Wosheetso P'awlos Gitl Wosho
K'orontos Ashuwots Maants
Kindo
P'awlos K'orontos ashuwotssh b́ guut'ts gitlts wosho b́guut'e K'orontosn teshts Ik'i moowunton teshts ayidek't kic'its gonkewora b́tesh. Ik'i meyitsi ashuwots mangts k'efuwotsi biyats botuziyalor P'awlos mano woshosh eents shuno b́detstsok'oniye b́kitsiri, manan b́wotor een geneúwo bísh shiyewo b́falituwok'oniye b́kitsiri.
B́ wosh shintsi kayatse P'awlos K'orontositse teshts Ik'i moowunton b́detsts gonkewo kitst Ik'i maamanitse tuuts gac'ewonat t k'efoon eegosh t'engidek't boosh bíaanitsok'oni b́kitsir. Manton deshidek't b́fayman boon naandrone etonat t mano maants b́ jiishtsotse bísh shiyeets gene'úwo boosh b́kitsiri. Manats dabtnuwere Yhuditse fa'a krstiyaniwotsi tep'osh tewudi dowon boimetuwok'o boosh b́gawiyiri. B́ s'uwaatsi k'ot'uwotsatsnowere woshets b́woti jangosh t'intsets s'aamiyetsi jangosha aani b́dek'ir. K'orontositsi Ik'i moowutse ash ik ikuwots botoko ari woshetswotsi woshde't P'awlosi kooti wosheke ett bos'aamifo.
Jamon mas'aafan b́detstso
Shinshintsoni 1:1-11
P'awlosnat t K'orontositsi Ik'i mowun 1:12—7:16
Yhuditse fa'a krstiyaniwots gizi tep'o 8:1—9:15
P'awlos woshets woti alo b́ wottsok'osh aani b́dek'oko 10:1—13:10
B́ jamon 13:11-14
1
1 1:1 Wosh. 18:1 Ik' ettsok'on Iyesus Krstossh wosheets wottso P'awlosnat no eshuu T'imotiyosoke.
K'orontos kitotse fa'a Ik' moonat Akayiyin fa'a Krstiyani wotts ash jamwotssh.
2 No nihi Ik'oke, no doonz Iyesus Krstosoknowere s'aatonat jeenon itsh wotowe.
P'awlos Ik'osh b́t'intsts údo
3 Maarts nihonat kup' jam imet Izar Izewer, no doonz Iyesus Krstos nihi Ik'osh údo wotowe, 4 Noo Ik'oke nodatsiru kúp'iyon gond bek'otse beyiru jamwotsi kúp'sho no falituwok'o Ik'o noon no gond bek' jamotse kúp'shitwe. 5 Krstos gond bek'o ayidek'at no kayidek'tsok'on hank'o Krstosn kúp'eyo ayide'er datsituwone. 6 Noo gondo nobek'or it kúp'eyonat kashon daatsitute, no nokúp'iri itwere itkup'twok'owe. Kup'han b́datsewe no ats bodets gond bek'i naari k'amoon it itned'tsoshe. 7 Noo gond bek'o it kayok'o mank'o no kúp'ono it kayituwok'o no dantsosh itatsere nodetsts jángo kúp'e.
8 1:8 1 K'or. 15:3 T eshuwotso! Isiyi datskayotse no beyor no'ats bodts gond bek'o it danetuwok'o geefone, no'ats bodts gond bek'onuwere kurosh nofalitwoniyere bogo no'ats dihit b́ teshtsotse kashon beyosh nojangtso dab k'ut'dek're b́ teshi. 9 Mank'o k'iro no'ats angshetsok'owe noosh shiyeyat b́ teshi, jaman no'ats b́ boduwere no amaniruwo k'irts tizitu Ik'ona bako no took angon b́ woterawok'o nibn no dek'ishe. 10 Mansha bí noon hank'o een k'irosh betsit t'úp'er tawatse kashire, kashitwe, dabnwere b́ kashitwok'o bíne nojágiti. 11 It noosh Ik' k'onon it tep'o geyituwe, ayi ashuwots Ik' k'onatse tuutson noosh imets Ik' s'aatosh aywots udo t'intsitune.
P'awlos finosh bí ettso b́wonitsok'o
12 No it'et keewo haniye, hanwere ar b́ wotok'o no nibo gawitwe, k'osh ashuwotsnat bítsnooru itnton nobeets beyo Ik'oke nodek'ts S'ayinonat kááwatse tuutsone, han b́ wotuwere Ik' s'aatone b́ teshi bako ash dani telefonaliye. 13 Nababar t'iwintso it falit keewoniyere okoon k'osho eegoru guud'atsone, 14 no jangosh k'atso it dantsok'o mank'o s'eenon it danetwok'o amanitwe, manshowere doonzo Iyesus b́ weet aawor no itn noit'etuwok'o itwere noon it'etuute.
15 Keewann arik twottsosh gitoto it t'ak'ametuwok'owa etaat shin shino iti s'ilosh geeyatniye tteshi, 16 1:16 Wosh. 19:21 Itn s'ilosh tietwere Mk'odoniy datso maants it weeron t beshoronat bíyokere aanar twore b́ teshi, hank'onowere Yhud datso maantsan t sha'or taan it tep'etuwk'o gawatniye t teshi. 17 Hanowere t gawor t k'aliru danaw hake baka etirwok'o arefta itsha? Han t gawirwo iknon «ee, etonat iya'a» etaat ash gawirwok'o hake baka eton t k'altsok'o arefta itsha? 18 Ik'o amanek b́ wottsotse no nokeewirwo, «ee wee iya'a» etiru hake baka eton keeweyiru aap'ok'oyiyaliye. 19 1:19 Wosh. 18:5 Taanat Silasn T'imotiyosu itsh nonabtso Ik' na'o Iyesus K'rstosi «ee wee iya'a» etonaliye b́teshi, ernmó ee eto bín wotere. 20 Ik'o noosh b́ jangits jamo, «ee» etiruwo Krstosne, mansh Ik' mangosh Krstosn «Amen» no etiri. 21 Noo itnton Krstosats no kúp'ituwok'o woshtso Ik'oniye, noon galdek' futtso bíne, 22 Bík nowotok'o kitsit mahatabon no'ats gedtsona shino maants noosh b́ imet gaalosh no níbots S'ayin shayiro agitok'o woshdek't imtso bíne.
23 Taa K'orontos maants aanat woo t k'azitsi jango itn tshiyanirawok'o itsh maac'o keewatniye, hansh Ik'o gawosh s'eegetwe, 24 It it imnetiyon kúp' it wottsotse it itgeneúitwok'o itnton finituwone boko it imnetiyon iti azazeratsone.