1 Kakakteh ko, chakey ko a ipanakem dyinyo naparinaw dyirad kapoonan ta saw a minonot di Moyses. Myan sa tabo do aywanaw no demdem a pinangsirong dyira ni Āpo Dyos do kaychowa, as kan nanakey sa a namtang do Mabayaw a Tāw* 10:1 Eks. 14:15-31 a abaw nakaan-anwan da. 2 Maynamot do nakasirong sira no demdemaya ni Āpo Dyos kan iyaw nakabtang daw do tāw, ki akmay nabawtisaran dana sa tabo a nachirapa di Moyses a maynamot ta rinawat da a iyaw mangipangōlo dyira. 3 Komninan sa tabo so kanenaw a intoroh ni Āpo Dyos dyira.† 10:3 Eks. 16:1-31 4 As mininom sa tabo do ranomaw a pinakbod ni Āpo Dyos do asaw a bato.‡ 10:4 Eks. 17:1-7 As nawri a bato, ki pangārig di Kristo a mismo, ta iyaw oyod a nachirayay dyira a nanoroh dyira so tabo a machita da do kayan da do let-ang. 5 Ki aran komwan napariparin dyira, kārwan dyiraw dya chinahwahok no Dyos, as dawa, pinaychaharaharag na saw bangkay da saw do let-ang.

6 Sira pakono a tabo nyaw pagmididan ta do byay ta tan dyi ta sa chalakam marahet saya do lōbongaya a akma sira. 7 Dyi nyo pakono a parinen akmas pinarin dayan kadwan dyira a kapagdaydāyaw do didyosen. Ta akmas naitolasaw do Masantwan a Tolas a kāna, “Naydidisna sa a komninan kan mininom, as nakapayteytēnek da a tomnada§ 10:7 Tomnada sa do salapen no didyosen da. Eks. 32:1-6 do ragsak da.” 8 Paychakatekateh tabaw chakey no asi a akmas pinarin daw no kadwan saw a kapoonan ta do kaychowa. On, maynamot do dyaya a gatos da, nadiman dadwa poho kan tatdo a rībo dyira do irahem no asa karaw.* 10:8 Nom. 25:1-9 9 Masaw sobsoboken tabaw Āpo† 10:9 Mana “sobsoboken taba si Kristo.” Nom. 21:4-7; Sal. 78:18 a akmas pinarin daw no kadwan dyirad kapoonan tad kaychowa a nawriw dinimanan sira no karasaen saw. 10 Myan paw asa a ballāag dyaten. Maydabadabay taba a akmas pinarinaw no kadwan dyira, ta nawriw nanghapan na a tinoboy ni Āpo Dyos anghil naw a nangay a nangdiman dyira.‡ 10:10 Eks. 12:23; Nom. 16:41-50

11 Naparin sa tabo nyaya tan myan pagmididan da no kadwan saw a kapoonan tad kaychowa, as kan naitolas sa do Masantwanaya a Tolas tan myan pachinanawan ta sichangori. Ta ari ta na maybibyay do kapanawdyanaya no chimpo a makalo dana mabo.

12 As dawa, an iktokto nyo a matigser danaw kapaytēnek nyo do kapanganohed nyo, magannad kamo ta angwan madapodyi kamo. 13 Abaw solisog a mangay dyinyo a dya marawa ibtoran tawo. Asa pa, mapagtalkan Dyos kan ipalōbos naba a masolisog kamo so dyi nyo a marawa labanan. An masolisog kamo, torohan naynyo so pamosposan a domichan so panakabalin no solisog, ta an komwan, myan kapagibtor nyo tan dyi kamo a masolisog.§ 10:13 Heb. 2:18; 4:15; Sant. 1:13-14

14 Dawa, inyo a chadaw kwa sīt, pachibawan nyo kapagdāyaw do didyosen ah! 15 No chirin kwaya a itolas ko dyinyo sichangori, ki chirin do natwan dana so kapakaāwat. Dawa, inyo danaw mangikeddeng an kosto ibahey ko mana engga. 16 An machikomonyon ta, as an inoman taw bāswaya a indasalan ta so kapagyāman ta do Dyos, as kan koman ta yapo do nakchikchidaw a tināpay, ki nairāman tabawri do bindisyon a yapo do raya kan inawan ni Kristo do nakadiman naw do kros? Oyod abawri? 17 On, maynamot ta asa lang a tināpay pagbibinglayan taya, nyaw mangipaboya a māsa ta na a aran āro ta.

18 Chiban nyo dadakay daw no kapotōtan saw ni Israel. An machirāman sa koman so indāton daw do Dyos, ki ipaboya da a māsa dana sa a magdaydāyaw do Dyos. Oyod abawri? 19 Āngo chakey kwaya batahen dya? Ibahey kori a sibibyay didyosen saya kan myan sīrbi no kanenaya a naidāton dana dyira? 20 Aysa, engga! Iyaw nyaw chakey kwaya batahen: Siraw dya manganohed, ki Dyos abaw pakaidātonan no dāton da saya, an dya siraw dimonyo saw. As dawa, chakey kwaba a machihanghang kamo dyirad dimonyo. 21 Maparin nyo aba pachitoyotoyo a pachisisīt iyaw kaynom* 10:21 Binata na do chirin a Griego a, “Maparin aba inoman nyo bāso ni Āpo, kan sinpangan na,, bāso dan dimonyo.” nyo kan kakan nyos naidātonaw do dimonyo, as kan iyaw pakanaknakmanaw so nakadiman ni Kristo. 22 Samna! Makamwamomo an pangimōnen ta si Āpo Dyos. Mayīyit ta paro kan iya a kariten ta?

23 Myan saw kadwan dyinyo a makabata so nya a kon da, “Libri ako a mamarin so tabo chakey ko a parinen.” Oyod nawri, ki no atbay ko dyinyo, ki tabo aba chakey nyo, ki kaganayan nyo. Masaw a tabo aba kaparin, ki makasidong.

24 Machita a iktokto taw kapyan kakakteh ta, nawri aba lang iktokto taw bōkod ta kaganayan.

25 Siwayawaya kamo a michan so aran āngo a magātang a karni, ki paybiybinākel nyo aba yahahes an naidāton do didyosen mana engga. 26 Ta akmas naitolasaw do Masantwan a Tolas a kāna, “Si Āpo akin dyira so tana kan aran āngo a mimyan na.”† 10:26 Sal. 24:1; 89:11

27 An rarahen naynyo a machakan no asa a dyi pa manganohed, as kan mangay kamo, kanen nyo aran āngo a maidasar dyinyo. Paybiybinākel nyo aba yahahes an naidāton do didyosen mana engga. 28 Ki an myan mangibahey dyinyo a kāna, “Naidāton nawri a kanen do didyosen,” ki maynamot do kāsi nyo do nangibaheyaya, kanen nyo abaw nawri a mākan tan dyi nyo a mapaynyinan. 29 On, no chakey ko a batahen dya, ki kanen nyo abaw nawri maynamot do kapaybiybinākel no kakteh nyowaw kan maynamot aba ta madi do aktokto nyo, ta abaw sīrbi no kawayawaya nyo an tod nyo a pamaynyin so kapayngay nyo a manganohed.

Ki myan saw kadwan dyinyo a makabata so komwan a, “Na, āngo ta mapenpen chakey ko a maynamot do kapaybiybinākel no matarek a tawo? 30 An pagyamanan ko do Dyos aran āngo a kanen ko, myan pawriw mabatan tawo a machikontra dyaken do tayoka ko na nagyamanan?”

31 Iyaw nyaw atbay ko dyinyo do dawri a kapanahes: An myan aran āngo a parinen nyo, koman kamo mana minom kamo, parinen nyo pakono a tabo a pakaidayāwan no Dyos. 32 Mamarin kamo abas aran āngo a paynamotan da no Jodyo mana Dya-Jodyo mana tawo do iglisya a maygatos do Dyos. 33 Toladen nyo pakono yaken, ta ipasnek ko do tabo kaparin ko a pagostwan chakey daw no tabo tawotawo. Iyabaw kaganayan ko chakey ko, an dya iyaw kaganayan no kārwan tan mapalongo ko sa do kaisalakānan da.