shayironton daatseyiru gene'onton b́ aap'o dek'at noonat no doonz Iyesusi sheengon artswotsi woterte. 7 Mansh Mek'odoniyonat Akayiyon beyiru amants jamwotssh sheengon ariyetswotsi wotertee. 8 It nabts doonzo aap'o b́ shishe Mek'odoniyonat Akayiy mec'ron b́ woterawo Ik'atse it detsts imnetiyo jam beyok danere b́ teshi, han jangosh noo eegoru keewo noon geyiratse. 9 Itok nowoor awuk'o noon it dek'tsok'o arikon beyat beyirwo Izar Izewersh finosh woteraw ik'atsere galeyat awuk'on Ik'o maants it aantsok'o ashmanots botookon gawitune. 10 Mank'o Krstosi k'irotse tiztso, weet fayotse noon fariyituwo, b́ naayi Iyesusi daaratse b́woo awuk'on it kotetuwok'o gawitune.