Handr Taara Woshetswotsi 1

Wosheetswots Fino

Kindo

Wosh nana'úwots fino Luk'as doo shishiyatse tuuka, Mas'aafan b́ kiistsiru keewo Iyesus shuutso shoydek't sha'efwots S'ayin shayiron jisheyat b́ jangosh keewiru dooshishi keewo «Iyerusalemn, Yhud datson, Semariy datson, datsi daarats» (1, 8) doo shishiwo awuk'on bobetsituwok'o keewone, Mas'aafan krstiyani wotar amano ayhudiwotsitse de'e tuur dats jamatsi ash jami imnetiyo b́ wotefetsosh awuk'on b́ gawuntsok'owo keewiruwu taariki mas'aafoniyee. Han guut'tso, krstiyaniwots Roomtso naashi naashonton wed'ewosh gitsotse k'od'o finerawu ashuwotsi bowoterwok'oonat krstiyani imnetiyo ayhudiwots imnetiyo iki s'ayin woshituwo b́wottsok'owo kitsosh ayi nokoreree.

Woshetswots fino, Iyesus Krstos jango keewiruwo doo shishiwosh keewets keewo b́ bodts beyokoke úniaawo gawunfere bí'amfook'onat Ik'i moo ned'iyetsok'o golit keez een een kayuwotsi matso falfe.

1. Krstiyani imnetiyo Iyesus daromaand k'az b́ tuwiyakon Iyerusalemitse dek'tuwetsok'o.

2. Israe'el dats jamats b́ bodtsok'o.

3 Roomno dabdek't Meditraniyi aatsi k'ari gúúratse fa'a datsuwotsatse b́ gawuntsok'o.

Wosh nanaúwots finotse p'ap'urat be'eyiruwo S'ayin shayiri fintso wotatni P'ent'ek'ost'eyi aawots Iyerusalemitse fa'a amantsuwotsats angnon b́ oot'tsok'o, mank'owere mas'afmanitse ik ikon k'aleets jamwotsitse b́be'etsok'oon S'ayin shayiro krstiyaniwotsnton et boon jishiruwotsi b́ jishiruwok'onat boon b́ kup'irwok'o bíts dab bodek'kiye. Yoots dúr t'iinf teshts krstani wosho k'osh k'osh nabuwotsitse tep'ook'wo araatniye t'inree, woshetswots finotse k'aleets finuwotswere woshman amantsuwots beyonat krstiyaniwots ik wotosh b́ detsts kup'o awuk'o een b́wottsok'oniye bokitsiri.

Jamon mas'aafan b́detstso

Gawu wotosh k'ani dek'i jango 1:1-26

A. Iyesus s'uwatse b́ imts tzaziyonat b́ jangits keewon 1:1-14

B. Yhud beyok b́shegro bezetso 1:15-26

Iyerusalemitse gawets gawo 2:1—8:3

Yhudnat Semaariytse gawets gawo 8:4—12:25

P'awlos wosheyat b́fiints fino 13:1—28:31

A. Wosheyar sha'a shintso 13:1—14:28

B. Iyerusalemitse kakuweetso 15:1-35

C. Wosheyar sha'a gitltso 15:36—18:22

D. Wosheyar sha'a keezltso 18:23—21:16

E. P'awlos Iyerusalemitse, K'isariyitsnat Romitse b́ tipetsok'o 21:17—28:31

1 Shiimetso Tewofloso!

T mas'aaf shintsotse Iyesus b́ fintsonat b́danits jamo guut're. T guut'uwe Iyesus b́ fino dek'b́tuwortsoon tuut 2 Daro maantsan b́ tuuts aawo b́ borfetso b́ fintsoniyee, daro maantsan b́ tuwwere gal b́ dek'ts woshetswotssh b́ tzaziyo shayiri S'ayini weeron b́ imihakoniye, 3 Ay gond bek'o dek't bí etiyak beyar beetk b́ wottsok'o kitsit weeron ayoto boosh b́ be'eyi, hab aawosh boats be'eyat Ik'i mengst jango boosh b́daniyi. 4 Bonton beyat b́móór hank'o ett boon b́ azazi, «Taa itsh t keewtsok'o nihokere itsh imosh jangiyetso korde'ere bako Iyerusalemitse keshk'ayere, 5 Yohanis aatsone b́gupi, itmo muk' aawoniye okoon shayiri S'ayinon gupetute.»

Iyesus daro maantsan b́tuwok'o

(Mar. 16:19-20; Luk'. 24:50-53)

6 Bowere ikoke ko'edek't bo befere, «Doonzono! n mengsto Isra'elsh aani n imet aawo andeya?» ett boaati.

7 Iyesusu hank'o ett boosh bí aaniyi, «Niho b́ took alon bí etts aawonat dúron it danosh falatste. 8 Ernmó shayiri S'ayino itats b́ oot'or ango daatsitute, manoor Iyerusalemn, Yhud dats jamatse, Semariyon, dats daar jamats b́ borfetso taash gawo wotitute.» 9 Hank'owere bí etiyakon bo bek'fere daro maantsan k'az b́ tuwi, dawunonuwere bín dek't bo awatsere ááts b́k'ri.

10 Bíwere daro maantsan b́ tuufere, boowere t'iwints dek't daromandan bo s'iilfere nas' taho tah dek'ts git ashuwots bo ganokere need' dek't, 11 «It Galil ashuwotso, eegishe need'dek'at daromatsan it s'iliri? Daro maantsan b́ dek'efere it bek'ts Iyesus haniye, daro maantsan b́ tuufere it bek'tsank'on aanar weetuwe» bo eti. 12 Maniyere hakon Debrezeyit gurats Iyerusalem maants k'azboaani, Debrezeyit guro Iyerusalematse sanbati aaw sha'ok'oyiye (ik kilometrok'oyiye). 13 Iyerusalemits waat bobeef mootse dambani k'aat'ots k'az bokeshi, boowere P'et'rosi, Yohansi, Yak'obi, Indriyasi, Filip'osi, Tomasi, Bert'elemiyosi, Matiwosi, Ilfyos naay Yak'obi, okooretso Simoonnat Yak'ob naay Yhudne. 14 Jametsanots úniaawo Ik' k'onosh ik nibona bokakuweefo, bontonuwere mááts ik ikuwotsnat Iyesus ind Mariyamn, mank'owere Iyesus eshuwots fa'ano botesh.

15 Manoor P'et'ros bale hiyo wotitu amants ashuwots taalotse need'dek't hank'o bíeti, 16 «Ti eshuwotso, Iyesusi detsts ashuwotsi jishtso Yhud jangosh, shin shin shayiri S'ayino Dawit noonon b́ keewtso S'ayin mas'aafi aap' s'eeno geyituwe. 17 Yhud noyitsi iko wotat finan noonton finosh taaweytniye b́teshi. 18 Ernmó ashaan b́ gond finon b́ daatsts gizmann datso keew b́dek'i, b́ baron diht gúp'unat b́ taalon kap'eyat bí anzro k'az b́keshi. 19 Keewanuwere Iyerusalemitse fa'a jamwotssh b́ daneyi, mansh datsmanúwere bo nooni keewon ‹Akeldama› et s'egeyi, b́ bitsonuwere ‹S'ats datsa› etee.

20 «Man b́ wottsonuwere dub mas'aafotse,

‹B́beyoko dats baash wotowe,

Konuwor bíyats beek'aye,

Aaninuwere b́ naashts naasho k'osh asho bíyatse de'ewutsowe›

Ett guut't teshetsotsnee.

21 «Eshe Doonzo Iyesus nodagotse bí ananori noonton towat teshtswotsitse, 22 Mank'o Yohans guproon tuut doonzo Iyesus daromaants b́ tuufetsi aawosh noonton teshtswotsitse ash iko noonton k'irotse tuwi jango gawo b́ woto geyituwe.»

23 Maniyere hakon git ashuwotsi bo t'intsi, boowere Bersabasi wee Iyost'osi eteefo Yosefnat Matiyasna botesh.

24 Hank'o ettnuwere Ik'o bok'oni, «Ash jami nibo dants doonzono! Gitetsanotsitse nmarat'tso aawi b́ woto noosh kitsuwe, 25 Nok'onirwonwere Yhud b́ tookon k'az bíamori k'azb́k'rts wosheetsots finan de'er b́ shaato shegrshosh wotituwo noosh nkiitsishee.» 26 It'onowere bo shap'i Matiyassh b́ keshi, Mansh bí tatse ik woshetswotsnton b́ taaweyi.

1:1 1:1 Luk'. 1:1-4

1:4 1:4 Luk'. 24:29

1:5 1:5 Mat. 3:11; Mar. 1:8; Luk'. 3:16; Yoh. 1:33

1:8 1:8 Mat. 28:19; Mar. 16:15; Luk'. 24:47-48

1:9 1:9 Mar. 16:19; Luk'. 24:50-51

1:13 1:13 Mat. 10:2-4; Mar. 3:16-19; Luk'. 6:14-16

1:18 1:18 Mat. 27:3-8

1:20 1:20 Dub. 69:25; 109:8

1:22 1:22 Mat. 3:16; Mar. 1:9; 16:19; Luk'. 3:21; 24:51