RI NABꞌE WUJ RI XUTZꞌIBꞌAJ RI JUAN
Majibꞌal re
We wuj riꞌ ubꞌiꞌnam nabꞌe Juan xtaq bꞌik chike jupuq winaq e kojonelabꞌ ri e kꞌo pa jun kꞌulmatajik ri man qas ta kꞌyaqalik. E kꞌo jujun chike xkitzaq kan ri kikojobꞌal che ri Jesús rumal che ri xkꞌut chikiwach chi ri Dios xpe pa tyoꞌjal we kꞌutuꞌn riꞌ man kajunumataj ta rukꞌ ri kichomanik ri winaq aꞌj Grecia ri kubꞌij chi ri utyoꞌjal ri winaq itzel wi, xwi ri ruxlabꞌal utz. Pune jeriꞌ, man kakikoj taj chi kꞌo ri Mesías, xaq mak kakilij ubꞌanik, kakitzijoj rij ri loqꞌanik xuqujeꞌ kakibꞌij chi ketaꞌm uwach ri Dios xuqujeꞌ e rech ri Dios. Kakibꞌij chi ri kakil aꞌreꞌ pa ri uxlabꞌal kubꞌan chike chi e kꞌo na chikiwach ri e kachiꞌl are waꞌ xkikꞌutu are xkitzaq kanoq ri kikojobꞌal.
Ri xekanaj kanoq sibꞌalaj xexibꞌixkanoq man qas ta kꞌyaqalik ri xkꞌut chikiwach. Rumal waꞌ jun chike ri winaq qas xril ri Jesús xutzꞌibꞌaj chike ri winaq ronojel ri kitom loq pa ri majibꞌal re ronojel.
Ri tzꞌibꞌal re we wuj ri man kuqꞌalajisaj taj jas ri ubꞌiꞌ xa kꞌu tzi qꞌalaj chi are ri taqoꞌn Juan jeriꞌ rumal ronojel ri tzij ri kubꞌij kajunumataj rukꞌ ri wuj re ri utz laj tzij re Juan.
Ri wuj kuqꞌalajisaj chi ri Mesías xpe pa tyoꞌjal xuqujeꞌ kukꞌyaqabꞌa ubꞌixik chike ri kojonelabꞌ chi aꞌreꞌ etaꞌmaninaq ri qas tzij.
Kꞌisbꞌal re kubꞌij jas rajawaxik kenoꞌjin ri ketaꞌm uwach ri Dios.
1
Ri tzij ri kuya kꞌaslemal
1 Ri kꞌo wi loq are majoꞌq katik ronojel ri jastaq, ri xqato, ri xqil rukꞌ ri qabꞌoqꞌoch, ri qas xqachap rukꞌ ri qaqꞌabꞌ, ri tzij ri kuya kꞌaslemal, are waꞌ ri kaqatzijoj chiꞌwe. 2 We kꞌaslemal riꞌ xukꞌut ribꞌ chiqawach rumal waꞌ kaqatzijoj xuqujeꞌ kaqaqꞌalajisaj chiꞌwe ri jun alik kꞌaslemal ri ojer kꞌo rukꞌ ri Tataxel Dios. 3 Kaqatzijoj chiꞌwe ri xqilo xuqujeꞌ xqato rech kꞌo qariqoj ibꞌ iwukꞌ, xuqujeꞌ rukꞌ ri Tataxel Dios, rachiꞌl ri ukꞌojol Jesucristo. 4 Kaqatzꞌibꞌaj we jastaq riꞌ chiꞌwe rech qas katzꞌaqat ri qakiꞌkotemal.
Chujbꞌinoq pa ri tunal
5 Are waꞌ ri tzij ri xubꞌij ri Cristo chaqe, rumal riꞌ kaqatzijoj chiꞌwe: Ri Dios are tunal, maj qꞌequꞌmal rukꞌ Areꞌ. 6 We kaqabꞌij chi kꞌo qariqoj ibꞌ rukꞌ ri Cristo kꞌa te riꞌ xaq jeꞌ uj kꞌo pa ri qꞌequꞌmal, xaq uj bꞌanal taq tzij riꞌ, man tajin ta kaqanimaj ri Dios. 7 We uj kꞌo pa ri tunal, jacha ri Cristo kꞌo pa ri tunal, kꞌo qariqoj ibꞌ riꞌ kukꞌ nikꞌaj chik, xuqujeꞌ ri ukikꞌel ri Cristo, ukꞌojol ri Dios are kujchꞌajchꞌobꞌen che ronojel uwach mak.
8 We kaqabꞌij chi maj qamak, uj bꞌanal taq tzij riꞌ, man uj kꞌo ta riꞌ pa ri qas tzij. 9 We kaqatzujuj qibꞌ che ri qamak, ri Dios ri sibꞌalaj sukꞌ ri kubꞌano ri kubꞌij, kujukuy na xuqujeꞌ kujuchꞌajchꞌobꞌej na che ronojel uwach etzelal. 10 We kaqabꞌij chi man uj makuninaq taj, tajin kaqabꞌij riꞌ chi ri Dios xaq bꞌanal tzij, xuqujeꞌ man kꞌo ta riꞌ ri utzij pa qanimaꞌ.