Wosheetso P'awlos Wosho
Gelati Ashuwots Maants
Kindo
Iyesus kashyo keewiru doo shishiyosh aap'etso jamoke nabfere ayhudi woteraw ashuwots dek'fere bo ami taawo «Kristiyani wotosh Muse nemo s'eentso geyifamó geyiratsa?» Etiru aato tuutni b́ tesh, múk'ef Isiyotsere Rom shirootsts Gelatyon fa'a Ik'i moowwotsitse «Asho Ik' shinatse b́ kááwish Iyesus s'uzn aman b́ woterawo Muse weeron imets nemo koto bín geyife» ett P'awlosi k'efiru ashuwots faa'ano bo tesh.
P'awlos Gelati ashuwots maants woshan b́ guut' dananatse tuutso dandts ashuwotsi arik wotts imnetiyonat Krstiyaniyi beyo maants jishosha, P'awlos Iyesus Krstossh woshek b́ wotoko kitsone b́ tuwi, woshetsosh bín s'eegtso Ik'a bako ash wotb́k'azok'onat b́ woshewonu Ayhudi woteraw ashuwotsok b́ wotok'o ik ikon b́ daniyi, s'uwaatsi k'ot'wotsitsnowere Krstiyani beyo Iyesusi amannon daatseyiru shunotse t'úptso b́ wotok'oniye b́ kitsiri.
Jamon mas'aafan b́detstso
Kindo 1:1-10
Wosheetso P'awlos b́ detsts alo 1:11—2:21
Ik' deeri doo shishiyo 3:1—4:31
Krstiyani nas' keshonat k'alosh boon geyit keewo 5:1—6:10
Gúúpo 6:1-18
1
1 Ashuwotsoke wee ash weeron b́ woterawo Iyesus Krstosnat bín k'irotse tizts Ik'o nihon wosheetso wotat wosheetso taa P'awlosoke, 2 Tiyoke fa'a eshú jamwotsoke Gelati Ik'i moowwotssh wosheetso.
3 No nihi Ik'okere, no doonz Iyesus Krstos s'aatonat jeenon itsh wotowe.
4 Gond dúranitse noon kashiyosh noko Izar Izewernat no nihi bí eektsosh Krstos no morrosh b́ tooko beshidek't b́ imi. 5 Dúre dúrosh b́ borfetso Ik'osh mango wotowe! Amen.
Arik wotts doo shishiyo Ik s'uzo b́wottsok'o
6 Krstos s'aaton itn s'eegtso Izar Izeweratse káári it k'aletsonat k'osh doo shishiyo maants it aantsok'o taane bí adiri. 7 Hanowere ti etir itn dandirwotsnat Krstos doo shishiyonowere k'uriyosh geyiru ik ik ashuwots bobetsosha bako doo shishiyoniyere shinoor ik s'uzee. 8 Wotowa eree noon wotowá, daratsi melakiyo wotowa, no nonabtsonton gáwet k'osh doo shishiyo itsh nabitwo c'ashek wotowe! 9 Haniyere shini t ettsok'o andoru aani eteetwe, it it dek'tsonton ik woteraw doo shishiyo konworu itsh b́ nabiyal c'ashek wotowe!
10 Bére, taa t geyir asho taan b́ úditwok'owemó? Ik'o taan b́ úditwok'owe? Himó ashuwotsi geneúshosh t geetsok'oweya bí ariri? Ashuwotsi geneúshosh t geyiyal Krstossh guutso woterawnk'e b́ teshi.
P'awlos wosheetso wotat b́s'egeyo
11 Ti eshwwotso! taa itsh tnaabts doo shishiyo ashoke daatsek b́woterawok'o it danetwok'o geefe. 12 Doo shishiyanowere Iyesus Krstosi taash bek'shi bako konoknoor de'atse, wee asho konwor taash daniratse.
13 1:13 Wosh. 8:3; 22:4-5; 26:9-11 Joots ayhudiwots imnetiyots tteshor aawk'o tbefok'o shishrte, Ik' moowwotsi weeralo gishefetsat t'afi bazoshe tnokorefooni. 14 1:14 Wosh. 22:3 Ayhudiwots imnetiyo kotósh tdúron teshts t jir Ayhudi jamwotsiyere bogfe b́teshi, nih nihwots niwosho okoori eeno detsfe b́teshi.
15 Ernmó tind maac'otse tbeefere Ik'o taan galbdek'i, b́s'aatonowere taan s'eeg b́dek'i. 16 1:15-16 Wosh. 9:3-6; 22:6-10; 26:13-18 Ik'i ash woterawots b́ naay jangosh doo shishiyi aap'o t shishitwok'o Ik'o b́ naayi taash kitsosh b́geyor taa kontonwor shiyeratse, 17 Taayere shin teshts woshetswotsi gonkeyono Iyerusalem maants amatse, ernmó shin Araawi datsomants k'az tiami, ando aaninwere Demask'o maantse k'az tiaani. 18 1:18 Wosh. 9:26-30 Maniyehakowere keez natoniye hakon Keefi eteefo P'et'rosnton daneyosh Iyerusalem maants ti ami, manoknowere bínton tatse úúts aawo tteshi. 19 Doonzo eshu Yak'obi tbek'i bako wosheets k'oshwotsitse konnor be'atse.
20 Itsh tguut'irwan kooto b́ woterawok'o Ik' shinatse itsh katsidek' danirwe.
21 Maniyere hakon Soriyi datsonat Kilk'i datso maants tiami. 22 Yhud Datsatse fa'a Krstos Ik'i moowwots t shiitso bek' danakne boteshi. 23 Bo boshishtsonu «Bali noon giishat teshts asho bali t'afiyosh b́geyiru imnetiyo and b́nabiri» etirwoniye. 24 Ti atse tuutsonowere Ik'o boúdi.