Ebbaluŋa eyohubiri eya
Peetero
Enyanjula
Owaŋandiiha ebbaluŋa ya Peetero eyohubiri gaali nje Peetero omuhwenda wa Yesu. Aye bangi hu bahugu mu byʼEbbayibbuli baŋeega baati sinje niye. Owaŋandiiha aloma ati ebi gaŋandiihaho, gabibona nʼemoni jije (1:17-18). Ni hiba ti Peetero njʼowaŋandiiha ebbaluŋa yino, gayiŋandiihira e Rooma ŋagati wʼomwaha gwʼenkaaga nʼetaanu nʼenkaaga namwenda oluvanyuma lwʼohusaaliwa hwa Kurisito. Peetero omwene aloma ati ebbaluŋa yino yaali yahubiri (3:1). Era gayiŋandiihira abafugiirira Kurisito bosibosi.
Peetero gaŋandiiha ebbaluŋa yino ohugobosa mu bafugiirira Kurisito amaani nʼohubahubbirisa ohugendera mu bulamu obusangaasa Hatonda era nʼohubalabula behuume abasomesa abʼobudulingi.
Ebiri mu bbaluŋa yino mu buupi
1. Peetero geyanjula (1:1-2).
2. Abahebulisa ohuba nʼobulamu obusangaasa Hatonda (1:3-21).
3. Ohulabula behuume abasomesa abʼobudulingi (2:1-22).
4. Peetero agobosa mu bafugiirira Kurisito amaani babe nʼobulamu obusangaasa Hatonda ko Yesu gahagobola mangu (3:1-17).
1
1 Simooni Peetero omuŋeeresa era omuhwenda wa Yesu Kurisito mbaŋandiihira enywe abaasuna ohufugiirira ohwʼomuŋendo hyefe olwʼobulaŋi wa Hatonda era Omunoŋosi weefe Yesu Kurisito. 2 Ehisasabirisi nʼemiyaaya byeyongere ohuba ni nenywe olwʼohumanya Hatonda ni Yesu Musengwa weefe.
Obulamu obulaŋi era obusangaasa
3 Hatonda ni gatulanga, mu buŋangi wuwe gaatuŋa byosibyosi ebi huli nʼohuba ni nabyo ko husobole ohumusangaasa nʼohugabana hu ŋono nʼowabufu wuwe olwʼohumumanya. 4 Gaatuŋa ebisuubise bibye ebyʼamaani era ebyʼomuŋendo. Ebisuubise ebyo njʼebituleetera ohuba nʼobulamu hyʼobuwe ni hutahola ebi batafugiirira bahola olwʼohwegomba hwʼemibiri jaawe. 5 Olwʼehyo, mugesyengaho bugali hu hufugiirira hwenywe ohumeedaho ebikolwa ebiraŋi, hu bikolwa ebiraŋi ebyo mumeedeho ohumanya ebi genda. 6 Hu humanya ebi Hatonda genda, mumeedeho nʼohuŋuga emitwe jenywe, hu ehyo mumeedeho ohwehaliriha, hu hwehaliriha, mumeedeho ohusangaasa Hatonda. 7 Hu husangaasa Hatonda, mumeedeho ohwenda abalebe, hu hwenda abalebe, mumeedeho ohwenda abaatu bosibosi. 8 Singa obulamu wenywe weyongereranga nʼamaani ohuba butyo, ohumanya ohuhumanyire Musengwa weefe Yesu Kurisito huja hubabera hwamugaso. 9 Aye omuutu yesiyesi aŋuma ebiitu ebyo mu bulamu wuwe, saabona ŋaleeŋi, ali hyʼomuŋofu aŋooye emirimo era gebirira ati Hatonda gamwogaho ebibi bibye.
10 Olwʼehyo aboluganda, mufubenga bugali ohulaga muuti Hatonda gabatobola, gahena gabalanga ohuba baatu babe. Singa muhola muutyo, simuja huleheraŋo ohumufugiirira. 11 Era baja hubasangalira bugali weene mu buŋugi wa Musengwa Yesu Kurisito Omunoŋosi weefe owʼemirembe nʼemirembe.
12 Nja hubahebulisanga ebiitu ebyo habuhyabuhya wayire nga mubimanyire era mumanyiye erala amazima agaŋamba hu Yesu. 13 Peega ti hiraŋi ni kiiri hu hyalo huno ohweyongera ohubahebulisanga ebiitu ebyo, 14 olwohuba manyire ti natere ohuŋwa mu hyalo hino, Musengwa weefe Yesu Kurisito ganjibiraho ehyama ehyo. 15 Cʼehigira nja hugesyaho ohubahebulisa ebiitu ebyo ko mutebirira ni ndiba tiinire.
Ebyaŋandihiwa byʼamazima
16 Ebi hwabalomera hu buŋangi nʼohugobola hwa Musengwa weefe Yesu Kurisito, sibyali byamujengejo aye hwabalomera ebyeŋunjisa ebi hwabonaho nʼemoni jeefe. 17 Hwaliŋo Hatonda seefe olu gamutwiha eŋono era galoma nʼejanjaasi eryʼamaani ati, “Ono njʼOmwana wange omuhoda oyu nenda era owunesiimisa.”* 1:17 Mat 17:1-5; Mar 9:2-7; Luk 9:28-35 18 Ni hwali hu lusozi olwawufu ni naye, efe hwabeene hwaŋulira ejanjaasi eryo nʼamatwi geefe, Hatonda nʼaloma ebibono ebyo. 19 Ehyo hituŋa obuhahafu bwʼebibono byʼabanaabbi, era mwesi hibahola bulaŋi ohubitaho omwoyo. Ebibono ebyo biri hyʼenjase mu hiirema era bija husigala ni bibaŋa enjase mu myoyo jenywe ohwola olu bulihya Yesu ali hyʼemunyeenye suulwe aligobola. 20 Muli nʼohumanya muuti ebibono byʼabanaabbi, sibyali byawe hu waawe,* 1:20 Ebyaŋandihiwa ebindi biroma biiti “...muhebulire muuti eŋuma aŋanga ohunyonyola obunaabbi hu buwe.” 21 olwohuba eŋuma buhwenda obu naabbi galomera abaatu ni biri bibono bibye omwene. Aye Omwoyo Omutukuvu njʼowabaluŋamyanga ohuloma obuhwenda owaŋwanga eyiri Hatonda.