Ukalata ughwa kwanda ughwa Paabhuli kwa
Tiimoti
Shiisho shikutangila
Ukalata uyu akasimbighwa nu Paabhuli, umutumighwa ughwa Yeesu Kilisiti (1:1-2). Ukalata uyu akasimbighwa mu chinja icha malongo mahaano na limo ni fyinja fihaano (65) bhwo uYeesu Kilisiti aapaapighwa. Akasimba ukalata uyu bhwo ali mu chiisu icha Makendooniya (1:3).
UPaabhuli akamusimbilagha uTiimoti yuuyo akabha mutuuli ghwake ughwa papiipi (1:2-5, 2:1; Mbombo isha Bhatumighwa 16:1-5). UTiimoti akafumila mu kaaya aka Liisitila mu chiisu icha Aasiya. Ku kabhalilo aka, ichiisu ichi chifumukitwe ku ngamu iya Bhutuluki. Ughwise ughwa Tiimoti akabha Mughiliki, loole ungʼina yuuyo ingamu yaake akabha ghwi Yuniike, akabha Muyuuta (Mbombo isha Bhatumighwa 16:1). Ungʼinakulu yuuyo ingamu yaake akabha ghwi Loyisi, ghwepe akabha Muyuuta.
Inyango iya Paabhuli ukusimba ukalata uyu yikabha ya kumulingaania uTiimoti ukuti amanye muumwo abhiitiki bhakulondighwa ukwikalila ungati Bhakilisiti, muumwo akulondighwa ukubhalongosha abhiitiki nu kubhakaanisha abhandu ukuti manye bhamanyishange ifimanyisho ifya bhumyashi. Soona, uPaabhuli akalondagha ukuti uTiimoti amanye muumwo abhaghiile ukubhasala abhosongo abha chipanga abhiisa (3:14-15).
Inyango inine yikabha ya kuti uTiimoti yuuyo mubhombi ghwa Chaala, abhange chifwanikisho ichiisa ku bhandu bhooshi (4:12) nu kubhaafwa abhiitiki mu ndamyo shaabho shiisho bhali nasho mu bhupamupeene bhwabho.
1
UPaabhuli akumulamuka uTiimoti
1 Ukalata uyu akufuma kukwangu une ni Paabhuli, nee indi mutumighwa ughwa Kilisiti uYeesu. Une isaliighwe ku lulaghilo ulwa Chaala uMupoki ghwitu na ku lulaghilo ulwa Kilisiti uYeesu. Umwene ghwe yuuyo lusuubhilo lwitu. 2 Ingukusimbila ughwe ghwi Tiimoti ghwe uli mwana ghwangu ughwa nalooli mu lwitiko. Ingusuuma ukuti ichisa nu lutengaano ukufuma kwa Taata uChaala na kwa Kilisiti uYeesu uMalafyale ghwitu fibhange pamupeene nuughwe.
Isoki ku bhamanyishi abha bhumyashi
3 Ingulonda ukuti ushaale mu kaaya aka Efesi ukuti ubhakaanishange abhandu bhamu ukuti manye bheendelelaghe ukumanyisha ifimanyisho ifya bhumyashi. Ubhombaghe ulwo isa muumwo ingakusuuma bhwo ingutiila nu kubhuuka mu chiisu icha Makendooniya. 4 Soona ubhakaanishange abhandu ukuti manye bheendelelaghe ukupokeela utupango utwa bhumyashi pamupeene nu tupango utwa fikolo ifya bhosekulu bhaabho. Utupango utwo tukupela ubhukindane ukukinda ukubhaafwa abhandu ukumubhombela uChaala mu lwitiko. 5 Inyango yangu ku lulaghilo ulu kukwako ya kuti abhandu bhabhange nu lughano ku bhanine, luulwo lukufuma mu ndumbula inyeelu, mu nyinongʼono inyiisa na mu lwitiko ulwa nalooli. 6 Abhandu bhamu bhalekite ukubhomba isho, loole abheene bhasobhite nu kusanukila ukuyughisania shiisho shitakwafwa naakamu. 7 Abhandu abho bhakulonda ukubha bhamanyishi abha ndaghilo isha Chaala,* 1:7 Abhamanyishi abha ndaghilo isha Chaala Bhelenga ishu ilya Abhamanyishi abha ndaghilo isha Moose ku Mashu aMaheesha. loole bhatakushaaghania shiisho bhakuyugha ku maka ku bhandu.
8 Tumeenye ukuti ululaghilo lwisa linga abhandu bhakubhombela mu bhwanalooli. 9 Loole tumanye ukuti indaghilo isha Chaala shitaliipo ku nongwa iya bhandu bhaabho bhakumwitika, loole shiliipo ku nongwa iya bhandu bhaabho bhatakukonga indaghilo na bhaabho bhakukaana ukumughindika. Soona shiliipo ku bhandu bhaabho bhakubhomba imbiibhi, bhaabho bhanyali, bhaabho bhakumufuuya uChaala, bhaabho bhakubhaghogha abhapaapi bhaabho pamu abhandu abhanine. 10 Soona, indaghilo isho shiliipo ku nongwa iya bhandu abhashipani, ku bhaliisha bhaabho bhakughonana bheene-bheene, bhaabho bhakubhaghulisha abhandu abhanine, abhamyashi na bhaabho bhakuloolika ku bhumyashi ni mbombo inine shiisho shikukaanikana ni fimanyisho ifya nalooli. 11 Ifimanyisho ifyo fili mu Nongwa iNyiisa ukufuma kwa Chaala uMughindikighwa nu ghwa lusayo. INongwa iNyiisa isho sho shiisho akaamba ukuti indumbililaghe ku bhandu.
UPaabhuli akumupaalisha uChaala ku chisa chaake
12 Ingumupaalisha uKilisiti uYeesu, uMalafyale ghwitu yuuyo aambiile amaka, paapo akaambona ukubha mubhombi umusubhaalilighwa. Akaambiika ukuti imbombaghe imbombo yaake, 13 pamupeene nu kuti kubhwandilo ingamutukagha nu kumufuyula. Pamupeene nu kuti ingabhakolagha nu kubhafulasha abhandu bhaake, poope akaambelela ichisa paapo ingashibhombagha isho mu bhulema na ku nongwa iya kushita kubha nu lwitiko. 14 Soona, uMalafyale ghwitu akaambelela ichisa ngaani, akaamba ulwitiko nu lughano ku nongwa iya kubha pamupeene nu Kilisiti uYeesu.
15 Ubhuyughi ubhu bhwa nalooli bhuubhwo abhandu bhooshi bhakulondighwa ukubhupokeela ukuti, “UKilisiti uYeesu akiisa mu chiisu ukuti abhapoke abhabhomba mbiibhi.” Mu bhabhomba mbiibhi abho, une nee mubhomba mbiibhi ukukinda bhooshi. 16 Yo yiiyo nongwa iyi uKilisiti uYeesu akaambelela ichisa une nee indi mubhomba mbiibhi ukukinda bhooshi ukuti ku sila yangu, alangishe ubhukifu bhwake bhwoshi. Soona akabhomba isho ukuti imbe chifwanikisho ku bhala bhaabho bhabhaghiile ukumwitika nu kupokeela ubhwumi ubhwa bhwila na bhwila. 17 Ulu, ulughindiko nu bhukulumba fibhange pamupeene naghwe amashiku ghooshi. Umwene ghwi Malafyale yuuyo atali nu bhumalilo, yuuyo atakufwa, atakubhoneka, soona ghwi Chaala yuuyo ali mweneeshe bhwila na bhwila. Ameni.
UPaabhuli akumulaghila uTiimoti ukukoleelela ulwitiko
18 Ghwe mwana ghwangu Tiimoti, ingukupa ululaghilo ulwo ukukongana na mashu agha bhusololi ghaagho ghakayughighwa ku nongwa yaako ughwe ukufuma kubhwandilo. Ingukupa amashu agho ukuti ghakwafwange ukulwa ubhwite ubhwisa.† 1:18 Ubhwite ubhwisa Kwo kuti, bhwite ubhwa kulwila ulwitiko ulwa Bhukilisiti, ukwendelela ukulingaania ulwitiko ulwa Bhukilisiti ku bhandu bhaabho bhakubhukaana nu kumanyisha isha bhumyashi. 19 Koleelelagha ulwitiko nu kubhomba shila shiisho umeenye ukuti nyiisa. Abhandu bhamu bhakaanite ukubhomba shiisho bhameenye ukubha sha nalooli, ilyo libhapeliile ukukomania ulwitiko lwabho. 20 Mu bhandu abho yumo ghwi Himenaayo,✡ 1:20 2 Tiimoti 2:17-18 nu munine ghwi Alekisanda, abhandu bhaabho imulekiile uSeetano‡ 1:20 Bhelenga ingamu iya USeetano ku Mashu aMaheesha. ukuti bhamanyile ukuleka ukumufuyula uChaala.
*1:7 1:7 Abhamanyishi abha ndaghilo isha Chaala Bhelenga ishu ilya Abhamanyishi abha ndaghilo isha Moose ku Mashu aMaheesha.
†1:18 1:18 Ubhwite ubhwisa Kwo kuti, bhwite ubhwa kulwila ulwitiko ulwa Bhukilisiti, ukwendelela ukulingaania ulwitiko ulwa Bhukilisiti ku bhandu bhaabho bhakubhukaana nu kumanyisha isha bhumyashi.
✡1:20 1:20 2 Tiimoti 2:17-18
‡1:20 1:20 Bhelenga ingamu iya USeetano ku Mashu aMaheesha.