ତୀମଥିଙ୍କ ନିକଟକୁ ପାଉଲଙ୍କ ଦ୍ୱୀତିୟ ପତ୍ର
ତିମତି ତା଼ଣା ପା଼ୱୁଲ ରା଼ଚାମାନି ରୀ ଲମ୍ବର ଆ଼କୁ
ମୂଲୁ ହା଼ଡା
୨ତିମ ଆ଼କୁ ପା଼ୱୁଲ ତା଼ଣାଟି ତାନି ସୀସୁ ତିମତି ତା଼ଣା ରା଼ଚାମାନି ଆ଼କୁ । ତିମତି ରୀ ଲମ୍ବର ଆ଼କୁ ପା଼ୱୁଲତି ବାରେତି କିହାଁ ଡା଼ୟୁ ରା଼ଚିତି ଆ଼କୁ । ଈଦି ପା଼ୱୁଲତି ଜୀୱୁ ରା଼ନି ବେ଼ଲାତା ରା଼ସ୍କି ଆ଼ହାମାଣ୍ମ୍ବିନେ । ଏଚିବେ଼ଲାତା ଏ଼ୱାସି ର଼ମ୍ ଗା଼ଡ଼ାତି କାୟିଦି ଇଲୁତା ମାଚେସି ୧:୧୬ ପା଼ୱୁଲ ତିମତି ତଲେ ହା଼ରେକା ଜାଟୁ ମାଚେ, ଅ଼ଡ଼େ ବାରେବେ଼ଲା ଏ଼ୱାଣାଇଁ ମୀର୍ଏଣା ଲେହେଁ ରା଼ଚିମାନେସି ପିଲିପି ୨:୨୨; ୧ତିମ ୧:୨; ୧:୧୮ ।
ଈଦି ପା଼ୱୁଲ ରା଼ଚାମାନି ସା଼ରିଗଟା ଆ଼କୁ ବିତ୍ରାଟି କୁଲମିତି ପିସାନା ର଼ ମାଣ୍ସିକି ରା଼ଚିମାନେସି । ଅ଼ଡ଼େ ଏଟ୍କାତି ତୀନିଗଟା ଆ଼କୁ ତିମତି ମୂଲୁ ଆ଼କୁ, ତିତସ, ଅ଼ଡ଼େ ପିଲିମନ । ତିମତି ରୀ ଲମ୍ବର ଆ଼କୁ ରା଼ଚିତି ବେ଼ଲାତା ର଼ମ୍ ଗା଼ଡ଼ାତା ସା଼ଲୱି କିନାରି ହା଼ରେକା ସା଼ସ୍ତି ହୀହିମାଚେରି । ଇଲେତି ସା଼ସ୍ତି ଆ଼ହିମାଚାକି ପା଼ୱୁଲ କାୟିଦିତା ଡ଼ୟାମାଚେସି । ମୂଲୁତି ଆ଼କୁ ଲେହେଁ ପା଼ୱୁଲ ତିମତିଇଁ ମିଚି ଜା଼ପ୍ନାରି ତା଼ଣାଟି ଜାଗ୍ରାତା ଆ଼ହାଲି ୱେସିମାନେସି । ୧ତିମ ୧:୧୬-୧୮ ପା଼ୱୁଲ ତିମତିଇଁ ଏଲେଇଞ୍ଜି ମାନେସି ଡା଼ୟୁ ହା଼ରେକା କସ୍ତତି ଦିନା ମାନେ ୩:୧ ।
ପତିତା ମାନାୟି
୧. ପା଼ୱୁଲ ତିମତିଇଁ ଜହରା କିହାନା ମା଼ଟ୍ନାୟି ଅ଼ଡ଼େ ଏ଼ୱାଣାଇଁ ସା଼ସା ହୀନାୟି । ୧:୧-୧୮
୨. ପା଼ୱୁଲ ତିମତିଇଁ କସ୍ତ ଅ଼ର୍ହାଲି ସା଼ସା ହୀହିମାନେସି । ୨:୧-୧୩
୩. ତିମତିଇଁ ଏଚେକା କାତା ୱେହ୍ନାୟି । ୨:୧୪-୨୬
୪. ରା଼ନି ଦିନାତା ଗଟୱି ଆ଼ନାଆଁ ଅ଼ଡ଼େ ସାତା ଜିରୁ ବାଚି କିହାଲି ଜାଗ୍ରାତା କିନାୟି । ୩:୧–୪:୮
୫. ପା଼ୱୁଲ ତିମତିଇଁ ଏଚେକା ଅଣ୍ପୁତି କାତା ୱେସାନା ଆ଼କୁତି ରା଼ପ୍ନାୟି । ୪:୯-୨୨
୧
୧ ନା଼ନୁ ପା଼ୱୁଲ, କ୍ରୀସ୍ତ ଜୀସୁ ତା଼ଣା ମାନି ଜୀୱୁତି ଆ଼ଞ୍ଜାମାନି ଲେହେଁ, ମାହାପୂରୁ ଅଣ୍ପୁ ତଲେ କ୍ରୀସ୍ତ ଜୀସୁତି ର଼ ପାଣ୍ତ୍ୱି ଆ଼଼ହାମାନାତେଏଁ ।
୨ ✡ ୧:୨ କାମା ୧୬:୧ତିମତି, ନା଼ ଜୀୱୁତି ମୀର୍ଏଣାତି ଆ଼ବା ମାହାପୂରୁ କ୍ରୀସ୍ତ ଜୀସୁ ତା଼ଣାଟି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ଜୀୱୁ ନିଙ୍ଗେତାକି ଆୟାପେ ।
ମାହାପୂରୁଇଁ ଜହରା ଅ଼ଡ଼େ ବା଼ର୍ସୁ ହୀନାୟି
୩ ମା଼ ତଲିତି ଆ଼କୁ ଆ଼ବାୟାଁ ଲେହେଁ ନା଼ନୁ ସୁଦୁ ଅଣ୍ପୁ ତଲେ ମାହାପୂରୁଇଁ ସେ଼ବା କିହିମାଇଁ, ନା଼ନୁ ଏ଼ ମାହାପୂରୁ ତା଼ଣା ଲା଼ଆଁ ମାଦେନା ପ୍ରା଼ତାନାତା ନୀ ଦ଼ରୁ ରା଼ଚାହାଁ ମାହାପୂରୁଇଁ ଜହରା କିହିମାଇଁ; ୪ ଏ଼ନିକିଁ ନା଼ ରା଼ହାଁ ଗାଡିଆ଼ନେ, ଈଦାଆଁତାକି ନୀ କାଣ୍ତ୍ରୁ ଅଣ୍ପାନା ନିଙ୍ଗେ ମେସାଲି ତାକି ହା଼ରେକା ମ଼ନ କିହିମାଇଁ; ୫ ✡ ୧:୫ କାମା ୧୬:୧ଇଚିହିଁ ଆମିନି କୁଟୁ ହିଲାଆଗାଟି ନାମୁ, ମୀ ବା଼ୟି ଲୟି ଅ଼ଡ଼େ ମୀ ଇୟା ଇୱୁନିକି ତା଼ଣା ମାଚେ, ଅ଼ଡ଼େ ନୀ ତା଼ଣା ଜିକେଏ ମାନେ ଇଞ୍ଜିହିଁ ନା଼ ହା଼ରେକା ନାମୁ, ନୀ କୁଟୁ ହିଲାଆ ନାମୁତି କାତା ନା଼ନୁ କାବ୍ରୁ ବେଟାଆ଼ହାମାଇଁ । ୬ ନା଼ନୁ ନୀ ଲାକ କେୟୁ ଇଟାତି ବେ଼ଲାତା ନୀନୁ ମାହାପୂରୁ ତା଼ଣାଟି ଆମିନି ବ଼ର ବେଟାଆ଼ତି ଏ଼ଦାଆଁ ଜାତ୍ନୁ କିହାଁ ଇଟାଲି ନା଼ନୁ ନିଙ୍ଗେ ଅଣ୍ପି କିହିମାଞ୍ଜାଇଁ । ୭ ଇଚିହିଁ ମାହାପୂରୁ ମାଙ୍ଗେ ଆଜିନି ଜୀୱୁ ହୀହାମାଞ୍ଜଅସି, ସାମା ବା଼ଡ଼୍ୟୁ, ଜୀୱୁ ନ଼ନାଣି, ଅ଼ଡ଼େ ନେହିଁ ଅଣ୍ପି କିନି ଜୀୱୁ ହୀହାମାଞ୍ଜାନେସି ।
୮ ଏ଼ଦାଆଁତାକି ମା଼ର ପ୍ରବୁ କାତାତା ସା଼କି ହୀହାଲି ଅ଼ଡ଼େ ନା଼ନୁ ପ୍ରବୁତି ତାକି କାୟିଦି ଇଲୁତା ଦସ୍ପି ଆ଼ହାମାଇଁ ନା଼ ତାକି ଲାଜା ଆ଼ଆନି, ସାମା ମାହାପୂରୁ ହୀହାମାଞ୍ଜାନି ବା଼ଡ଼୍ୟୁ ତଲେ ନେହିଁ କାବ୍ରୁ ୱେ଼କ୍ହାଲି ବେଟାଆ଼ହାମାନି କସ୍ତତି ସହୱି ଆ଼ମୁ । ୯ ଏ଼ୱାସି ମାଙ୍ଗେ ଗେଲ୍ପା ମାଞ୍ଜାନେସି, ଅ଼ଡ଼େ ନା଼ ନେହିଁ ଲ଼କୁତେରି ଇଞ୍ଜିହିଁ ହା଼ଟାମାଞ୍ଜାନେସି; ଅ଼ଡ଼େ ମା଼ କିହାମାନି କାମା ଲେହେଁ କିହାଁ ମାଞ୍ଜଅସି, ସାମା ତାନି ଅଣ୍ପୁ ତଲେ ତା଼ନୁ କାର୍ମା ମେସ୍ତାନି ଲେହେଁ କିହାଁ ମାଞ୍ଜାନେସି; ଏ଼ କାର୍ମା ତଲି କା଼ଲା ନ଼କେଏ କ୍ରୀସ୍ତ ଜୀସୁ ତା଼ଣାଟି ମାଙ୍ଗେ ହୀୱି ଆ଼ହାମାଚେ, ୧୦ ସାମା ନୀଏଁ ମା଼ ଗେଲ୍ପାନି କ୍ରୀସ୍ତ ଜୀସୁ ଦାର୍ତିତା ୱା଼ହାମାନାକି ମାଙ୍ଗେ ତ଼ସାମାଞ୍ଜାନେସି; ଏ଼ୱାସି ହା଼କିତି ମ୍ଣେକ୍ହା ମାନେସି; ଅ଼ଡ଼େ ତାନି ନେହିଁ କାବ୍ରୁତଲେ ଜୀୱୁ ଅ଼ଡ଼େ ହା଼ଆଗାଟାଣି ଉଜେଡ଼ିତା ତ଼ସାମାନେସି ।
୧୧ ✡ ୧:୧୧ ୧ତିମ ୨:୭ଈ ନେହିଁ କାବ୍ରୁ ୱେ଼କ୍ହାନା ତେଲ୍ହିକିହାଲି ମାହାପୂରୁ ନାଙ୍ଗେ ର଼ ପାଣ୍ତ୍ୱିଆ଼ତି ସୀସୁ ଇଞ୍ଜାଁ ଜା଼ପ୍ନାସି ଲେହେଁ ହେର୍ପା ମାଞ୍ଜାନେସି । ୧୨ ଏ଼ଦାଆଁତାକି ନା଼ନୁ ଈ ବାରେ ଦୁକୁ ବେଟା ଆ଼ହିମାଇଁ; ଆ଼ତିଜିକେଏ ନା଼ନୁ ଆଜା ହିଲଅଁ, ଇଚିହିଁ ନା଼ନୁ ଆମ୍ବାଆରି ତା଼ଣା ନାମାମାଇଁ, ଏ଼ୱାଣାଇଁ ପୁଞ୍ଜାମାଇଁ, ଅ଼ଡ଼େ ନା଼ନୁ ତାନି କେୟୁତା ଏ଼ନାଆଁ ହେର୍ପାମାଇଁ, ବିଚାରା ଦିନା ୱା଼ନି ପାତେକା ଏ଼ଦାଆଁ ଏ଼ୱାସି ଜାତ୍ନୁ ତଲେ ଇଟାଲି ଆ଼ଡିମାନେସି, ଈଦାଆଁ ନା଼ନୁ ତୀର୍ପୁତଲେ ନାମିମାଇଁ । ୧୩ ନା଼ ତା଼ଣାଟି ଆମିନି ନେହିଁ ବ଼ଲୁ ୱେଞ୍ଜାମାଞ୍ଜି, କ୍ରୀସ୍ତ ଜୀସୁ ତା଼ଣାଟି ନାମୁ ଇଞ୍ଜାଁ ଜୀୱୁ ନ଼ନାଣି ଏ଼ଦାଆଁ ନେହିଁକିଁ ଆସା ମାନାମୁ । ୧୪ ଆମିନି ନେହିଁ କାତାତି ଦାୟିପତି ମିଙ୍ଗେ ହୀପ୍କି ଆ଼ହାମାଞ୍ଜାନେ, ମା଼ ତା଼ଣା ବାସା କିହିମାନି ସୁଦୁଜୀୱୁତି ବା଼ଡ଼୍ୟୁ ତଲେ ଏ଼ ବାରେତି ଜାତ୍ନୁ କିହା ଇଟାମୁ ।
୧୫ ନୀନୁ ପୁଞ୍ଜାମାଞ୍ଜି; ପୁଗେଲ ଅ଼ଡ଼େ ହର୍ମଗେନା ତଲେ ଆସିୟାତି ବାରେ ଲ଼କୁ ନାଙ୍ଗେ ପିସା ମାଞ୍ଜାନେରି । ୧୬ ଅନିସିପର କୁଟମିତି ପ୍ରବୁ କାର୍ମା ମେସ୍ପେସି, ଏ଼ନାଆଁତାକି ଇଚିହିଁ ଏ଼ୱାରି ଅଲେ ଅଲେ ୱା଼ହାନା ନା଼ ଦୁକୁ ଡୂକ୍ହାତେରି, ଇଚିହିଁ ନା଼ନୁ କାୟିଦି ଇଲୁତା ମାଚିହିଁ ଜିକେଏ ଲାଜା ଆ଼ହାହିଲଅରି, ୧୭ ର଼ମ୍ ଗା଼ଡ଼ାତା ଏଜାଲିଏ ଏ଼ୱାସି ନାଙ୍ଗେ ପାରାନା ନା଼ ତା଼ଣା ୱା଼ତେସି, ୧୮ ରା଼ନି ଦିନାତା ଏ଼ନିକିଁ ମାହାପୂରୁ ତା଼ଣାଟି କାର୍ମା ବେଟାଆ଼ନେସି, ଏଲେକିଁ ମାହାପୂରୁ ଏ଼ୱାଣାକି କାର୍ମା ଆ଼ପେସି, ଅ଼ଡ଼େ ଏ଼ୱାସି ଏପିସିୟ ଗା଼ଡ଼ାତା ନାଙ୍ଗେ ଏ଼ନିକିଁ ସେ଼ବା କିହାମାଞ୍ଜାନେସି, ଏ଼ଦାଆଁ ନୀନୁ ନେହିଁକିଁ ପୁଞ୍ଜାମାଞ୍ଜି ।