ଯୋହନଙ୍କ ଦ୍ୱୀତିୟ ପତ୍ର
ଜହନ ରା଼ଚାମାନି ରୀ ଲମ୍ବର ଆ଼କୁ
ମୂଲୁ ହା଼ଡା
ରୀ ଲମ୍ବର ଜହନ ଆ଼କୁତି ଜୀସୁ କ୍ରୀସ୍ତ ଜାର୍ନାଆ଼ତି ୫୦ ଟିଏ ୧୦୦ ବାର୍ସା ଡା଼ୟୁ ପାଣ୍ତ୍ୱିଆ଼ହାମାନି ଜହନ ତା଼ଣାଟି ରା଼ସ୍କି ଆ଼ହାମାନେ । ଜହନ ଜାହାରାଇଁ ଆ଼କୁ ରା଼ଚିତାସି ଇଞ୍ଜିଁ ୱେହ୍ଆନା କୁଲମିତି ପ୍ରାଚିନାତେଏଁ ଇଞ୍ଜିଁ ୱେସିମାନେସି । ଜହନ ରୀ ଲମ୍ବର ଆ଼କୁତି ଜହନ ରା଼ଚିତି ନେହିଁ କାବ୍ରୁତଲେ ସମାନା ମାନେ । ଈ ପତିତା ଜୀସୁ ଏ଼ନିକିଁ ରଅସି ରଅଣାଇଁ ଜୀୱୁ ନ଼ନି କାତା ୱେସାମାଚେସି, ଜୀସୁତି ହୁକୁମିତି ହା଼ରେକା ମା଼ନି କିହିମାନେସି । ଏଲେକିହିଁଏ ଜୀସୁତି ହୁକୁମି ମା଼ନୱି ଆ଼ନାୟି ଆ଼ହିମାନେ ଏ଼ୱାଣାଇଁ ଜୀୱୁନ଼ନାୟି ଜହ ୧:୫-୬; ଜହ ୧୫:୯-୧୦ ।
ଏଚିବେ଼ଲାତା ଏ଼ୱାସି ଏପିସିୟ ଗା଼ଡ଼ାତା ମାଚେସି ଏମ୍ବାଆଁ ଏ଼ୱାସି ଜହନ ରା଼ଚିତି ନେହିଁ କାବ୍ରୁ ଅ଼ଡ଼େ ଜହନ ମୂଲୁ ଆ଼କୁ, ଜହନତି ରୀ ଲମ୍ବର, ଅ଼ଡ଼େ ଜହନ ତୀନି ଲମ୍ବର ଆ଼କୁ ରା଼ଚାମାଚେସି ଇଞ୍ଜିଁ ଲ଼କୁ ନାମିମାନେରି । ଜହନ ଈ ଆ଼କୁତା ଆ଼ଚାମାନି ଇୟା ଅ଼ଡ଼େ ତାନି ମୀର୍କା ମା଼ସ୍କା ଇଞ୍ଜିଁ କୁଲମିତି ରା଼ଚିମାନେସି । ଜହନ ଈ ଆ଼କୁ ରା଼ଚିନି କାତା ଆ଼ହିମାନେ ନାମୁତା ମାନି ଲ଼କୁଣି ସା଼ସା ହୀନାୟି ଅ଼ଡ଼େ ମିଚି କାତା ୱେହ୍ନାରି ତା଼ଣାଟି ଜାଗ୍ରାତା କିହାଲି ରା଼ଚାମାନେସି ।
ପତିତା ମାନାୟି
୧. ଜହନ ଆ଼କୁ ପ଼ଡ଼ୱି ଆ଼ନାରାଇଁ ଜହରା କିନାୟି । ୧:୧-୩
୨. କୁଲମିତି ସା଼ସା ହୀହାନା ମାହାପୂରୁତି କାଜା ହୁକୁମିତି ଅଣ୍ପି କିନାୟି । ୧:୪-୬
୩. ମିଚି ଜା଼ପ୍ନାରି ତା଼ଣାଟି ଜାଗ୍ରାତା କିନାୟି । ୧:୭-୧୧
୪. କୁଲମିତି ନାମୁଗାଟି ଲ଼କୁଣି ଜହରା କିହାନା ଆ଼କୁତି ରା଼ପ୍ନାୟି । ୧:୧୨-୧୩
୧
୧ ନା଼ନୁ, କୁଲମିତି ପ୍ରାଚିନାତେଏଁ, ମାହାପୂରୁ ଆ଼ଚାମାନି ଇୟା ଅ଼ଡ଼େ ତାନି ମୀର୍କା ମା଼ସ୍କାକି ଈ ଆ଼କୁ ରା଼ଚିମାଇଁ, ନା଼ନୁ ଏ଼ୱାରାଇଁ ସାତା ଜୀୱୁ ନ଼ହିଁମାଇଁ, ଅ଼ଡ଼େ ୱାର୍ଇ ନା଼ନୁ ଆ଼ଏ, ସାମା ସାତାତି ପୁଞ୍ଜାମାନି ବାରେଜା଼ଣା ଜୀୱୁନ଼ହିଁ ମାଞ୍ଜାନେରି । ୨ ଆମିନି ସାତା ମା଼ ହିୟାଁତା ଡ଼ୟାମାନେ ଅ଼ଡ଼େ କା଼ଲାକା଼ଲାତାକି ମା଼ ତା଼ଣା ଡ଼ୟିନେ ।
୩ ଆ଼ବା ମାହାପୂରୁ ଅ଼ଡ଼େ ତାନି ମୀର୍ଏଣା ଜୀସୁ କ୍ରୀସ୍ତ ତା଼ଣାଟି କାର୍ମାମେହ୍ନାୟି, ହିତ୍ଡ଼ି ଜୀୱୁ ହୀହାନା, ସାତା ଅ଼ଡ଼େ ଜୀୱୁ ନ଼ୱିଆ଼ହାନା ଡ଼ୟିଦେରି ।
ସାତା ଅ଼ଡ଼େ ଜୀୱୁନ଼ନାୟି
୪ ନୀ ମୀର୍କା ମା଼ସ୍କା ବିତ୍ରାଟି ଏଚରଜା଼ଣା ଆ଼ବା ତା଼ଣାଟି ମାଙ୍ଗେ ହୀହାମାଞ୍ଜାନି ହୁକୁମି ଲେହେଁ ସାତାତି ତା଼କିନି ତା଼କୁ ମେସାନା ନା଼ନୁ ହା଼ରେକା ରା଼ହାଁ ଆ଼ହିମାଇଁ । ୫ ✡ ୧:୫ ଜହ ୧୩:୩୪; ୧୫:୧୨,୧୭ଏ଼ ଜୀୱୁତି ଇୟା ନା଼ନୁ ନୀଏଁ ନିଙ୍ଗେ ର଼ ପୁଃନି ହୁକୁମି ରା଼ଚିମାଞ୍ଜାଇଁ ଏ଼ଦି ଆ଼ଏ, ସାମା ତଲିଟିଏ ବେଟାଆ଼ହାମାନି ହୁକୁମି ରା଼ଚାନା ବାତିମା଼ଲିମାଞ୍ଜାଇଁ, ମା଼ର ରଅତାୟି ରଅଣାଇଁ ଜୀୱୁନ଼ନାୟି ମାନେ । ୬ ମା଼ର ତାନି ହୁକୁମି ମା଼ନୱି ଆ଼ହାନା ମାଞ୍ଜେ ମାନାୟି, ଈଦିଏ ଜୀୱୁ ନ଼ନି କାତା, ମୀରୁ ତଲିଟିଏ ଏ଼ନାଆଁ ୱେଞ୍ଜାମାଞ୍ଜେରି, ଏଲେଆ଼ହିଁଏ ମାଞ୍ଜୁ, ଈଦି ଏ଼ ହୁକୁମି ।
୭ ନା଼ନୁ ୱେସିମାଇଁ, ଇଚିହିଁ ଆମିନି ଗାଟାରି ଜୀସୁ କ୍ରୀସ୍ତ ମାଣ୍ସି ୱା଼ଣା ତଲେ ୱା଼ହାହିଲଅସି ଇଞ୍ଜିଁ ଇନେରି, ଇଲେତି ହା଼ରେକା ନା଼ଡ଼ିକିନାରି ଦାର୍ତିତା ହ଼ଚା ୱା଼ହାମାନେରି, ଇଲେତି ଲ଼କୁ ନା଼ଡ଼ିକିନାରି ଅ଼ଡ଼େ ନା଼ଡ଼ିକିନି କ୍ରୀସ୍ତ । ୮ ସାମା ମୀ ତାକି ମା଼ମ୍ବୁ କିହାମାନି କାମାତି ପା଼ଡ଼େୟି ବାରେ ଜା଼କ୍ଆନା ଏ଼ନିକିଁ ଏମ୍ବାଟି ହା଼ରେ ପୁରେ ବ଼ର ବେଟାଆ଼ଦେରି ଏ଼ଦାଆଁତାକି ଜାଗ୍ରାତା ଆ଼ଦୁ ।
୯ ଆମ୍ବାଆସି କ୍ରୀସ୍ତ ଜା଼ପ୍ହା ମାନାଣି କିହାଁ ଆଗାଡ଼ା ଗା଼ଣ୍ନେସି, ଏ଼ୱାସି ମାହାପୂରୁଇଁ ବେଟାଆ଼ହାହିଲଅସି; ଆମ୍ବାଆସି କ୍ରୀସ୍ତ ଜା଼ପ୍ହା ମାନାଣି ତଲେ ଡ଼ୟିନେସି, ଏ଼ୱାସି ଆ଼ବା ଅ଼ଡ଼େ ମୀର୍ଏସି ଈ ରିଆରାଇଁ ଜିକେଏ ବେଟାଆ଼ହାମାନେସି । ୧୦ ଆମ୍ବାଆସି ଇଲେକିଁ ଜା଼ପ୍ନାଣି ଆସାନା ମୀ ତା଼ଣା ୱା଼ଅସି, ଏ଼ୱାଣାଇଁ ମୀ ଇଜ ହା଼ଟାଆଦୁ, ଇଞ୍ଜାଁ ନେହିଁମାଞ୍ଜି କି ଜିକେଏ ଇନାଆଦୁ; ୧୧ ଏ଼ନାଆଁତାକି ଇଚିହିଁ ଆମ୍ବାଆସି ଏ଼ୱାଣାଇଁ ନେହିଁମାଞ୍ଜି କି ଇନେସି, ଏ଼ୱାସି ତାନି ଲାଗେଏତି କାମାତା ଆଣ୍ତିନାସି ଆ଼ନେସି ।
ଆ଼କୁତି ରା଼ନି କାତା
୧୨ ନା଼ନୁ ମିଙ୍ଗେ ହା଼ରେକା କାତା ରା଼ଚିନାୟି ମାନେ, ସାମା ଆ଼କୁତା ଇଞ୍ଜାଁ ସୀରା ତଲେ ରା଼ଚାଲି ଅଣ୍ପି ହିଲଅଁ; ମୀ ତା଼ଣା ୱା଼ହାନା ମୂମ୍ବୁ ମେସ୍ପି ଆ଼ହାନା ଗୂତି ତଲେ ଜ଼ଲ୍କି ଆୟାଲି ଆ଼ସା କିହିମାଇଁ, ଏ଼ନିକିଁ ମା଼ ରା଼ହାଁ ହା଼ରେକା ଆ଼ନେ ।
୧୩ ମାହାପୂରୁ ଆ଼ଚାମାନି ନୀ ତାଙ୍ଗିନି ମୀର୍କା ମା଼ସ୍କା ମିଙ୍ଗେ ଜହରା କିହିମାଞ୍ଜାନେରି । ଆ଼ମେନ୍ ।
✡୧:୫ ୧:୫ ଜହ ୧୩:୩୪; ୧୫:୧୨,୧୭