RI UKABꞌ WUJ RI XUTZꞌIBꞌAJ RI PABLO CHE RI TIMOTEO
Majibꞌal re
Ri Pablo xuya kanoq ri rachiꞌl Timoteo pa ri tinimit Éfeso rech jeriꞌ kachakun kukꞌ ri jujun kꞌamal taq bꞌe re ri komontyox ri man keniman taj. Ri Timoteo are xuriq kꞌax, ri Pablo xtzalij pa Éfeso.
Ri Pablo are kꞌo pa cheꞌ pa ri tinimit Roma, xutzꞌibꞌaj apanoq che ri Timoteo chi rajawaxik kuchajij ribꞌ che ri Alejandro rumal che ri Alejandro xubꞌan kꞌax che ri Pablo are xkꞌojiꞌ chilaꞌ pa Éfeso. Ri Pablo xusikꞌij apanoq ri Timoteo rech kape chusolixik.
Ri Pablo xubꞌij chike ri Figelo rachiꞌl ri Hermógenes chi man kakibꞌan ta chi ri kꞌamoj bꞌe, man xkita ta kꞌut ri xbꞌix chike xane xkibꞌan kikꞌulel che ri Pablo.
E kꞌo xuqujeꞌ nikꞌaj winaq chik xkibꞌan kachiꞌl chike ri man keniman taj xeꞌkimenkꞌetij ri winaq rech kakijelechꞌuj ri kibꞌe rech are kakilij ubꞌanik ri tijoj chuqꞌabꞌ pa tzij xuqujeꞌ man keniman taj, rech keꞌl kanoq pa ri kꞌaslemal re chꞌajchꞌojil xuqujeꞌ nimanik. Ri Timoteo xkꞌistaj ukꞌuꞌx xuqujeꞌ xuxiꞌj ribꞌ, rumal riꞌ ri Pablo pa ri uwuj kuya chuqꞌabꞌ rech kabꞌan takꞌalem pa ri kojobꞌal rech ri utz laj tzij pune kakam jun rumal we riꞌ. Ri Pablo xuqujeꞌ kunaꞌtaj che ri Timoteo chi are kanaqajir loq ri qꞌij re ri upetibꞌal ri Jesús ri kape na jetaq jun nim taqanel, kepe na kꞌaxkꞌolal, kepe na esal taq kiwach ri e qꞌalajisal taq utzij ri Dios, bꞌanal taq tzij taq winaq, kꞌaxkꞌolal are waꞌ ri kuya na qꞌatebꞌal chike ri e kojonelabꞌ che ri Dios. Ri Pablo kutaqchiꞌj ri Timoteo rech kanaꞌtaj che ri utz laj tzij are chi ri Jesús ri Rijaꞌl ri David xkꞌastaj chikixoꞌl ri kaminaqibꞌ xuqujeꞌ kuqꞌalajisaj ri tyoxalaj wuj ri retaꞌmam ri Timoteo pa ri ralkꞌaꞌlal are waꞌ katoꞌw na chubꞌanik ri utz laj chak.
1
1 Ri Pablo, taqoꞌn rech ri Cristo Jesús rumal ri rayibꞌal ukꞌuꞌx ri Dios, rumal ri kꞌaslemal ri chiꞌtal loq, ri yaꞌtal chaqe pa Cristo Jesús, 2 che ri loqꞌalaj nukꞌojol Timoteo: Are ri Tataxel Dios xuqujeꞌ ri Cristo Jesús ri Ajawxel cheyoꞌw toqꞌobꞌ, toqꞌobꞌisan wach, xuqujeꞌ jaꞌmaril chawe.
Tzijonem chirij ri jeqelem
3 Are katnaꞌtaj chwe chi paqꞌij chi chaqꞌabꞌ pa ri nuchꞌawem, kintyoxin che ri Dios, ri kinpatanij rukꞌ chꞌajchꞌoj laj chomabꞌal jacha ri xkibꞌan ri watiꞌt numam ojer. 4 Xuqujeꞌ are kanaꞌtaj ri uwaꞌl awach chwe, are xinel loq, kawaj katinwil chi junmul, rech kinnoj che kiꞌkotemal. 5 Xuqujeꞌ kanaꞌtaj chwe ri akojobꞌal ri qas ko kꞌolik, ri xutaqchiꞌj nabꞌe ri awatiꞌt Loida xuqujeꞌ ri anan Eunice, chanim kꞌut tajin katutaqchiꞌj at. Qas wetaꞌm chi jewaꞌ tajin kakꞌulmatajik.
6 Rumal waꞌ kawaj chi kakꞌasbꞌaꞌ ri usipanik ri Dios, ri xakꞌamawaꞌj are xinya ri nuqꞌabꞌ pa awiꞌ. 7 Rumal cher ri Dios man xuya taj jun uxlabꞌal rech xibꞌin ibꞌ chaqe, xane jun rech kwinem, loqꞌanik, xuqujeꞌ uj kujchoman ri kaqabꞌano. 8 Xaq jeriꞌ man kakꞌixibꞌej ta uqꞌalajisaxik ri Ajawxel, xuqujeꞌ man kakꞌixibꞌej ta nubꞌixik in, rumal xa rumal rech ri Cristo in tzꞌapital pa cheꞌ. Je xuqujeꞌ ri at, rajawaxik rukꞌ ri ukwinem ri Dios, kakochꞌ ri kꞌaxkꞌolal rumal ri utz laj tzij. 9 Rumal cher ri Dios xujukolo xuqujeꞌ xuya sikꞌinik chaqe pa ri jun tyoxalaj kꞌaslemal, man xa ta rumal ri qachak, xane rumal ri utoqꞌobꞌ xuqujeꞌ ri uchaꞌnik loq. Xuya loq we toqꞌobꞌ chaqe pa Cristo Jesús, are majaꞌ kamajitaj loq ri qꞌotaj. 10 Kamik kꞌut xuqꞌalajisaj rukꞌ ri upetibꞌal ri qakolonel Cristo Jesús, ri xutukij ri kamikal xuqujeꞌ xukꞌam la pa ri tunal, ri kꞌaslemal ri man sachel ta uwach, rumal ri utz laj tzij.
11 In xinux taqoꞌn, ajtij, xuqujeꞌ tzijol rech we tzij riꞌ. 12 Rumal waꞌ kinriq kꞌax. Man kinkꞌix ta kꞌut rumal cher wetaꞌm jachin che in kojoninaq wi, xuqujeꞌ kuꞌl na kꞌuꞌx chi kꞌo ukwinem chinuyakik pa ri kꞌisbꞌal qꞌij, ri wayeꞌm.
13 Chatereneꞌj ri kꞌutuꞌn ri xawetaꞌmaj wukꞌ, rukꞌ kojobꞌal xuqujeꞌ loqꞌanik pa Cristo Jesús. 14 Chachajij ri jeꞌl laj kꞌutuꞌn rukꞌ ri ukwinem ri Tyoxalaj Uxlabꞌixel, ri kꞌo pa qanimaꞌ.
15 Awetaꞌm chi konojel ri keꞌl pa taq ri tinimit rech Asia xinkitzaq kanoq, e kachiꞌl ri Figelo xuqujeꞌ ri Hermógenes. 16 Are bꞌa ri Dios toqꞌobꞌisan kiwach ri winaq ri e kꞌo pa rachoch ri Onesíforo, rumal kꞌi mul, xinkitaqchiꞌj, man xekꞌix ta chwe, pune in kꞌo pa cheꞌ. 17 Xuqujeꞌ are xopan pa ri tinimit Roma, xinutzukuj kꞌa xinuriq na. 18 Are bꞌa ri Ajawxel chutoqꞌobisaj kiwach pa ri qꞌij rech chilaꞌ chikaj. Awetaꞌm ronojel ri patanijik ri xubꞌan wukꞌ pa ri tinimit Éfeso.