Ikitaabo kyoꞌmuleevi
Mika
Indangiriro
Yiki kitaabo, kiyerekiini ubuligo bwaꞌbaleevi beꞌbibeesha. Si Rurema, yehe aloziizi kwaꞌbandu bakizi girirana íbikwaniini, banabe bali mu kejererana mu kati koꞌbutuudu.
Uyo Mika akatanga ubuleevi kwo Masiya agabutirwa mu kaaya keꞌBetereheemu.
Muziizi muguma gwiꞌsikamiro, guli mu Mika 6.8: «E mundu! Si keera Nahano akubwira ngiisi íbiri biija, na ngiisi byo akuloziizi kwo. Aloziizi ukizi girirana íbikwaniini, unabaagage ukuuziri ukukejererana, unakizi yerekana ubutuudu imbere lyage.»
Íbiri mwo ku bwofi
a) Ngiisi kwaꞌBahisiraheeri naꞌBayuda bagaahanwa (1.1–7.7)
b) Ubwami bwa Rurema bwo bugaahima byoshi (7.8-20)
1
1 Ino ndumwa, Nahano akagiheereza umuleevi Mika weꞌMoresheeti ku kyanya mwami Yotamu, na mwami Ahaazi, na mwami Hezekiya bâli twaziri i Buyuda. Ku yikyo kyanya, Mika âli kizi bona amabone hiꞌgulu lyeꞌSamariya na hiꞌgulu lyeꞌYerusaleemu.
Abahisiraheeri bahanwa
2 E bandu mweshi mwe muli mu kihugo! Yuvwi!
Na byoshi íbikiri mwo! Mundegage amatwiri!
Nahano Rurema, agweti agamùlega mu nyumba yage nyeeru.
3 Nahano agweti agashonooka ukulyoka imwage mwiꞌgulu,
halinde ku marango, gira akizi gagenda kwo.
4 Amalambo gakoli gweti gagajongoloka mwiꞌdako lyaꞌmagulu gaage,
iri ganahingira mu tubanda, nga bulembo úbwajongoloka.
Ganali nga miiji ágali mu golomba ku higangazi.
5 Na íbitumiri biri kwokwo, bwaꞌBahisiraheeri, beene Yakobo bagweti bagaagira ibyaha.
Ee! Biri hiꞌgulu lyeꞌbyaha byeꞌkihugo kyabo kyoshi.
Aaho! Nyandagi útumiri Abahisiraheeri bakahuna?
Ka batali bandu ba mu kaaya kaabo kahamu keꞌSamariya?
Abayuda nabo, bagweti bagayikumbira imigisi hayi?
Ka mutali mu kaaya kaabo keꞌYerusaleemu?
6 Kwokwo, ngahindula i Samariya ibe ndundo yaꞌmabuye.
Injira zaayo, leero zigalimwa, banakizi byala mweꞌmizabibu.
Amabuye ágâli biisirwi mu nzitiro, ngagahirikira i kabanda,
halinde indaliro zisigale bwanuula.
7 Imigisi yamwo yoshi, igahoojwa-hoojwa.
Na ngiisi byo bâli kizi gitangira, ngabijigiivya noꞌmuliro.
Iyo migisi yoshi, ngagishereeza.
Balya bandu beꞌSamariya, si bakalonga ifwaranga ku bushule bwabo!
Aaho! Si zeezo fwaranga, zo zigaaba mbembo zaꞌbandi bashule.
Umwizingeerwe muhamu gwa Mika
8 Hiꞌgulu lya yubwo buhanya, ngagongeera noꞌkulira.
Na ngizi genda bukondwe, buzira kuyambala ibiraato, kandi iri mirondo yoshi.
Ngakizi moka nga nyambwe,
na ngizi gongeera nga nafufulu.
9 Si ikihando kyaꞌbandu baani, kitagaki kira.
Yikyo kihando, keera kikahikira i Buyuda,
halinde ku nyiivi zaꞌkaaya keꞌYerusaleemu.
10 Guno mwazi, utakolwe kwo wagubwira abatuulaga beꞌGaati.
Kiri noꞌkulira, mutakizi lira.
Haliko, mukizi yivuruguuza mu luvu lwa mu kaaya keꞌBeeti-Ryafura,
mu kuyerekana ngiisi kwo mukoli shengusiri.
11 Mwe mutuuziri i Shafiiri, ikyanya mugatwalwa i mahanga,
mugagenda mukola bukondwe, munakoli teziibwi ishoni.
Abatuulaga beꞌZanaani balahiiri kwo batagahuluka mu luzitiro lwabo.
Abandu beꞌBeeti-Hezeeri, kundu bagweti bagaalira,
si ndaabwo butabaazi bagalonga.
12 Abandu beꞌMarooti, kundu bagweti bagalindirira kwo batabaalwe,
si bagalonga ubululu naaho.
Ikihano kya Nahano, kigahikira halinde ku nyiivi zeꞌYerusaleemu.
13 Mwe batuulaga beꞌLakishi! Mugirage mulingaanie ifwarasi ziinyu naꞌmagaare giinyu giꞌzibo, gira mupuumuke.
Mu Bayuda booshi, mwe mukatee kulikira Abahisiraheeri mu buhuni bwabo.
Ee! Ibyaha byaꞌBahisiraheeri, byâli kizi boneka mu kati kiinyu.
14 Ku yukwo, museezere beene Moresheeti-Gaati mu kubaheereza indengu.
Ndaabwo butabaazi bwaꞌbaami beꞌHisiraheeri bagalongaga mu kaaya keꞌHakizibu.
15 Mwe mutuuziri mu Maresha, ngaleeta indwani ziyiji yabiira ikihugo kiinyu.
Mwami waꞌBahisiraheeri, kundu ashuba noꞌbulangashane,
haliko agagendi yibisha mu lwala lweꞌHadulaamu.
16 E Bayuda! Mubegeese imishaku yinyu mu kuyerekana umwizingeerwe.
Si mukola muganyagwa abaana biinyu bakundwa.
Muyibege, halinde amatwe giinyu gashushaane nga ga ngukuma.
Si abaana biinyu, bagatwalwa imbira i mahanga!