Ngwujaꞌri ngwanni ngwullu je Bulij
Täjlänükï giꞌra rom
Änï kitabanu
Bulij gwullu ngwujaꞌri ngwee ngwuru giꞌra rom, ngwuje üllïjï ngwïkïrïjïnä ngwudi giꞌdoonga gidi Ngwaalu kündär gani Täjlänükï aar gwuji ngwujaꞌralu ngwanni ngwüllïjïng je gwerre. Bulij gwügwällïnä ngwïkïrïjïn ngwe gwani ndi mätïnälü gwegen ꞌdïꞌdäny ndi ämnï Ngwaalu a gwani ämnäjïdï gwegen gwüpäng, na gwani ji gwegen aar je übïnälü gwulleny.
Bulij gwinggida ngwujaꞌranu ngwee ngwullung je, ndi ari gwerre gwerre ndi Kirictu oꞌra, ke gwadi ji gwonyadu gïdïdlä, a ngwüjï ngwa gwuji yelenya yidi nginde gwanni gwucaar “gwïndälü mbüny.”
Bulij gworꞌtemaja ngwïkïrïjïnä ndi mätïnälü ꞌdïꞌdäny ndi ämnï Ngwaalu gwegen. Ngwugirinya ngwamiꞌri. Ngwuje ondaci ndi ari aar ape yiiru aar eny ngwuy ngwe ngwegen, anaku apaar gu yiiru, nginde gwani Bulij na ngwooꞌra ngwükäjäär je ngwuꞌter anni jaar Täjlänükï.
Yajang yidi ngwujaꞌri
1. Aganni (1.1–2)
2. Ortada na gwällïnï (1.3–12)
3. Enggaci gwani oꞌra gwudi Kirictu (2.1–17)
4. Ola gwani elelle gwudi ngwïkïrïjïn (3.1–15)
5. Mïꞌrä (3.16–18)
1
1 Ngwujaꞌri ngwee ngwïndï ꞌdänggärï Bulij na Jiliwanij na Timijawuj. Ngwükäcï nje giꞌdonga gidi Täjlänükïng gidi Ngwaalu ngwuru Papa gwege na Deleny dani Yicu Kirictu. 2 Ara je gu yïmïꞌrü na adatalu gwudi Ngwaalu ngwuru Papa gwege na Deleny dani Yicu Kirictu ji.
Yäy ꞌtu na otaci Ngwaalingalu
3 Yädï gu giyomon ꞌdar ndi nyii ci Ngwaalinga yäy ꞌtu gwani nga nga liru ngweengga aar gu ele kayalu no, ndi ari ämnï Ngwaalu gwalu nggwo gwuma ꞌtälü na ämnäjïdï gwalu nggwo ndi gendadi. 4 Yäy gu no nyii gilo lïrïngïnä je le giyiꞌdoonganu yidi Ngwaalu gwani orꞌtemaji na ämnï Ngwaalu gwalu na übïnälü na dïrbä danni ndo dorꞌtemaja gu. 5 ꞌDar giyee yinggida ndi ari obalu gwudi Ngwaalu gwätï ngwäyänü, yäy gu no la je ïꞌrä lädï giyelenyanu yidi Ngwaalu, yanni giyo yïyïjä je dïrbä. 6 Ngwaalu ngwüdünälü ling je reraji lanni lïcä je dïrbä 7 gwa je gataji düwä lanni gilo gïdïrbänü a gwunje gataji düwä ꞌto. Ya ji giyee ma Deleny dani Yicu ꞌtädälü kerala yïꞌrr ye yüngün yiru yiima, 8 lïgä le luꞌdu, ndi obalu ngwüjï ngwe ngwanni ngwaꞌti lïngïdï Ngwaalinga aar ꞌti ꞌdengenaja ngwujaꞌri ngwanni ngwujaw ngwudi Deleny dege dani Yicu. 9 La aar le obalu la geradalu geradingalu gwudi gwurꞌtaling la aar je längïtäjï poor ngwäyänü ngwudi Deleny na ndi näjï gwudi yiima yüngün 1.9 Ajaya 2.10 10 gomon nggäꞌdï gading ge oꞌra ndi näjïnï ngwüjï ngwe ngwüngün ngwanni ngwujuꞌru a ngwüjï ortada ngwanni ngwuma ämnï ꞌdünggüngün. Ngaa gilo ganu, ndi ari ngaa lämnä ngwujaꞌri ngwanni ngwondacara je.
11 Yäy gu no yiꞌral ye giyee kiꞌranu, nyii lati otaci Ngwaalingalu yomon reny gwani nga nga ndi ari ara je Ngwaalu ngwege gäbïcï ngaa aw ndi urnidi gwanni gwornacara je. Nyii otaci Ngwaalingalu ndi ari ara je Ngwaalu gataji düwä yiima ye yüngün ngaa medaji yiꞌral ꞌdar yanni yijaw yanni yibupa je ndi ärrï, na apepe gwanni gwati ila ämnï gwe Ngwaalu gwalu. 12 Nyii lotaca Ngwaalingalu yiꞌral ye giyee nunnu a ngwürïny ngwudi Deleny dege dani Yicu näjïnï ꞌdanggalanu ngaa näjïnï ꞌdünggüngün, gwani yïmïꞌrü yidi Ngwaalu ngwege na gwani Deleny dani Yicu Kirictu.