ପିତରଙ୍କ ପ୍ରଥମ ପତ୍ର
ପିତର ରା଼ଚାମାନି ର଼ ଲମ୍ବର ଆ଼କୁ
ମୂଲୁ ହା଼ଡା
ପିତର ର଼ ଲମ୍ବର ଆ଼କୁ ପାଣ୍ତ୍ୱିଆ଼ତି ପିତର ରା଼ଚାମାଚେସି । ପିତର ଏ଼ୱାସି ଆମ୍ବାଆସି ଅ଼ଡ଼େ ଆମ୍ବାଆରାକି ତାନି ଆ଼କୁ ରା଼ଚିମାଚେସି ଏ଼ କାତା ୱେସାନା ତାନି ଆ଼କୁ ରା଼ଚାଲି ମା଼ଟ୍ହେସି । ଏ଼ୱାସି ଆମ୍ବାଆରାଇଁ ପୁଣ୍ମ୍ବି ମେସ୍ପି ଆ଼ଆତି ଲ଼କୁ ଇଞ୍ଜିଁ ଇଚେସି ଏ଼ ବାରେ କ୍ରୀସ୍ତଇଁ ନାମିତି ଲ଼କୁଣି ଆ଼କୁତା ୱେ଼କ୍ହେସି ୧:୧; ୧:୧୭; ୨:୧୧ । ଏ଼ୱାସି ତାନି ଆ଼କୁତି ପ଼ଡ଼ୱି ଆ଼ନାରାଇଁ ଏଲେକିହିଁ ୱେସ୍ତେସି ଏ଼ନାଆଁତାକି ଇଚିହିଁ ଏ଼ୱାରି ହା଼ରେକା ଦେବା ଇତାଲା ଆତାଲା ଦେ଼ସାଣା ହଣ୍ପି ଆ଼ହାମାଚେରି । ଇଚିହିଁ ଈ ଆ଼କୁ ଏଚର ବା଼ଗା ପା଼ୱୁଲ ଏପିସିୟ କୁଲମିକି ରା଼ଚାମାନି ଆ଼କୁ ଲେହେଁତାୟି, ହା଼ରେକା ଲ଼କୁ ନାମିମାନେରି ଏପିସିୟତି ଡା଼ୟୁ ର଼ ଲମ୍ବର ପିତର ପତି ଜୀସୁ କ୍ରୀସ୍ତ ଜାର୍ନାଆ଼ତି ୬୫ ବାର୍ସା ଡା଼ୟୁ ରା଼ସ୍କି ଆ଼ହାମାଚେ । ପିତର ଈ ଆ଼କୁତି ର଼ମଟି ରା଼ଚିତେସି, ଆମିନିଗାଟାଣି ଏ଼ୱାସି ବାବିଲନ ଇଚେସି ୫:୧୩ ।
ମିଙ୍ଗେ ରା଼ହାଁ କିହିଁ ଅ଼ଡ଼େ ସା଼କି ହୀହିଁ ଈଦି ଏ଼ ମାହାପୂରୁତି ସାତା କାର୍ମାମେହ୍ନାୟି ଇଞ୍ଜିଁ ପିତର ୱେସାନା ଈ ଆ଼କୁତି ରା଼ଚିତେସି ୫:୧୨; ୧ପିତ ୨:୧୧–୩:୭; ଏପିସି ୫:୧୮–୬:୯ ଅ଼ଡ଼େ କଲସିୟ ୩:୧୮–୪:୬ ହା଼ରେକା ରଲେଏତି କାତା ରା଼ସ୍କି ଆ଼ହାମାନେ । ଈ ବାରେ ତୀନିଗଟା ଆ଼କୁତା ଇଲୁ କୁଟମିତା ଆଣ୍ତ୍ୱି ଆ଼ହାନା ଡ଼ୟିନାୟି ଅ଼ଡ଼େ କାଜା ଲ଼କୁତି ମା଼ନୱି ଆ଼ହାନା ଡ଼ୟାଲି ଜା଼ପ୍ୱି ଆ଼ହାମାନେ । ଏଚିବେ଼ଲାତା ସା଼ସ୍ତି ୱା଼ନେ ତୀରିଆ଼ହାନା ମାଞ୍ଜାଲି ଏ଼ୱାସି କ୍ରୀସ୍ତଇଁ ନାମିତି ଲ଼କୁଣି ସା଼ସା ହୀହିମାନେସି ଏ଼ନାଆଁତାକି ଇଚିହିଁ ଜୁଗୁ ରା଼ନି ଦିନା ଡାଗେ ୱା଼ତେୟିଏ ୪:୧ ।
ପତିତା ମାନାୟି
୧. ପିତର ତାଙ୍ଗେ ୱେ଼କ୍ହା କଡିନାୟି ଅ଼ଡ଼େ ତାନି ଆ଼କୁତି ପ଼ଡ଼ୱି ଆ଼ନାରାଇଁ ୱେହ୍ନାୟି । ୧:୧-୨
୨. ଗେଲ୍ପି ଆ଼ନାୟି ବାରେ ଲ଼କୁତା଼ଣା ଏଜାମାନାକି ଅ଼ଡ଼େ ତାମି ଜୀୱୁ ଏ଼ନାୟି ଇଞ୍ଜିଁ ପୁଞ୍ଜାମାନାକି ଏ଼ୱାସି ମାହାପୂରୁଇଁ ଜହରା କିନାୟି । ୧:୩–୨:୧୦
୩. କ୍ରୀସ୍ତଇଁ ନାମିତି ଲ଼କୁ ଏ଼ନିକିହିଁ ଈ ଦାର୍ତିତା ନୀଡିନାୟି ଅ଼ଡ଼େ ଏ଼ନିକିହିଁ କି ଡକ୍ରା ଅ଼ଡ଼େ ଡକ୍ରି ଇଞ୍ଜାଁ ସା଼ୱୁକାରି ଅ଼ଡ଼େ ହ଼ଲେଏସି ନେହିଁକିଁ ଡ଼ୟିନେରି ଏ଼ କାତା ଏ଼ୱାସି ଜା଼ପ୍ନାୟି । ୨:୧୧–୪:୧୧
୪. ପିତର ଏ଼ୱାରାକି ସା଼ସ୍ତି ୱା଼ତିସାରେ ତୀରିଆ଼ହାନା ଡ଼ୟାଲି ସା଼ସା ହୀନାୟି । ୪:୧୨–୫:୧୧
୫. ପିତର ତାନି ଆ଼କୁ ରା଼ପ୍ନାୟି । ୫:୧୨-୧୪
୧
୧ ନା଼ନୁ, ପିତର, କ୍ରୀସ୍ତ ଜୀସୁ ତା଼ଣାଟି ପାଣ୍ତ୍ୱିଆ଼ହାମାନି ସୀସୁ, ପନ୍ତ, ଗାଲାତିୟା, କାପାଦକିୟା, ଆସିୟା ଅ଼ଡ଼େ ବେତନିୟାଁ ରା଼ଜିତା ଇତାଲା ଆତାଲା ବାସାଆ଼ହାମାନି ମାହାପୂରୁ ଆ଼ଚାମାନି ଲ଼କୁତାକି ଆ଼କୁ ରା଼ଚିମାଇଁ, ୨ ଆ଼ବା ମାହାପୂରୁତି ତଲିତି ବୁଦିତଲେ ସୁଦୁଜୀୱୁ ତଲେ ସୁଦୁ ଆ଼ହା ମା଼ନି ଗାଟାତେରି ଅ଼ଡ଼େ ଜୀସୁ କ୍ରୀସ୍ତତି ନେତେରି ଡ଼ାଞ୍ଜିୱି କିହାକଡାଲି ଆ଼ଚ୍ୱି ଆ଼ହାମାନେରି । ମିଙ୍ଗେତାକି ମାହାପୂରୁତି କାର୍ମାମେହ୍ନାୟି ଇଞ୍ଜାଁ ହିତ୍ଡ଼ି ଆ଼ପେ ।
ଜୀୱୁତି ବା଼ର୍ସୁ
୩ ମା଼ ପ୍ରବୁ ଜୀସୁ କ୍ରୀସ୍ତତି ଆ଼ବା ଅ଼ଡ଼େ ମାହାପୂରୁଇଁ ଜହରା; ଇଚିହିଁ ଏ଼ୱାସି ତାନି କାର୍ମାଟି ଜୀସୁ କ୍ରୀସ୍ତଇଁ ହା଼କିଟି ନିକ୍ହାନା ମାଙ୍ଗେ ପୁଃନି ଜୀୱୁ ହୀହାମାଞ୍ଜାନେସି, ଏ଼ଦି ମାଙ୍ଗେତାକି ନୀଡିନି ବା଼ର୍ସୁ ହୀହାମାଞ୍ଜାନେ, ୪ ଏ଼ଦାଆଁତାକି ମାହାପୂରୁ ତାନି ଲ଼କୁତାକି ଆମିନି ଦାରାଗାଟି ବ଼ର ଇଟାମାନେସି, ଏ଼ଦାଆଁ ବେଟାଆ଼ହାଲି ମା଼ର କା଼ପୁ କା଼ଚାମାନାୟି, ଏ଼ୱାସି ଲାକପୂରୁ ମିଙ୍ଗେତାକି ଏ଼ଦାଆଁ ଜାତ୍ନୁ ତଲେ ଇଟାମାନେସି, ଏମ୍ବାଆଁ ଏ଼ଦି ନସ୍ତ ଆ଼ଏ କି ୱା଼ଡ଼େଏ । ୫ ଆମିନି ଗେଲ୍ପିନାୟି ରା଼ନି ଦିନାତା ତ଼ଞ୍ଜାଆ଼ହାଲି କିୱିଆ଼ହାମାନେ, ଏ଼ଦାଆଁ ବେଟାଆ଼ହାଲି ତାକି ମୀରୁ ମାହାପୂରୁତି ବା଼ଡ଼୍ୟୁତା ନାମୁତଲେ ଜାଗ୍ରାତା କିୱି ଆ଼ହାମାଞ୍ଜେରି ।
୬ ଏ଼ଦାଆଁତାକି ମୀରୁ ରା଼ହାଁ କିଦୁ, ଆ଼ତିଜିକେଏ ନୀଏଁ ଗା଼ଡ଼େକା ତାକି ହା଼ରେକା ତାୟିପାରି କିନି ତା଼ଣାଟି ଦୁକୁ କସ୍ତ ବେଟାଆ଼ନାୟି ମିଙ୍ଗେତାକି ଲ଼ଡ଼ାଆ଼ନେ, ୭ ଏ଼ନିକିଁ ଗା଼ଡ଼େକା ନସ୍ତ ଆ଼ନି ବାଂଗାରା ହିଚୁତା ହୂଡିନି କିହାଁ ହା଼ରେକା ଦାରା ମୀ ତାୟିପାରି କିୱିଆ଼ତି ନାମୁ, ଏ଼ଦି ଜୀସୁ କ୍ରୀସ୍ତ ତ଼ଞ୍ଜାଆ଼ନି ବେ଼ଲାତା ମା଼ନି ତଲେ ଜହରାତି, ଗାୱୁରମି ଅ଼ଡ଼େ ମା଼ନି ବେଟାଆ଼ନାୟି । ୮ ନୀଏଁ ମୀରୁ ଏ଼ୱାଣାଇଁ ମେସା ହିଲାଆତି ଜିକେଏ ଜୀୱୁନ଼ହିଁ ମାଞ୍ଜେରି, ଇଞ୍ଜାଁ ନୀଏଁ ମେହ୍ଆତିଁ ଜିକେଏ ତାନି ତା଼ଣା ନାମାହାଁ ୱେସାଲି ଆ଼ଡାଆରେଟୁ ଗାୱୁରମିତି ରା଼ହାଁତା ୯ ରା଼ହାଁ ଆ଼ହାନା ଏ଼ ନାମୁତି ପା଼ଡ଼େୟି ଲେହେଁ ମୀ ଜୀୱୁତି ଗେଲ୍ପିନାଣି ବେଟାଆ଼ହାମାଞ୍ଜେରି ।
୧୦ ଈ ଗେଲ୍ପିନି କାତା ମାହାପୂରୁ ଅଣ୍ପୁତି ବ଼ଲୁ ୱେହ୍ନାରି ମ଼ନ ହୀହାନା ପାରିହିଁ ସିନିକିତେରି, ଆମ୍ବାଆରି ଏମିନି କାର୍ମାମେହ୍ନାୟି ମିଙ୍ଗେ ଆ଼ନାୟି ମାଚେ, ଏ଼ ଡା଼ୟୁତି କାତା ୱେସାହାଁ ତ଼ସାମାଚେରି, ୧୧ କ୍ରୀସ୍ତତି ଦୁକୁ ବେଟାଆ଼ନାଣି ଇଞ୍ଜାଁ ଅ଼ଡ଼େ ଡା଼ୟୁତି ଗାୱୁରମି ବେଟାଆ଼ନାଣି ନ଼କେଏ ପାର୍ମାଣା ହୀନାସି ଇଞ୍ଜାଁ ଏ଼ୱାରିତା଼ଣା ମାନି କ୍ରୀସ୍ତତି ଜୀୱୁ ଏ଼ ବାରେ ଏଚିବେ଼ଲା ୱା଼ନେ ଅ଼ଡ଼େ ଏ଼ନିକିଁ ୱା଼ନେ ଏ଼ୱାରି ପୁଞ୍ଜାଲି ନ଼କେଏ ଅଣ୍ପାମାଚେରି । ୧୨ ଏ଼ୱାରି ଏ଼ ବାରେ କାତା ତାମି ତାକି ସେ଼ବା କିଆନା ମୀ ଲା଼ବା ତାକି ସେ଼ବା କିହିମାଚେରି, ଈଦି ଏ଼ୱାରିତା଼ଣା ତ଼ଞ୍ଜା ଆ଼ହାମାଚେ, ଇଞ୍ଜାଁ ଏ଼ ବାରେ କାତା ଲାକପୂରୁଟି ପାଣ୍ତ୍ୱିଆ଼ହାମାନି ସୁଦୁଜୀୱୁତି ବା଼ଡ଼୍ୟୁ ତଲେ ମୀ ନ଼କିତା ନେହିଁ କାବ୍ରୁ ୱେହ୍ନାରି ତା଼ଣାଟି ନୀଏଁ ମିଙ୍ଗେ ୱେସ୍ପି ଆ଼ହିମାଞ୍ଜାନେ; ଏ଼ ବାରେ କାତା ଦୂତୁୟାଁ ଜିକେଏ ପୁଞ୍ଜାଲି ଅଣ୍ପି ମାନେରି ।
ସୁଦୁଜୀୱୁ ତଲେ ମାଞ୍ଜାଲି ହା଼ଟ୍କି ଆ଼ନାୟି
୧୩ ନେହିଁ କାମା କିହାଲି ତିୟାରା ଆ଼ଦୁ । କା଼ପୁ କା଼ଚାନା ଜୀସୁ କ୍ରୀସ୍ତ ତ଼ଞ୍ଜା ଆ଼ନି ବେ଼ଲାତା ଆମିନି ବ଼ର ମିଙ୍ଗେ ହୀପ୍କି ଆୟାନେ, ଏ଼ଦାଆଁତାକି ତୀରେତଲେ ବା଼ର୍ସୁ ଇଟାଦୁ । ୧୪ ମାହାପୂରୁଇଁ ମା଼ନି କିଦୁ, ମୀରୁ ତଲି ପୁଞ୍ଜାହିଲାଆତି ବେ଼ଲାତା ଆମିନି ଲାଗେଏ ପ଼ଲେଏତି ଜୂପ୍କା ତଲେ ମାଚେରି ନୀଏଁ ଏଲେଆ଼ଆଦୁ । ୧୫ ସାମା ମିଙ୍ଗେ ହା଼ଟାମାଞ୍ଜାନି ମାହାପୂରୁ ଏ଼ନିକିଁ ସୁଦୁଗାଟାସି ମୀରୁ ଜିକେଏ ଏଲେକିଁ ମୀ ବାରେ ମାଣ୍କିତା ସୁଦୁ ଗାଟାତେରି ଆ଼ଦୁ । ୧୬ ଦାର୍ମୁପତିତା ରା଼ସ୍କି ଆ଼ହାମାନେ, “ମୀରୁ ସୁଦୁ ଗାଟାତେରି ଆ଼ଦୁ, ଏ଼ନାଆଁତାକି ଇଚିହିଁ ନା଼ନୁ ସୁଦୁ ଗାଟାତେଏଁ ।”
୧୭ ଅ଼ଡ଼େ ଆମ୍ବାଆରି ମୂମ୍ବୁ ମେହ୍ଆନା ବାରେ ଲ଼କୁତି ଏ଼ୱାରି କାମା କିହାମାନିଲେହେଁ ନୀହାଁୟି କିନେସି, ଏ଼ୱାଣି ତା଼ଣା ପ୍ରା଼ତାନା କିନାଟି ଆ଼ବା ଇଞ୍ଜିଁ ହା଼ଟିତିହିଁ, ମୀରୁ ଈ ଦାର୍ତିତା ବାସାଆ଼ହାମାନି ପାତେକା ମା଼ନି ତଲେ ଏ଼ୱାଣାଇଁ ଆଜାନା ମାଞ୍ଜୁ; ୧୮ ଇଚିହିଁ ମୀରୁ ପୁଞ୍ଜାମାଞ୍ଜେରି ମୀ ଆକୁ ଆ଼ବାୟାଁ ତା଼ଣାଟି ବେଟାଆ଼ହାମାନି ଉଜେଏତି ମାଣ୍କି ତଲେ ନୀଡିନି ତା଼ଣାଟି ମୀରୁ ୱେଣ୍ଡି କି ବାଂଗାରା ଲେହେଁତି ନା଼ସା ଆ଼ନି ଆ଼ସ୍ତି ତଲେ ପିସ୍ପି ଆ଼ହାହିଲଅତେରି, ୧୯ ସାମା ଏ଼ନି ସିନା ଅ଼ଡ଼େ ଦ଼ହ ହିଲାଆଗାଟି ମେ଼ଣ୍ତା ଡା଼ଲୁ ଲେହେଁତି କ୍ରୀସ୍ତତି ଗାଡି ଦାରାଗାଟି ନେତେରି ତଲେ ପିସ୍ପି ଆ଼ହାମାଞ୍ଜେରି । ୨୦ ଦାର୍ତି ଗା଼ଡ଼ିଆ଼ତି ନ଼କେଏ ମାହାପୂରୁ ଏ଼ୱାଣାଇଁ ଆ଼ଚିତେସି ଇଞ୍ଜାଁ ଈ ରା଼ନି ଜୁଗୁତା ଏ଼ୱାସି ମିଙ୍ଗେତାକି ତ଼ଞ୍ଜା ଆ଼ହାମାଞ୍ଜାନେସି; ୨୧ ଆମିନି ମାହାପୂରୁ ଏ଼ୱାଣାଇଁ ହା଼କିଟି ନିକ୍ହାନା ଗାୱୁରମି ହୀହାମାନେସି, ଏ଼ୱାଣି ତା଼ଣାଟି ମୀରୁ ଏ଼ ମାହାପୂରୁଇଁ ନାମିମାଞ୍ଜେରି, ଈଦାଆଁତାକି ମୀ ବାରେ ନାମୁ ଅ଼ଡ଼େ ବା଼ର୍ସୁ ମାହାପୂରୁ ତା଼ଣା ଆ଼ଟ୍ୱା ଆ଼ହାମାନେ ।
୨୨ ନୀଏଁ ମୀରୁ ସାତାତି ମା଼ନୱି ଆ଼ହାନା କୁଟୁ ହିଲାଆ ତାୟିଇଁ ଜୀୱୁ ନ଼ହାଲି ତାକି ମୀ ହିୟାଁତି ଅଟ୍ହା କଡାମାନାକି ମୀ ବାରେ ହିୟାଁ ତଲେ ମୀରୁ ରଣ୍ତିଏ ମ଼ନତଲେ ରଅତେରି ରଅଣାଇଁ ଜୀୱୁନ଼ଦୁ । ୨୩ ଇଚିହିଁ ମୀରୁ ନା଼ସା ଆ଼ନି ପା଼ଡ଼େୟିଟି ଆ଼ଏ, ସାମା ଏଚେଲା ନା଼ସା ଆ଼ଆଗାଟି ପା଼ଡ଼େୟିଟି, ଇଚିହିଁ ମାହାପୂରୁତି ଜୀୱୁ ଅ଼ଡ଼େ ବାରେବେ଼ଲା ଡ଼ୟିନି ବ଼ଲୁ ତଲେ ୱେଣ୍ତେ ଜାର୍ନା ଆ଼ହାମାଞ୍ଜେରି । ୨୪ ଦାର୍ମୁ ସା଼ସ୍ତେରିତା ରା଼ସ୍କି ଆ଼ହାମାନେ,
“ଇଚିହିଁ ଦାର୍ତିତି ବାରେ ଲ଼କୁ ଗାର୍କି ଜା଼ଡ଼ା ଲେହେଁତାରି,
ଏ଼ୱାରି ଅ଼ଜୁ ବାରେ ଜା଼ଡ଼ାତି ପୂଙ୍ଗା ଲେହେଁତାୟି ।
ଗାର୍କି ଜା଼ଡ଼ା ୱା଼ୟାହାନେ ଇଞ୍ଜାଁ ପୂଙ୍ଗା ବାରେ ଡୁଲାହାନୁ ।
୨୫ ସାମା ମାହାପୂରୁତି ବ଼ଲୁ କା଼ଲାକା଼ଲାତାକି ଡ଼ୟିନେ ।” ଈଦି ଏ଼ ନେହିଁ କାବ୍ରୁତି ବ଼ଲୁ, ଆମିନି ଗାଟାୟି ମୀ ତା଼ଣା ୱେ଼ପ୍କି ଆ଼ହାମାଚେ ।