1 Samuel
Ya meippanggep eyan libluh ni nemangulun Samuel
Huyyan nemangulun libluh Samuel ey peamta tudda hu neipahpahding eman ni ketaggun Samuel. Hi Samuel hu nanggillig ni huwet ni nengipappangnguluddan helag Israel. Hi-gatu dama hu nengiehneng idan helag Israel nan Apu Dios.
Nem ay nginhay da hi Apu Dios et papilit dan mahapul da patul ni man-ap-apun hi-gada heniddan edum ni bebley. Nem anin ni hanniman ni nginhay da hi Apu Dios, et in-abulut tun meippahding etan daka ibbaga et putuken tu hi Saul ni pampatul da. Ma-nun laputu tep kayyaggud hi Saul ni patul, nem entanni ey nambalin ni kamampahhiyya et eleg tu law u-unnuden hi Apu Dios.
Et humman hu, ninemnem Apu Dios e mahapul ni e-kalen tu hi Saul ni patul idan helag Israel, et ihullul tu hi David e tuka paka-u-unnudan emin hu pinhed Apu Dios. (13:14)
Ya nanggillig ni neitudek eyad libluh ey ya nengipelilligatan Saul nan hi David, tep kaum-ameh di kapengennappusin David idan buhul ni Israel. Ya hakey mewan ey kaum-ameh tep nandingngel hi David di emin di helag Israel.
Yahhuy hu neitudek eyad libluh:
1. Ya neiungngaan Samuel ni ya nan-ap-apuan tuddan helag Israel. (chapters 1–7)
2. Ya nampatulan Saul di Israel niya eleg tu pengu-unnudan nan hi Apu Dios. (chapters 8–15)
3. Ya neputukan David ni meihhullul nan hi Saul ni pampatul idan helag Israel niya nengipelilligatan Saul nan David. (chapters 16–30)
4. Ya neteyyan Saul. (chapter 31)
1
1 Wada etan hakey ni lakin helag Epraim e hi Elkanah ngadan tu e nambebley di Ramah di duntug ni Epraim. Hi Jeroham hu ametu e u-ungngan Elihu e u-ungngan Tohu e u-ungngan Sup e helag Epraim. 2 Huyyan hi Elkanah ey dewwa ahwa tu e di Hannah nan Peninnah. Wadadda u-ungngan Peninnah, nem hedin hi Hannah man endi u-ungnga tu.
3 Katootoon ni immegah hi Elkanah di Ramah ni limmaw di Siloh di baley Apu Dios et an mandayaw niya man-appit nan Apu Dios e Kabaelan tun emin. Yadda padidman ey di Hopni nan Pinehas e u-ungngaddan Eli. 4 Hedin nan-appit hi Elkanah nan Apu Dios, man tuka ippatalidda pamilyah tun detag. Hanhakkey hu patal ni tuka iddawat di Peninnah niyadda etan u-ungnga tu. 5 Nem hedin ya tuka iddawat ni patal Hannah man dewwa tep nakappinhed tu, anin ni endi u-ungnga tu tep impambalin Apu Dios ni nebasi. 6 Gapu tep nebasi hi Hannah ey kamekippilliw hi Peninnah ni impemined Elkanah, ey tuka pippihula niya tuka ba-iba-inga. 7 Humman hu kapehpehding nan hi Peninnah ni katootoon hedin limmaw idad baley Apu Dios di Siloh, et humman gaputun kanengngihin Hannah niya humman eleg tu pengnganni.
8 Et humman hu, kan Elkanah ni hi-gatuy “Hannah, entan nangih mu niya entan lelemyung mu. Pangan ka kuma. Kaw beken ni kekkeddukdul hu et-eteng ni impeminhed kun hi-gam nem ya hampulun lakin u-ungngam?”
9-10 Wadan pinhakkey hu negibbuh idan nengan di baley Apu Dios di Siloh ey immehneng hi Hannah et uma-allaw di pangil et mandasal. Nemahhig lemyung tu ey tagan tu nangih. Hi Eli e padi ey kamanyuyyuddung etan di yuddungngan tud neihnup di heggeppan ni baley Apu Dios. 11 Nansapatah hi Hannah di dasal tun Apu Dios e kantuy “Apu Dios e kabaelan tun emin, ang-ang mu anhan eya et-eteng ni nakka lelemyungi et baddangan muwak e bega-en mu! Dengel mu anhan eya dasal ku ma-lat idwatan muwak ni u-ungngak ni laki. Issapatah ku e ibbangngad ku metlaing ni hi-gam e Apu et hi-gatulli bega-en mun ingganah. Ey anin ni eleg mampepu-lit tep humman kei-ang-angan tu e indinel kun hi-gam e Apu.”
12 Yan nunman ni kapandasalin Hannah ey kaitettekel nan Eli e padi hu bungut tu. 13 Kaittenuttubbun Hannah hu dasal tu et kaman-etwietwib hu bibil tu nem endi kamedngel ni ehel tu. Et humman hu, kan Eli ey nebuteng. 14 Et kantun hi-gatuy “Kele kaka mambutteng ni um-alidya? Isiked mu hu mambuttebutteng.”
15-16 Kan Hannah ey “Eleggak mabuteng e apu ey eleggak manginuinum. Bekkennak ni lawah ni bii. Nakka mandasal tep anggehemmekkak katteg ngu gapuh etan ni kamekapkapyan hi-gak et humman nakka pan-iddasal nan Apu Dios.”
17 Kan Eli ey “Umlinggep ka kaya. Hi Apu Dios tayun helag Israel hu mengidwat ni muka ibbaga.”
18 Kan Hannah ey “Salamat e apu. Ma-nu et anhan hedin kayyaggud hu pannemnem mun hi-gak ni ingganah.” Immanemut hi Hannah et mangan e eleg law umlelemyung.
Ya neiungngaan Samuel et ya nei-kudan tun Apu Dios
19-20 Bimmangun idan dagah di Elkanah et ya pamilyah tun newa-waan tu, et mandayaw idan Apu Dios et han ida mambangngad di bebley dad Ramah.
Entanni ey nambutsug hi Hannah tep dingngel Apu Dios hu dasal tu. Nan-ungnga ey laki et ngadanan tun hi Samuel e ya keibbellinan tu ey ‘Nakdew nan Apu Dios’ tep kan Hannah ey “Kindew kun Apu Dios.”
21 Entanni ey nedatngan mewan hu tsimpuh ni lawwan di Elkanah et ya pamilyah tud Siloh ni an man-appit nan Apu Dios tep humman dedan daka ippenahding ni katootoon ey wada pay hu insapatah nan Elkanah ni tu i-appit nan Apu Dios, ey yan nunyan tsimpuh hu tu pengippahdingan. 22 Nem eleg makilaw hi Hannah ni nunyan tsimpuh. Kantun ahwatuy “Eggak mekillaw ni nunya. Hehgedek kephuan eyan gelang et hannak ali ilaw di baley Apu Dios di Siloh et idinel kun hi-gatu et manha-ad alidman ni ingganah.”
23 Kan Elkanah ey “Ngenamung ka, ipahding mu hu muka nemnemneman kayyaggud. Di deya ka tep et ngenamung alin kephuan eyan gelang. Hi Apu Dios hu umbaddang ni hi-gam ni mengippeamnun inhel mun hi-gatun ippahding mu.” Et eleg makilaw hi Hannah et ipappaptek tu etan u-ungnga tu.
24 Nelabah hu pigan toon ey naphu law etan gelang e hi Samuel et ilaw nan Hannah di Siloh di baley Apu Dios. Immalan hakey ni lakkitun bakan tellu toon tu, ya kagedwah ni sakuh ni alinah niya meinnum. 25 Ginibbuh dan wina-tek hu bakan in-appit dan Apu Dios, et ilaw da etan u-ungnga e hi Samuel nan Eli. 26 Kan Hannah ni hi-gatuy “Apu, kaw han-immatun muwak? Hi-gak la etan biin inang-ang mun immeehneng di deyan nandasal nan Apu Dios. 27 Indasal kun nunman nan Apu Dios e iddawtan tuwak ni u-ungngak et adyah hu indawat tu. 28 Yan nunya ey ibbangngad ku eya u-ungngak nan Apu Dios et hi-gatu ngenamung ni hi-gatu ingganah mepappeg biyag tu.” Negibbuh ungbal da et dayawen da hi Apu Dios.