किर्स्तुना बळयि पोलु तीतुसनेनाह्क लोहतद सीटि
इद सीटटुन रासवाल किर्स्तुना बळयि पोलु आंदोग़. इद सीटटुन पोलु तीतुसिह्क रासतोग़. तीतुस यहुदि आयवोग़ मतोग़, पोलु सेवा कीनेके वेग़ येसुन विस्वस कीतोग़. कीसि पोलुना संगे सेवाते तोळ आंदोग़. पोलु तिमोतिना मुनेता सीटि रासतस्के तीतुसिह्क वने इद सीटि रासतोग़.
पोलु इद सीटटुन बाराह्क रासतोग़ इतेके, पोलु ओसो तीतुस करेते तोग़-देसेमतगा बेसता कबुरतुन ऐंगे पोकुर कीतोर, अस्के अगा विस्वसिरा मुल तयर आतोर. पया “पूना विस्वसिरिन ऊळेवळे कीसोर मनदलाह विस्वसिराङ मुक्यालोरिन निल्पिह कीम,” इनजोर पोलु तीतुसिन अगान विळ्सिस अतोग़. ओसो ओर मुक्यालोर बेद्रमतोर मनदना इद वने वेहतोग़. इद सीटटगा विस्वसिरिन सेतेमताङ पोल्लोङ बेद्रम काग़्हतना, विस्वसिर बेद्रम मनदना इनजोर पोलु तीतुसिन वेहतह्तोग़. ओसो उगसताङ पोल्लोने गिटोगटो आयवालेवा मनदलाह वने पोलु तीतुसिन इद सीटटगा वेहतह्तोग़.
1
सुरुताङ पोल्लोङ
1-4 तीतुस, नना पोलुनन, देवुळता कय इळ्न मनजि येसु किर्स्तुनाबळयिनन, नीक इद सीटि रासलाह आतन. माट इर्वल उंदिय पोल्लोतुन विस्वस कीताह्कु निमा नावा निटम मग़ना लेह्कान आतिन. देवुळबाबानाहि ओसो माक पिसिह केवाल किर्स्तु येसुनाहि नीक सुकमि, देय्वा दोर्कसोर मनि! नना अमेसाता पिसमुळता आसातेनाह्क येसुना सेवा कीय्ह्नन. देवुळ आचतोरु मन्कलोर विस्वसते बेर्सना, अहे देवुळता अग़दे ओसीयनद सेतेमतुन पुनदना इनजि, येसुसामि नाक बळयि इनजोर निल्पिह कीतोग़. इद पिसमुळतुन देवुळ आचतोरु मन्कलोर दोर्किह कीयनुर इनजोर बूमतुन पुटिह केवस्केन देवुळि करल कीता; देवुळि बेस्केन जोल वळ्ह्को. मति इंजेके देवुळि तना कगोते तना पोल्लोतुन पेसिह कीता. माक पिसिह कीयनद देवुळि तना पोल्लोतुन पोकुर कीयनद कबळतुन नावा कयदे ईसि नाक उकुम ईता.
विस्वसिरा मुडगा मुक्यालोरिन निल्पिह कीयनद पोल्लो
5 करेते इनदनद तोग़-देसेमतगा पिसिस मतद कबळतुन बेस-नेह्ना ओर्कुल कीकिन, ओसो सबे नाह्कनगा विस्वसिरा मुडुन ताकिह कीयलाहि मुक्यालोरिन निल्पिह कीकिन इनजोर वेहचि, नना नीक करेते तोग़-देसेमतगा विळ्सिस वातन. इद्रम कीम इनजोर मुनेन नीक उकुम ईतन. 6 इद्रमतोर मन्कलोरिन मुक्यालोर इनजि निल्पिह कीम: ओर बाताले कसुर दोर्कवप मनदना, दुस्राङ बेविस्कनके लालुस केवा उंदिय आंचान पोस काळ्ङवालोर, ओराङ पिलाङ-पेकोर विस्वसिर मनदना, लजालेवा करब कबस्क केवालोर, कैंगम आयवालोरु इनजोरे ओरिन बोग़े इनवोग़ मनदना. अद्रमतोर मन्कलोर मतेक-अचोन ओरिन विस्वसिरा मुक्यालोर इनजोर निल्पिह कीम.
7 विस्वसिरा मुडुन ताकिह केवाल मन्कल देवुळता लोतुन ताकिह केवाना लेह्कान आंदोग़. अदिह्क ओग़ बाताले कसुर दिसवोग़, कैंगम आयवोग़, केनेन ओङ आयवोग़, कल लोटि आयवोग़, जग्ळम केवोग़, कोताना लालुस केवोग़ मनदना गावले. 8 अहे ओसो बोर आयि ओना लोन वातेके बेस ऊळवाल, बेसता पोल्लोतुन विचर केवाल, बेस बुद कीसि तिरियवाल, सेतेमते मनवाल, देवुळतुह्क रेयसोर मनवाल, कुदतुन आव्रे केवाल मनदना गावले. 9 येसुनाङ बळयिर काग़्हतद बेस्केन चुकवद कबुरतुन पोस मनवाल मनदना. अस्केन चुकवाङ पोल्लोन काग़्हचि केंजवालोरिह्क दीरा ईया पग़यह्तोर, ओसो सेतेम पोल्लोतुन पास्कवालोर मन्कलोरिन सुद्रे कीया पग़यह्तोर.
विस्वसिरा मुडगा जोल काग़्हवालोरा पोल्लो
10 नना इद्रम बाराह्क रासिह्नन इतेके, करेते तोग़-देसेमतगा कैंगम आयवालोर वेल्लाटोर मन्ह्तोर. अहे उगसताङ वेहतह्तोर, ओसो मन्कलोरिन नाळेह कीस्तोर. उच्वुर यहुदि विस्वसिर कोनि इद्रम पका कीस्तोर. ओर बह इन्ह्तोर इतेके, सबेटोर विस्वसिर डायना रिवज कीयना इनजोर इन्ह्तोर. 11 इद्रमलेह्का ओप्पवव पोल्लोन काग़्हचि, वेल्लाङे लोह्कनगा लेसिह कीस्तोर. लाग्वा कबळते कोताङ कमय कीयलाह इद्रम कीस्तोर. इद्रमताङ ओप्पवव पोल्लोङ काग़्हवालोरिन केमेन कीयना गावले. 12 करेते देसेमतोग़ ओर्वोग़ सेह्नाल, तनाय देसेमतोर मन्कलोरिन इद्रम वेहतोग़: “करेतेतोर मन्कलोर जोलहालोर, जन्वरता बुदतोर, लंडालोर, उळ्बेर,” इतोग़. 13-14 ओग़ सेह्नाल वेहतद पोल्लो निटमे. अदिनेनाह्क यहुदिर वेहतनव उगसताङ पीटोन, सेतेमतुन पास्कवालोरा उकुमतुन केंजवा, सेतेम काग़्हमुळतुन पोस नमिर इनजोर विस्वसिरिन तेर्हचोर मन! 15 देवुळता मन्कलोरिह्क सबे तिंदलाह पोलिह्ता, मति पापमते करब आसि, किर्स्तुन विस्वस केवा मनवालोरिह्क बाताले पोलो. ओराङ विचर्क करबे, अहे ओरा नेह्ना-लाग्वदिन पुनदनद बुद वने करबे! 16 देवुळतुन पुतोम इनजोर सबेटोरा मुनेह ओर वेहतह्तोर, मति ओर जोल कीयलाह आतोर इनजोर ओराङ कबस्क तोहतह्ताङ. ओर देवुळतुह्क एग़्ङ वानाह मन्ह्तोर, ओर ताना पोल्लोतुन केंजवोर आंदुर, अहे बेदे बेसता कबळतुह्क ओजोर.