ହିବ୍ରୁମାନଙ୍କୁ ଲିଖିତ ପତ୍ର
ଏବ୍ରି ଲ଼କୁତାକି ରା଼ଚିତି ଆ଼କୁ
ମୂଲୁ ହା଼ଡା
ଏବ୍ରି ପତି ର଼ ରା଼ହାଁ ହୀନି ପତି । ପ୍ଣାଃଇ ମେ଼ରାତି ହା଼ରେକା ମାହାପୂରୁ ଅଣ୍ପୁତି ବ଼ଲୁୟାଁ ପ୍ଣାଃଆଇ ଆ଼ହାମାନି କାତା ଇମ୍ବାଆଁ ମେସାଲି ଆ଼ଡିମାନାୟି । ଈ ପତି ର଼ ନେହିଁ କାତାତି ୱେହ୍ନି ପତି । ଇମ୍ବାଆଁ ତୀନିକ଼ଡ଼ିଟିଏ ହା଼ରେକା ପ୍ଣାଃଇ ମେ଼ରାତି କାତାୟାଁ ରା଼ସ୍କି ଆ଼ହାମାନୁ । ଜୀସୁ କ୍ରୀସ୍ତ ଏ଼ନିକିଁ ମାହାପୂରୁ ଅଣ୍ପୁତି ବ଼ଲୁ ଅ଼ଡ଼େ ଜୀହୁଦି ପୂଜେରାଙ୍ଗା କାମା ପୂରା କିତେସି ଇମ୍ବାଆଁ ମା଼ର ମେସାଲି ଆ଼ଡିମାନାୟି ।
ଈଦାଆଁତାକି ଈ ପତି ଜୀହୁଦି କ୍ରୀସ୍ତାନା ଲ଼କୁଣି ସା଼ସା ଅ଼ଡ଼େ ବା଼ର୍ସୁ ହୀନି ପତି । ଏବ୍ରି ପତି ୱେସିମାନେ, ଜୀସୁ ଏ଼ନିକିଁ ମେ଼ରାତି ପୂରା କିତେସି, ଏ଼ନିକିଁ ପୂଜେରାଙ୍ଗା ଅ଼ଡ଼େ ୱେଣ୍ତେ ପୂଜା ହୀହାଲି ଲ଼ଡ଼ା ହିଲେଏ । ଜୀସୁ କ୍ରୀସ୍ତ ବାରେ କା଼ଲେଏତାକି ରଣ୍ତିଏ ଦେବା ପା଼ପୁତି ପୂଜା ହୀତେସି । ନୀଏଁତି ଜୁଗୁତି କ୍ରୀସ୍ତାନା ଲ଼କୁକି ଏବ୍ରି ପତି ସା଼ସା ଅ଼ଡ଼େ ବା଼ର୍ସୁ ତ଼ସିମାନେ । କ୍ରୀସ୍ତ ମାଙ୍ଗେ ମାହାପୂରୁ ତା଼ଣା ବା଼ର୍ସୁ କିୱିକିହାଲି ଆ଼ଡାମାଞ୍ଜାନେସି । ଅ଼ଡ଼େ ଏ଼ୱାଣି ତା଼ଣା ବା଼ର୍ସୁ ଇଟାନା ତା଼କିନ ୧୨:୨ ।
ଏବ୍ରି ପତି ଆମ୍ବାଆସି ରା଼ଚାମାନେସି ପୁଣ୍ମ୍ବି ଆ଼ହା ହିଲେଏ, ସାମା ବୁଦିଗାଟାରି ଏଲେ ଇଞ୍ଜିମାନେରି ପାଣ୍ତ୍ୱିଆ଼ହାମାନି ପା଼ୱୁଲ, ଲୂକ, ଆ଼ଆତିଁ ବର୍ନବା ଆ଼ହାଡ଼ୟିନେରି । ଈଦାନି ରା଼ଚିତି କା଼ଲମି ଜିକେଏ ପୁନାଆତାୟି, ସାମା ହା଼ରେକା ଲ଼କୁ ଏଲେଇନେରି ଈଦି ଜୀସୁ କ୍ରୀସ୍ତ ଜାର୍ନାଆ଼ତି ୭୦ ବାର୍ସା ଡା଼ୟୁ ରା଼ସ୍କି ଆ଼ହାମାନେ । ଇଚିହିଁ ଜିରୁସାଲମ ଇଲୁ କ୍ରୀସ୍ତ ଜାର୍ନାଆ଼ତି ୭୦ ବାର୍ସା ଡା଼ୟୁ ନା଼ସା ଆ଼ତେ ସାମା ଈ ଆ଼କୁତି ରା଼ଚିନାସି ଈଦି ନା଼ସା ଆ଼ଆତିଲେହେଁ ରା଼ଚିମାନେସି । ଏବ୍ରି ପତି ର଼ମ୍ ଗା଼ଡ଼ାତା ରା଼ସ୍କି ଆ଼ହାମାଚେ ୧୩:୨୪ ଅ଼ଡ଼େ ହା଼ରେକା କୁଲମିକାଣା ବା଼ଟିକିୱି ଆ଼ହାମାଚେ ।
ପତିତା ମାନାୟି
୧. ଜୀସୁ କ୍ରୀସ୍ତ ମାହାପୂରୁ ଅଣ୍ପୁତି ବ଼ଲୁ ୱେହ୍ନାସି ଅ଼ଡ଼େ ଦୂତୁୟାଁ କିହାଁ ଜିକେଏ କାଜାସି । ୧:୧–୪:୧୩
୨. ଜିରୁସାଲମତା ସେ଼ବା କିହିମାନି ପୂଜେରାଙ୍ଗା କିହାଁ ଜିକେଏ ଜୀସୁ କାଜାସି । ୪:୧୪–୭:୨୮
୩. ମାହାପୂରୁ ମ଼ସାକି ମେ଼ରା ହୀହାନା ତାନି ଲ଼କୁତଲେ କିହାମାଚି ରା଼ଜିମା଼ନା କିହାଁ ଜୀସୁତି ସେ଼ବା କାମା କାଜାୟି । ୮:୧–୧୦:୩୧
୪. ଜୀସୁଇଁ ବାରେ ତା଼ଣା କାଜାସି କିହାନା ୱେସାମାନେସି । ୧୦:୩୨–୧୩:୧୭
୫. ସା଼ସା ଅ଼ଡ଼େ ବା଼ର୍ସୁତି କାତା ୱେସାନା ଜହରା ତଲେ ଆ଼କୁତି ରା଼ପ୍ନାୟି । ୧୩:୧୮-୨୫
୧
ମୀର୍ଏଣା ତା଼ଣାଟି ମାହାପୂରୁତି ବ଼ଲୁ
୧ ମାହାପୂରୁ ତଲି କା଼ଲାତା ଏଟ୍କା ଏଟ୍କା ଟା଼ୟୁତା ଅ଼ଡ଼େ ଏଟ୍କା ଏଟ୍କାତି ମାହାପୂରୁ ଅଣ୍ପୁତି ବ଼ଲୁ ୱେହ୍ନାରି ତା଼ଣାଟି ମା଼ ଆକୁ ଆ଼ବାୟାଁଣି କାତା ୱେସାମାଚେସି, ୨ ସାମା ଈ ରା଼ନି ବେ଼ଲାତା ମୀର୍ଏଣା ତା଼ଣାଟି ମାଙ୍ଗେ କାତା ୱେସାମାଞ୍ଜାନେସି । ଏ଼ୱାଣାଇଁ ଏ଼ୱାସି ବାରେତି ମୁହେଁ କାଜାସି କିହାଁ ଆ଼ଚାମାନେସି, ଏ଼ୱାଣି ତା଼ଣାଟି ହା଼ଗୁପା଼କା ଦାର୍ତି ବାରେ ଗା଼ଡ଼ିକିତେସି; ୩ ଏ଼ ମୀର୍ଏସି ତାନି ଡ଼ୀଞ୍ଜିମାନି ଗାୱୁରମିତି ଉଜେଡ଼ି ଅ଼ଡ଼େ ଏ଼ୱାଣି ୱା଼ଣା ମାନେ, ଏ଼ୱାସି ତାନି ବା଼ଡ଼୍ୟୁ ଗାଟି ବ଼ଲୁ ତଲେ ବାରେ ଦାର୍ତିତି ସା଼ଲୱି କିନେସି, ଇଞ୍ଜାଁ ମା଼ ପା଼ପୁ ବାରେ ମ୍ଣେକ୍ହି ଡା଼ୟୁ ଲାକପୂରୁତି ବା଼ଡ଼୍ୟୁ ଗାଟି ମାହାପୂରୁତି ଟିଃନି ଟଟତା କୁଗାମାନେସି ।
ମାହାପୂରୁ ମୀର୍ଏସି ବାରେକିହାଁ କାଜାସି
୪ ମୀର୍ଏସି ଏ଼ନିକିଁ ଲାକପୂରୁତି ଦୂତୁୟାଁ କିହାଁ ହା଼ରେକା କାଜା ଦ଼ରୁତି ଅଦିକାରା ବେଟାଆ଼ହା ମାନେସି, ଏଲେକିହିଁଏ ଏ଼ୱାସି ଏ଼ୱାସିକା କିହାଁ ହା଼ରେକା କାଜାସି ଆ଼ହାମାନେସି । ୫ ଇଚିହିଁ ମାହାପୂରୁ ଦୂତୁୟାଁ ବିତ୍ରାଟି ଆମ୍ବାଆରାଇଁ ଏଚେଲା ଏଲେଇଞ୍ଜା ହିଲଅସି,
“ନୀନୁ ନା଼ ମୀର୍ଏଣାତି,
ନୀଞ୍ଜୁଟିଏ ନା଼ନୁ ନୀ ତାଞ୍ଜିତେଏଁ”
ଅ଼ଡ଼େ ଜିକେଏ ମାହାପୂରୁ ଏଲେଇଚେସି,
“ନା଼ନୁ ମୀ ଆ଼ବାତେଏଁ ଆ଼ହାମାଇଁ,
ଅ଼ଡ଼େ ନୀନୁ ନା଼ ମୀର୍ଏଣାତି ଆ଼ଦି ।”
୬ ଅ଼ଡ଼େ ମାହାପୂରୁ ତାନି ପା଼ଣ୍ୱା ମୀର୍ଏଣାଇଁ ଅ଼ଡ଼େ ୱେଣ୍ତେ ଦାର୍ତିତା ପାଣ୍ତାତେସି, ଏ଼ ବେ଼ଲାତି ସିନିକିହାନା ଏଲେଇନେସି, “ମାହାପୂରୁତି ବାରେ ଦୂତୁୟାଁ ଏ଼ୱାଣାଇଁ ଜହରା କିପେରି ।”
୭ ର଼ ୱାକିଟି ମାହାପୂରୁ ଦୂତୁୟାଁ କାତା ଏଲେଇଞ୍ଜି ମାନେସି,
“ମାହାପୂରୁ ତାନି ଦୂତୁୟାଁଇଁ ଗା଼ଲି ଲେହେଁତି ଜୀୱୁ ହୀନେସି,
ଅ଼ଡ଼େ ତାନି ସେ଼ବା କିନାରାଇଁ ହିଚୁ ଗୁଦ୍ୱା ଲେହେଁ କିନେସି ।”
୮ ଅ଼ରୱାକି ମାହାପୂରୁ ତାନି ମୀର୍ଏଣା ତାକି ଏଲେଇଞ୍ଜି ମାନେସି,
“ଏ଼ ମାହାପୂରୁ ନୀ ସିଂଗାସାଣି କା଼ଲାକା଼ଲା ତାକି ଡ଼ୟିନେ,
ଅ଼ଡ଼େ ନୀନୁ ସା଼ଲୱି କିନାୟି ନୀହାଁୟି ତଲେ ଆ଼ନେ ।
୯ ନୀନୁ ଦାର୍ମୁ ଗାଟାଣାଇଁ ଜୀୱୁ ନ଼ହିଁମାଞ୍ଜି
ଅ଼ଡ଼େ ଦାର୍ମୁ ହିଲାଆଗାଟାରାଇଁ ଅ଼ପାହିଲଅତି,
ଏ଼ଦାଆଁତାକି ମାହାପୂରୁ ନୀ ମାହାପୂରୁ ନିଙ୍ଗେ ଆ଼ଚାନେସି,
ମୀ ତ଼ଣେସିଙ୍ଗା କିହାଁ ନିଙ୍ଗେ ହା଼ରେକା ରା଼ହାଁତି ନିୟୁଁ ୱା଼କ୍ହାନା ନିଙ୍ଗେ ଆ଼ଚାନେସି ।”
୧୦ ଏ଼ୱାସି ଅ଼ଡ଼େ ୱେସିମାନେସି,
“ଏ଼ ପ୍ରବୁ, ନୀନୁ ମୂଲୁଏ ଦାର୍ତିତି ପୁନାଦି ଗା଼ଡ଼ିକିତି,
ଅ଼ଡ଼େ ହା଼ଗୁପା଼କା ବାରେ ନୀ କେୟୁତଲେ କେ଼ପିତି ।”
୧୧ “ଏ଼ ବାରେ ର଼ ଦିନା ମେଣ୍ଙ୍ଗାହାନେ, ସାମା ନୀନୁ କା଼ଲେଏ ଡ଼ୟିଦି;
ଅ଼ଡ଼େ ଏ଼ ବାରେ ପ୍ଣାଃଇ ହିମ୍ବରିକା ଲେହେଁ ଗେଞ୍ଜା ହାନୁ
୧୨ ଅ଼ଡ଼େ, ନୀନୁ ହିମ୍ବରି ଲେହେଁ, ହାଅ, ହିମ୍ବରି ଲେହେଁ ମୁଦାକିଦି
ଅ଼ଡ଼େ ଏ଼ୱି ବାରେ ହିମ୍ବରିକା ଲେହେଁ ବାଦ୍ଲି ଆ଼ନୁ;
ସାମା ନୀନୁ ବାରେବେ଼ଲା ଏ଼ୱାତିଏ,
ଅ଼ଡ଼େ ନୀ ଜୀୱୁ ଏଚେଲାୱା ରା଼ଏ ।”
୧୩ ମାହାପୂରୁ ତାନି ଦୂତୁୟାଁଇଁ ଏଚେଲାୱା ଏଲେଇଞ୍ଜା ହିଲଅସି,
“ନା଼ନୁ ନୀ ସାତ୍ରୁୟାଁଣି ନୀ କଡାୟାଁ ଡ଼଼ଇ ଇଟାଆ ପାତେକା
ନୀନୁ ନା଼ ଟିଃନି ଟଟତା କୁଗାମାନାମୁ ।”
୧୪ ଆତିହିଁ ଲାକପୂରୁତି ଦୂତୁୟାଁ ଆମ୍ୱାଆରି ? ଏ଼ୱାରି ଆ଼ହିମାନେରି ମାହାପୂରୁତି ସେ଼ବା କିନାରି ମାଣ୍ସିୟାଁଇଁ ସା଼ୟେମି କିହାନା ଗେଲ୍ପାଲିତାକି ମାହାପୂରୁ ତା଼ଣାଟି ପାଣ୍ତ୍ୱିଆ଼ତି ଜୀୱୁୟାଁ ।