MAHTEA
Yuk Thangkdaw
Pyenhlüma
Mahtea yuk Thangkdaw naw Jesuh cun khyütama kümceinak küikyan Bawi ni. Ani cun Cangcim kphyüma kcün üng a khyang hea veia a khyütama kümcei lawnak ni. Ahina thangkdaw hin Judah he ksunga hmi law lü a xüngseia phäh, Judah khyang mjü he phäh däk am ni lü, khawmdek vana phäha kyaki.
Mahte naw Jesuha hminak law üng cutei lü Baptican a khannak, hlawhlepnak a khamnak, a ngthu pyen he, a jah mtheimkhawng he, ja Kalilea a jah mdawnak be naküt hnu ma ngdawih theikia a jah tak mi hmuki. Acun käna Jesuh Kalile üngka naw Jerusalema a kdungnak ja akpäihnaka pat, ami hnimnak ja a thawhnak be naküt a jah yuk päih.
Ahina thangkdaw üng Pamhnama thum pi kpyahnak thei johit taki Saja Kdäm säih, Pamhnama Khawa mawng jah mtheimthangki cun Jesuh ni tilü ng'yuki. A jah mtheimthangnak üng aktunga mjü mhmaa mi hmuki: (1) Mcunga ngthu mthehnak cun: Xüngsei ning, pawhmsah vai mta he, dawkyanak ja Khankhaw Pe khyanga thawnnak theia phunkam am sängeiki (Chapter 5-7); (2) A hnukläk leinghngih he üng khut ami pawh vaia mawng a jah mthehnak (Chapter 10); (3) Khankhaw Pea mawng a msuimcäpnak he (Chapter 13); (4) Hnukläka thawnnaka mawng a jah mtheinak (Chapter 18); ja (5) akpäihnaka kcün a pha law vai ja Khankhaw Pea pha lawnak vaia mawng he (Chapters 24-25) cun ahina thangkdaw üng mi jah hmuki.
Amawng Ktawi he
Jesuh Khritawa ksawn ja a hminak (1:1—2:23)
Baptican Johana Khut binak (3:1-12)
Jesuha Baptican khannak jah hlawhlepnak a khamnak (3:13—4:11)
Kalilea Jesuha khut pawhnak (4:12—18:35)
Kalile üngka naw Jerusalema a cehnak (19:1—20:34)
Akpäihnaka khyün üng Jerusalem mlüh K'um ja a pipeia a awmih (21:1—27:66)
Bawipaa a thawhnak be ja a ngdangnak hü (28:1-20)
1
Bawi Jesuha ksawn
(Lk 3:23-38)
1 Hin cun Davita capa, Abrahama capa, Jesuh Khritawa ksawn tähnak cajina kyaki. 2 Abrahama ca Isak, Isaka ca Jakop, acunüng Jakop naw Judah ja a bena he a jah canak. 3 Judah naw Tamari am Pereh ja Sherah a jah canak, Pereh naw Heron ca na lü, acunüng Heron naw Ram a canak. 4 Rama ca Aminadap, Aminadapa ca Nashon, Nashona ca Salmon. 5 Salmon naw Rahap am Bozah a canak, Bozah naw Rutah am Obet a canak, Obet naw Jise a canak.
6 Jise naw Sangpuxang Davit a canak. Sangpuxang Davit naw Sangpuxang Solamon a canak, a nu cun Urijaa khyu Davit naw a khämbea kyaki. 7 Solamona ca Rehobawm, Rehobawma ca Abijah, Abijaha ca Asa. 8 Asaa ca Jehosaphat, Jehosaphata ca Jehoram, Jehoram naw Usia a canak. 9 Usiaa ca Jotham, Jothama ca Ahaz, Ahaza ca Hezakiha kyaki. 10 Hezakiha ca Manaseh, Manaseha ca Amon, Amona ca Josiah. 11 1:11: 2Sang 24:14,15; 2Khro 36:10; Jer 27:20Isarel he jah man u lü Babalunga ami jah cehpüi, acun k'um üng Josiah naw Jekhonih ja a bena he a jah canak.
12 Babalunga ami jah cehpüi käna Jekhoniha ca Shaltilah, Shaltilaha ca Zerubabel. 13 Zerubabela ca Abiud, Abiuda ca Eliakim, Eliakima ca Azora kyaki. 14 Azora ca Zadok, Zadoka ca Achim, Achima ca Eliud. 15 Eliuda ca Elezar, Elezara ca Matthan, Matthana ca Jakopa kyaki. 16 Acunüng Jakopa ca cun Josep, Mariha ceia kyaki, Marih cun Khritaw Mesijah ti Jesuha nua kyaki.
17 Abraham üngka naw Davit cäpa ksawn xaleikphyü lawki. Davit üngka naw Babalung mpya vaia ami jah cehpüi cäpa ksawn xaleikphyü lawki. Acunüng Babalung mpya üngka naw Messijah hmi law cäpa ksawn xaleikphyü lawki.
Jesuh Khritawa hminak
(Lk 2:1-7)
18 1:18: Lk 1:27Jesuh Khritaw a hmi lawa mawng cun hikbaa kyaki. A nu Marih cun Josepa khyu vaia ami mkhyäp käna, atänga am ani awm ham üng, Marih cun Ngmüimkhya Ngcim naw a mpyaisak. 19 A cei vaia Josep cun khyang ngsungpyuna kya lü, khyang he maa Marih cun am luthui hmaiset hlüsak lü, ampyua hawih be khaia büki. 20 Acunüngpi, acukba a ngaih k'um üng, a ngmang üng Bawipaa khankhawngsä ngdang vai lü, “Davita capa Josep, Marih na khyunak vai käh cäia. Isetiakyaküng a mpyai hin ta Ngmüimkhya Ngcima mpyaisak ni. 21 1:21: Lk 1:31Ani cun kpamicaa ca khai, a khyang he ami mkhyekatnak üngkhyüh jah küikyan khaia kyase a ngming cun Jesuha na sui khai,” a ti.
22 Ahina mawng cun Bawipa naw Sahma he üngkhyüh a pyen khawi a kümnak vaia kyaki. 23 1:23: Hesa 7:14 (LXX)Pamhnama ngthu ta, “Teng ua, nglamica mpyai law lü, cangpyang ca na law khai, a ngming cun Imanuelaha sui law khai he,” ti hlü ta, “Pamhnam cun mi hlawnga awmki,” tinaka kyaki.
24 Josep cun ip lü a let law üng, Bawipa khankhawngsä naw a pyena kba Marih a khyunak. 25 1:25: Lk 2:21Acunüngpi, Josep ja Marih cun Marih a camah veia alanga am ip khawi ni. Josep naw hnasena ngming cun Jesuha a sui.