Wosheetso P'awlos Gitl Wosho
T'imotiwos Maants
Kindo
P'awlos T'imotiyossh b́ guut'ts gitl woshan, P'awlos karnon bín tep'fonat b́ fini tooho wottso jawetso T'imotiwossh b́ izts izo detske, bogshdek't b́ iztsonu k'amoon b́kup'ituwok'owe, T'imotiwos izonat bín b́ kup'at b́ datstsotse Iyesus Krstos jangosh amaneyarr b́gawish, doo shishiyosh keewets keewonat taare shintsatsi dano kup'ide'er deshr dab gondbek'onat k'efoon bíats bíayiyalor, daniyonat doo shisshiyo nabi finatse b́kup'ituwok'owe b́teshi.
Bítsnor T'imotiyos bíatsokorb́dek'etuwok'o bísh keewetso dogikok'o keewiru datsmec'ron moosheriu moshoke b́wokituwok'owe, man naari keewo k'ebiruwotsi t'afiyoniyere okoon k'osho b́k'alituwo deshatse.
Jamanatse tuutson T'imotiwossh gawudek'o b́geyiyank'o teshtso P'awlos beyonat eegosh b́beyiruwok'o bítsnor b́ imnetiyo, b́k'amo, b́shuno, b́kup'onat b́gishewon bíats bodts gondbek'o bíkmankok'o b́shuutso b́shoyituwok'owa b́tesh.
Jamon mas'aafan b́detstso
Kindo 1:1-2
T'imotiwossh imets izo 1:3—2:13
Jeen taana danatse eti aawo b́woor amanetso wotarr daatsewo 2:14—4:5
Manoori teshst keewuwotsna et geyit bínjisheetuwots 4:6-18
Gúúpo 4:19-22
1
1 Iyesus Krstos weeron daatsets jangets kashi keewo keewetsok'on, Ik'o bí ettso Iyesus Krstossh wosheetso wottso P'awlosoke woshetsoniye.
2 Boree, shune na'o t naay T'imotiwossha, Niho Ik'oktsonat nodoonz Iyesus Krstosoki s'aatonat mhretiyo, jeenon neesh wotowe. 3 T'uwe aawon uni'aawo neesh Ik'o t k'onor neen gawat t nihots bok'altsok'o taawere maac' s'ayinon bísh tfiniru Ik'o udirwe. 4 Ni aac'uwo bateratse, neen be'er ayide'er gene'uwosh neen bek'o tewunirwe. 5 Niyoke fa'a arik wotts imnetiyo gawiruwee, mannaari imnetiman shinowere ni'indo Loyidaanat ni'ind Ewunk'eyoke teshke, niyoknowere b́beyok'o t'iwintsree. 6 Man jangosh t kisho ni'ats t gedor neesh imetsonat niatsotse taawok'o wotat beyiru Ik' imtso aaniy n deshiyitwok'o neesh gawirwe. 7 Ik'o noosh b́ imiye angonat shunikon, b́ took keewi shayira bako shati shayiraliye.
8 Eshe nodoonz jango gawosh jitsk'aye, b́ jangosh tipetso taan jitsk'aye, ernmó Ik'o neesh b́'imet angon doo shishiy jangosh taanton gond bek'o de'e. 9 Bí noo nofints sheeng finosh b́woterawo b́ took shunon b́ s'aatone noon b́ kashiy, s'ayinoshowere noon s'eegree, s'aatanowere ay duroniyere shino Iyesus Krstosn noosh imre. 10 Deeranwere noon woritso Iyesus Krstosn b́ waatsotse and be'ere. Bí k'iri ango tiitst dooshishiyon k'ir desha dúre dúre beyo noosh b́k'iitsi.
11 Taawere doo shishiyan nabituwo, wosheetso, danifo wotat naashere. 12 Gond bek'anowere tiats b́bodir man jangoshe, eree koni ti'amantsk'o tdantsosh jitseratse, taash imets adar man aawu man b́ borfetso t kotetwok'o danre. 13 Tiyoke n shishts ar wotts aap'man ariyok'o woshde Iyesus Krstosn n detsts imnetiyonat shunon kore. 14 Neesh imets sheeng adarman noyitse beyiru Shayiri s'ayinon korde'e.
15 Isiya eteets datsatse beyiru jamwots taan k'az boamtsok'owo danfnee, hanotsisnwere Fegelosnat Hermogenesitse fa'ane. 16 Ik'o Onesifor meyitsi ashuwotssh mhretiyo ime, bíwere ayoto taan kup'shre, t tipetsatsnowere jitseratse. 17 Dab́ Romi eteets datsumadan b́ waatsok'on kup'dek' geeyat taan b́ daatsi, 18 Dúr s'uwi aawu manotso Ik'o bísh mhretiyo ime, Efesonn t beemanor awuk'o taash b́ fintsok'o nee n tookon sheengsh dek'at danfnee.