WAKITÀ UWANA MASLA
MATAPLA ANIK ATSETSÈR
À AZLA IBƏRANƏŊKOWEN
Lettre aux H'ebreux
1
Yesu la uwana aɗuwa azlaməna mapəh à atà gay à ahàl
uwana uwarà gesina
1 Dagay uwarà, aŋuvaw Zəzagəla apə̀hàhàh à azlababa gami madzidziga, aslàlàh à atà azlaməna mapəh à atà gay à ahàl à waŋ, apə̀h à atà gay la azlatetəvi anik anik gesina. 2 Zəzagəla apəhay tsəràh à lakana uwana makəɗ gəl à ahəŋ aŋa mas à waŋ aŋa Yesu. Ama lakana avà à anu Kona aŋha. Aguwà à uda kà la ahàl aŋa Kona aŋha, à uwana Zəzagəla apə̀h à anu, aɗahàŋ gudəŋ à vok. Zəzagəla afà à ahəŋ agəɗàŋ à afik kà masla aŋa makoray lakəl aŋa tatak gesina, 3 kà masla la uwana mənəŋa mazləɓay aŋa ndzəɗa aŋa Zəzagəla. Masla kà kalkal la Baba aŋha Zəzagəla. La gay aŋha tsikaslaga akə̀s dèwdèw tatak uwana la gudəŋ la vok. Aɗahà tetəvi anik à ahəŋ la uwatà la uwana Zəzagəla azə̀ɓ tsakana à azladza lakəl ala gesina, kà atà aŋa magay sətaka. La lig aŋa uwaga la ahəŋ, ahàd, adzà madzay la ahàl kaf aŋa Zəzagəla lakəl, kà makoray la masla.
Yesu kà aɗuwa azlamalika gesina
4 Gay gà la uwaga, Zəzagəla aɗahàŋ Kona aŋha, aɗuwa azlamalika gesina, kà uwana sləm uwana avà à Kona aŋha kà, aɗuwa aŋa azlamalika uwanay gesina. 5 Tetuw tetuw Zəzagəla apə̀h à azlamalika kiya uwanay aw:
ˈ‘Kak Kona gulo, dagay lakana azladza tadàsəlay la paraka.’ˈ✡ 1.5 2 Samuyel 7.14; Mahabay 2.7
Malika la ahəŋ tetuwa à uwana:
ˈ‘Gədàgay Baba aŋak, ŋgaha kadàgay Kona gulo’ˈ,
agòɗal aw. 6 Ama la kaslà uwana Zəzagəla asal masləl Kona aŋha à waŋ, uwana lakəl aŋa tatak gesina la gudəŋ la vok agòɗ:
ˈ‘Akul azlamalika gulo gesina sləkàwàw masla!’ˈ
7 Lakəl aŋa azlamalika kà, Zəzagəla agòɗ:
ˈ‘Aɗahà atà kà afaɗ gà, ŋgaha azlamayà aŋha, azlaalàh akàl aya babay.’ˈ
8 Ama lakəl aŋa Kona aŋa Zəzagəla kà, tatsetsèr à wakità Zəzagəla à abà lakəl aŋha kà:
ˈ‘Kak la uwana Zəzagəla, kadàkoray aŋa koksikoksi, kadàkor tsəhay aŋak lela.
9 Azlatatak dziriga gà uwana awoyaŋ, ama azlamawisiga kà, asa à ka atà aw, kapəsew atà aŋa tetuwa. Gay gà la uwaga, Baba aŋak Zəzagəla azalà ka, ŋgaha apakàkala məŋga gà la mav à ka maslay məŋga ɗaɗuwa à gay aŋa azladeda aŋak.’ˈ✡ 1.9 5Musa 32.43; Mahabay 45.6-7; 104.4
10 Zəzagəla agòɗ aya lakəl aŋa Kona aŋha:
ˈ‘Kak Sufəl dagay la madzəka, kak la uwana kaɗahà gudəŋ à vok la ahàl aŋak, la uwana kaɗahàŋ zagəla babay.
11 Dèwdèw tatak uwana kaɗahàŋ kà, adàdəv à gay, ama kà aŋak kà, kadàdza à ahəŋ bokuba uwana kak la ahəŋ la uwaga kiya uwaga uwanay aŋa koksikoksi. Azlatatak uwaga gesina tadàpakahay makoz bokuba azlalukut uwana atsəkway.
12 Bokuba uwana kakəl lukut à abà, kiya uwaga la uwana kadàkəl à abà aŋa mafay aslələf à gəl. Ama kak kà, kak la ahəŋ bawtawta madz à ahəŋ aŋak adàkəɗ gəl à ahəŋ aw.’ˈ✡ 1.12 Mahabay 102.25-27
13 Aga la ahəŋ amiyaka tekula aŋa azlamalika à uwana Zəzagəla apə̀hal gay kiya uwanay aw:
ˈ‘Dzà madzay la ahàl kaf gulo lakəl, tsəràh à uwana gəɗuw azlaməna məzam aŋak! Gəpaka azlaməna məzam aŋak bokuba azlatatak maf asik à afik aŋak.’ˈ✡ 1.13 Mahabay 110.1
14 Azlauwa azlauwana tapakà azlamalika uwa? Atà kà azlaməna sləray aŋa Zəzagəla. Zəzagəla asləl atà kà mad mazlak azladza uwana adàɓəl atà.