PITAR
lokv Lvnyinvbv Siti Jinam
Mintamchonam
Pitar gv Lvnyinvbv siti lvknam si kvvlo lokv kristan richo kunv vdwgv lvgabv mvngla lvkdam talv toku. Soogv lvgingla lvkdam jvnam si oogv mvvlarula tamsar sarmurnv vdwgv kudungkua okv gwngmur singmurnv vdwa mvdarminsu monam lvgabv. Svkvnv mirwk lwktak minsu dula adwkaku am paakunam si Pwknvyarnv gv chinampanam okv Ahtu Jisu Kristo gv jvjvrungnv chinam am gakbwngla nyi dukunv sum, Jisu Kristonyi oogv awv Jisunyi kaakunv nyi okv ninyi bunu vdwgv tamsar kunama tvvkunv. Lvknv gv lvkdum jvnamv yvvbunudw Kristo lvkodv aaku mare vla tamsarnv vdwa lvkrwk sila lvktoku, ninyigv minamv Kristo gv chintola aakur manamv Pwknvyarnv “yvvnyika ngoomu so mvngma vbvritola bunua rimur lokv mvngdin kusvgo vla mvngyadunv.” Vkvnv siti lvknv vdwv Jisu lvkodv aaku mare vla jvjvklvbv maatar alvbv mvvla lvkdu. Hv vbv minjito Jisu Kristo gv aakur kumakv vnam si Pwknvyarnv “yvvnyika simungomu nvpv vla mvngma dunv, vbvritola mvnwng ngv adwnamar gv rimur lokv adu modukubv mvngdu vla mvvla ridu.”
Arwng lokv darlinnam
Mintamchonam (1:1-2)
Kristan bv goknam (1:3-21)
Tamsar sarmurnv (2:1-22)
Jisu Kristo gv aakur kusvlvga (3:1-18)
1
1 Jisu Kristo gv pakbu akobv rinv okv ngo Apostol Simon Pitar lokv—
Ngonugv aingbv Pwknvyarnv gvlo tarwkbak yachoknv lamtv lokv okv ngonugv ringnvbaanv Jisu Kristo gv lokv arvdoya choknv mvngjwng jinam vdwlo kumrwksinam gaamv:
2 Pwknvyarnv okv ngonugv Ahtu Jisunyi nonugv chinam lokv nonu gvlo akomaring bv anyuaya namv okv sarsopoyo namv doolwk yilaka.
Pwknvyarnv gv gakla okv goknam
3 Yvvdw ngonua ninyigv yunglit okv alvnam baak dubv* Ninyigv yunglit okv alvnam baak; Kvvgonv kitap lo doodu Ninyigv gv lokv. vla ngonua goknv, um ngonu chinggv rila jvjvnv dormo singdunglo singnam lvgabv ogu ogugo dinchi pvkudw ho mvnwng nga Pwknvyarnv gv kairungnv jwkrwa ngonua jitoku. 4 Svkvnv lamtv lo hv milvkunam lo arv doyachoknv okv achialv bv kainv amin am jitoku, svbv amin jiku sokv nonu nyiamooku sokv yonwngla mvyakmvchak nam lokv kilin dukubv, okv Pwknvyarnv ridung nga paaming gvvdu kubv. 5 Holvgabv vbvrinamv nonugv lvgvlvma lokv nonugv mvngjwng lo alvnam am lwkpwng toka; nonugv alvnv chingkikpakik nama lwkpwng toka. 6 Nonugv chingkikpakik nam lokv saktv nvnvlo lwkpwng toka; nonugv saktvnam lokv himv gvnvlo lwkpwng toka; nonugv himvnam lokv Pwknvyarnv mvngnam am lwkpwng toka; 7 nonugv Pwknvyarnv mvngnam lokv kristan pakmi sinama lwkpwng toka; okv nonugv kristan pakmi sinam lokv paknama lwkpwng toka. 8 Sikvnv alamai am nonu dinchi svngv, okv nonu gvlo bunua doolwk mobolo, vv bunu nonua ngonu Ahtu Jisu Kristo gv chingkikpakik am nonu gvlo asaryaung more okv chvrv more. 9 Vbvritola soogv vdwsi yvvbunu gvlo dooma dudw bunu abwkajek mabv ho nonu kaapa nyomadu okv nonugv kvvlo rimur rikunam am kakpung kunam am mvngpa kuma duku.
10 Vkvlvgabv, ngoogv ajin vdw, nonua Pwknvyarnv gv goknam am okv ninyigv gaknam am doobwng rungdubv ritolaka; holvgabv svkvnv sum nonu vbvribolo nonugv mvngjwng nam sum vdwloka kayu mare.† Nonugv mvngjwng nam sum vdwloka kayu mare; Vmalo Rimur lo holunam. 11 Svkvnv riku lamtv lokv nonugv Ahtu okv ringnv Jisu Kristo gv turbwngjiku karv lo aala dubv Pwknvyarnv jire.
12 Okv nonu vdwv jvjvrungnv sum adakrungbv hargap pvvla laarwk pvvsudu okv bunua chinpvvla doodu vbvrijvka svkvnv sum ngo nonua mvngpa la ribvre. 13 Ngoogv turyi dvdv so svkvnv vdw sum nonuam mimpa yala miyar yanam si ngoogv tarwkbaknv kudungkua ngv vla mvngsu dunv. 14 Ngonugv Ahtu Jisu gv nga mindalvpa bv minjinam aingbv, ngoogv so nyejikunv adwnamar sum kayu yiku nvpv vla ngo chinsudu. 15 Vbvrikunamv, ngoogv siro kokwng lojvka svkvnv sum nonu lvgabv mvngpa bvbv sila dubv, ngo vdwgo lvgvlvmabv risv vdw vkvgo rila vvpv jire.
Kristo gv yunglit am kaanv mvnwng ngv
16 Ngonu Ahtu Jisu Kristo gv kairungbv aasv nga chimu dubv vla mvnammvsubv higu mvnam vdwa mvngging madunv. Ninyigv Kairungnv am ngonu nyikdadw lo kaatar lwknam lokv minji doonv. 17 Mt 17:1-5; Mk 9:2-7; Lk 9:28-35 Vdwlo hv mvngdv okv yunglit nama, Pwknvyarnv Abu gv lokv jito kubvdw ngonu hoka dooto, vdwlo ninyia vlvgo aala Kaiyachokbv Yunglit kunv gv lokv vbv minjila, “Si ngoogv Paknam Kuunyilo ngv, ngo ninyia alvrungbv mvngpu dunv!” 18 Vdwlo ngonu darwknv moodw lo ninyigv lvkobv doola riyilo, ngonu atubongv awv soogv vlv nga nyidomooku lokv aadu bv tvvtar lwkto.
19 Vbvrikunamv nyijwk vdwgv doin japgo kunama ngonu alvyabv mvngjwng yaya duku. Nonu svkvnv sum alvjvbv tvvgap suto laka, ogulvgavbolo Sikvnv si mvdurupum aingbv ridu oogv kanvparam lo loung bv arupua lobv hunglwknam apiabv okv nonugv haapoklo arukamchi gv karlumpumbum loung ngv hunglwkdu. 20 Ogubvrijvka, mvnwng gv aolo sum mvnggap tvlaka yvvka Darwknv Kitap lo nyijwk vdwgv nyikrw kaanama atubogv yvvka minbwk jila nyumare. 21 Vkvlvgavbolo nyijwk vdwgv doin milwk minamv vdwloka nyia mvngnam lokv aamato, vbvritola Pwknvyarnv gvlokv aanv doina nyi vdwgv japyilo japnv vdwv Darwknv Dow gv arwnglo doonyato.