1 Owʼekitiisya eino oTeefiiro, abantu bangi beewaireyo okulangaasira nakusani nʼokuwandiika ebintu oYesu ebiyakolere mwiswe abantu ngʼali oku kyalo. 2 Bawandiikire bintu ebyo, badi ababiboneireku nakimo okuzwa oku ntandiika yaabyo ebibatukobeire, era ni bakola omulimo ogwʼokusalaania ekibono kya Kibbumba. 3 Zena owemmalire okunoonererya nakusani byonabyona oYesu ebiyakolere okuzwa oku ntandiika yaabyo, mmboine nti kisa okubikuwandiikira nga mbicaanire kusani ngʼowebyabire bibbaawo. 4 Kinu nkikolere, kaisi omanyire nakimo amazima gʼebibono abantu abamo ebibakwegeserye.

5 Omu biseera okabaka oKerode oweyabbaire nga niiye afuga oBuyudaaya, wabbairewo okabona ogubeetanga bati Zakaliya, owʼomu kibbula kya bakabona ekibeetanga ekyʼAbbiya. OZakaliya yabbaire nʼomukaliwe nga bamweta Erizabbeesi, nga bonabona bʼomu lulyo lwa kabona Alooni eyasookeire nakimo omu Bayudaaya. 6 OZakaliya nʼomukaliwe babbaire batuukirirye omu maiso ga Kibbumba, nga babulaku ekyokubanenya omu byʼaMateeka era nʼebiragiro bya Musengwa oYesu byonabyona. 7 Neye babbaire badambaku omwana olwakubba Erizabbeesi yabbaire mugumba, tete bonabona ni babba nga bakairiire ino.

8 Lumo, oZakaliya yabbaire akola omulimogwe ogwʼobwakabona omu maiso ga Kibbumba, ngʼekibbulakye ekyabakabona ekiyabbairemu niikyo ekiri omu kiiwu. 9 Ngʼenkola ya bakabona oweyabbaire bamulondere na kalulu okwingira omu kifo ekyeru, aduunyirye obubbaani. 10 Omu kiseera kyʼokuduunyirya obubbaani, abantu bonabona ababbaire bakumbaine, babbaire nza nga basaba oKibbumba.

11 Awo omalaika wa Musengwa ngʼayemereire oku lubba lwʼengalo endiiro olwʼekyoto kyʼobubbaani nʼabonekera oZakaliya. 12 OZakaliya oweyamuboine ni yeerinduka, entiisya nʼemukwata. 13 Omalaika nʼamukoba ati, “Zakaliya tiwaatya, olwakubba oKibbumba awuliire okwegairirakwo; omukaliwo Erizabbeesi yalikubyalira omwana mwisuka, nʼomwerula bati, Yokaana. 14 Walisiima nʼosangaala ino, era nʼabantu abandi bangi balyesunga olwʼokumubyalakwe, 15 olwakubba yalibba mukulu omu maiso ga Musengwa oKibbumba. Tiyalikombaku mwenge gwʼemizabbibbu, newankubbaire ekiteemeerya ekindi kyonakyona. Balimwizulya oMwoyo oMweru ngʼakaali nʼokuzwa omu kida kya maaye. 1:15 Kub 6:3 16 Yaliirya aBaisirairi bangi eeri oMusengwa oKibbumba waabwe okuzwa omu kibbikibbi. 17 Balimuwa omwoyo nʼobwezye ngʼEriya ebiyabbaire nabyo, era niiye eyalyesooka oMulonde wa Kibbumba omu maiso nʼayaba ngʼalaabba eeri abantu okwiryayo emyoyo gya baiteeye bʼabaana eeri abaana baabwe. Era yaliirya abantu abajeemera oKibbumba omu nzira yʼabantu abasa, nʼategeka abantu okukuumirira oMusengwa.” 1:17 Mal 4:5-6

18 Awo oZakaliya nʼabuulya omalaika ati, “Ekyo nze mpezya ntya okukikakasa? Nze neekaiririire, nʼomukali wange yena mukaire ino.”

19 OMalaika nʼamwiramu ati, “Ninze oGabudyeri, ayemerera buliijo omu maiso ga Kibbumba nga mmuweererya, era niiye antumire okutumula na iwe, nʼokukukobera amawuliro ganu amasa. 1:19 Dan 8:16; 9:21 20 Aale atyanu ngʼowobuusabuusire ebinkukobeire, ebyalibbaawo ngʼekiseera kyabyo kituukire, oyaba kweigala omunwa, obbe nga toyezya kutumula, paka oku lunaku ebyo olubyalibbeerawo.”

21 Omu kiseera ekyo, abantu babbaire bakuumiriire oZakaliya, era nga beewunya ekimulwisirye eino omu Yeekaalu. 22 Oweyawulukire nandi nʼayezya okutumula nabo, ni bamanyica bati wabbairewo ekinene ekyaboine omu Yeekaalu. Olwʼobuteezya kutumula, nʼabakoberanga ebintu mu kugerya-bugeri, era nʼasigala ngʼomunwa gwebbuunire.

23 Awo enakugye egyʼokuweererya ngʼokabona omu Yeekaalu owegyawoireku, nʼazwa e Yerusaalemi nʼakanga e wuwe. 24 Owewabitirewo ekiseera, Erizabbeesi omukaliwe nʼasuna ekida, era nʼamala emyeri mitaanu nga tabbutuka omu bantu, ngʼakoba ati, 25 “OMusengwa oKibbumba niiye anjezyesyerye okusuna ekida, nʼankwatira ekisa omu kiseera kinu, nʼantoolaku okuswala okwʼobugumba okwembaire nakwo omu bantu.”

26 Erizabbeesi yabbaire yankamala emyeri mukaaga ngʼali kida, oKibbumba nʼatuma omalaika oGabudyeri omu kibuga kyʼe Naazaleesi ekyʼomu kitundu kyʼe Galiraaya, 27 eeri omwala omuguna, eriinalye bati Malyamu. Omwala oyo yabbaire aikiriirye okufumbirwa omusaiza ogubeeta oYusufu, omwizukulu wa kabaka oDawudi. 1:27 Mat 1:18 28 OMalaika oweyatuukire egiri omwala oyo, nʼamukoba ati, “Nkusugiirye ino, era nkumanyikisya nti oli nʼenkabi mpitiriri. Era oMusengwa ali na iwe!”

29 OMalyamu ni yeeraliikirira ino olwʼebibono ebyo, era ni yeebuulya omu mwoyogwe ekibitegeeza. 30 Neye omalaika nʼamukoba ati, “Malyamu tiwaatya, olwakubba oKibbumba akuwaire enkabi. 31 Oyaba okubba ekida, obyale omwana mwisuka, era bamwerule eriina bati Yesu. 1:31 Mat 1:21 32 Yalibba wa bwezye, era balimweta Mwana wa Kibbumba oNambulaku aMwagaagana. OMusengwa oKibbumba yalimuwa okubba kabaka ngʼozeizawe oDawudi. 33 Yalifuga abaizukulu ba Yaakobbo emirembe gyonagyona, era obwakabakabwe tibwakuwaawo.” 1:32-33 2Sa 7:12,13,16; Isa 9:7

34 OMalyamu nʼabuulya omalaika ati, “Ekyokubba ekida kyabbaawo kitya, nga timbangaku nʼomusaiza?”

35 OMalaika nʼamwiramu ati, “OMwoyo oMweru yalikwikaku, era amaani ga Kibbumba oNambulaku aMwagaagana ni gakumaamira. Kale omwana oguwalibyala yalibba mweru, era balimweta Mwana wa Kibbumba. 36 Era nʼekindi, omugandawo Erizabbeesi, newankubbaire nga bamwetanga omugumba, era nga atyanu mukaire, neye gunu mweri gwa mukaaga ngʼali kida. Era yena ayaba okubyala omwana mwisuka, 37 olwakubba eeri oKibbumba mpaawo kintu ekiteezyeka.” 1:37 Nta 18:14

38 Awo oMalyamu nʼamukoba ati, “Nze ndi muweererya-buweererya wa Musengwa oKibbumba; kale njikiriirye, kibbe ngʼowookobere.” Awo omalaika nʼalekaawo oMalyamu ni yeeyabira.

39 Omu naku egyo, nga bankumala okumukobera ebintu ebyo, oMalyamu nʼasetuka, nʼayaba mangu omu kibuga ekiri omu kyalo ekyo ekyʼensozi, ekyʼe Buyudaaya. 40 Era yaabire mu nyumba ya Zakaliya, nʼasugirya omukaliwe Erizabbeesi. 41 Neye Erizabbeesi oweyawuliire oMalyamu ngʼamusugirya, omwana nʼasambasamba omu kida kyʼErizabbeesi. Era Erizabbeesi nʼaizula oMwoyo oMweru, 42 nʼaminkirira ati, “OKibbumba akuwaire iwe enkabi okukiraku abakali abandi bonabona, nʼomwana oguwalibyala ali nʼenkabi. 43 Kale nze onu nsunire ntya ekitiisya kinu, dala omaaye wa Musengwa wange nʼaiza okuncaalira? 44 Owempuliire eigonolyo ngʼonsugirya, omwana nʼasambasamba omu kida kyange olwʼeisangaalo eryabbaire nalyo. 45 Oli wʼenkabi ino iwe eyaikirirye ati ebyo oMusengwa ebiyakukobere byalituukirira.”

46 Awo oMalyamu nʼakoba ati,

56 OMalyamu yamalire nʼErizabbeesi emyeri ngʼemisatu, kaisi nʼakanga e wuwe.

57 Awo enaku gyʼErizabbeesi egyʼokubyala ni gituuka, era nʼabyala omwana mwisuka. 58 Abaliranwabe nʼabagandabe ni bawulira ngʼoMusengwa owamuwaire enkabi enyingi, era ni basangaalira aamo naye.

59 Awo omwana oweyayererye enaku omunaana, abantu ni baiza oku mukolo ogwʼokukomola omwana onu. Babbaire baaba kumwerula iteeye oZakaliya. 1:59 Lee 12:3 60 Neye omaaye wʼomwana nʼakoba ati, “Kadi, nze tinjikirirya eriina eeryo! Omwana bamwete bati Yokaana.”

61 Kale era abaliranwabe ni bamukoba bati, “Ekyo kibba kitya, ngʼomu ba lulyolwo mpaamu kadi moiza ogubeeta eriina eeryo!”

62 Awo ni bakolesya okugerya, ni babuulya iteeye wʼomwana eriina eryataka beerule omwana. 63 OZakaliya nʼasaba ekipande ekyokuwandiikaku, nʼawandiika ati, “Eriina lyʼomwana niiye oYokaana.” Awo bonabona ni beewunya. 64 Era nʼamangu ago omunwa gwa Zakaliya ni gubbunulukuka, nʼolulumirwe ni lusibinduka, nʼatandiika nʼokutumula ngʼawuuja oKibbumba. 65 Awo abantu bonabona ababbaire babaliraine ni batya. Era ebibono ebyo byonabyona ni bisaalaana omu kitundu kyonakyona ekyʼe Buyudaaya ekyʼensozi ekyo. 66 Kale abantu bonabona abawuliire ebintu ebyo, ni bibaingira omu myoyo, era ni bakoba bati, “Olwo omwana onu yalibba muntu wʼengeriki?” Bakobere ekyo olwakubba baboine obwezye bwa Musengwa nga buli oku mwana oyo.

67 Awo oZakaliya oiteeye wa Yokaana, nʼaizula oMwoyo oMweru, nʼawa obunaabbi, ngʼakoba ati:

80 Omwana nʼayaba ngʼakula, era nga yeeyongera amaani omu mwoyo, nʼabbanga omu kitera paka oku lunaku oluyeeragisiirye eeri abantu bʼe Isirairi.