METIU
gv Gamlv Milambv
Mintamchonam
Metiu gv Gamlv milambv milinjinam si Jisunyi milvkunam Ringnvbaanv gubv mintoku, Pwknvyarnv gv Aku Pvbv lo ninyigv nyi vdwgvlo milvkunam ha rilinjikunv akobv mintoku, so alvnv yunying si Jisunyi bvnglwkku, Jius nyi vdw gvngv mwngma, vbvritola nyiamooku nyi mvnwng gvngv vla minpadu. Metiu sum alvrungbv lvkpv jipv. Si Jisunyi kuubvnglin nama minrapla, ninyigv baptisma naanam okv pokayarka nama minpa jila, okv vbvrikunamv ninyigv ridungripa rirapla doin japgola tamsar kunam ha, okv Galili lo mvpuripunam lobv lvkpv jidu. Ho kochingbv Gamlv lo Jisu gv Galili lokv Jerusalem bv vngnam ha okv ninyigv ataranya bvku alu kanw go ninyigv rinam dvdv nga minla, ninyia daapo lo takkinam ha minla okv ninyigv turkurkunam lobv lvkgapla vvpvdu.
So Gamlv so Jisunyi kainv tamsar nvgobv, Pwknvyarnv gv Pvbv nga japlarila nvgobv, okv Pwknvyarnv gv Karv gv lvkwng ngaka tamsar lanv gubv kaatamdu. Ninyigv kairungbv tamsar nama vvkumla baangu gubv vvpamdu: (1) Moodw putunglo Doin minam, Nyidomooku Karv lo doojinv vdwgv rikordokor ha, ridung ripa rise, pwsepaase okv Pwknvyarnv gv Karv lo vngse lvga nga minjipv (Mvrwmvpa 5-7); (2) lvbwlaksu nyidum vring gola anyia bunugv rise minse lvga nga minam (Mvrwmvpa 10); (3) Pwknvyarnv gv Karv gv lvga nga minchisinam (Mvrwmvpa 13); (4) lvbwlaksu gv lvkwng nga tamsarnam (Mvrwmvpa 18); (5) nyiamooku gv ngoose nga okv Nyidomooku Karv gv aase nga tamsarnam (Mvrwmvpa 24-25).
Arwng lokv darlinnam
Nwdw kinam okv Jisu Kristonyi dwrwboklinnam (1:1-2:23)
Yalu gv lvgabv Jon Baptist gv ridungripa rinam (3:1-12)
Jisu gv baptisma naanam okv pokayarkanam (3:13-4:11)
Jisu gv Galili lo yalu gv ridungripa rinam (4:12-18:35)
Galili lokv Jerusalem lo (19:1-20:34)
Ataranya hupta lo okv Jerusalem gv nvchilo (21:1-27:66)
Jisu turkurkunam okv nyi vdwa kaatamsikunam (28:1-20)
1
Jisu Kristo gv abuapa
(Lk 3:23-38)
1 Si Abraham gvlo linv Dabid gv husi Jisu Kristo gv nwdwv.
2-6a Abraham lokv naalaila Dvbv Dabid lobv soogv nwdw ha lvkpvpv: Abraham Isaak gv abuv, Isaak Jakob gv abuv, Jakob Juda gvla ninyigv boru vdwgv abuv. Okv Tamar gvlokv bvngnam Perej gvla Jera gv abuv Juda. Okv Perej Hejron gv abuv, okv Hejron Ram gv abuv. Ram Amminadab gv abuv, Amminadab Naason gv abuv, Naason Salmon gv abuv. Salmon gv kuunyilo hv Boaj, hv Rahab gvlokv bvngnam v, okv Boaj gv kuunyilo ngv Obed, hv Rut gvlokv, okv Obed gv kuunyilo ngv Jesse okv Jesse gv kuunyilo ngv Dvbv Dabid.
6b-11 Dabid 2Dv 24:14,15; 2Kri 36:10; Jer 27:2 lokv naalaila Israel nyi vdwa Bebilon lo nyirabv naakunam lobv soogv nwdw vdwa lvkpvpv: Okv Jesse Dvbv Dabid gv abuv, Dvbv Dabid gv kuunyilo ngv Solomon (Ninyigv anv ngv Uriah gv nywng ngv), Solomon Rehoboam gv abuv, Rehoboam Abija gv abuv, Abija Asa gv abuv. Asa Jehosapat gv abuv, Jehosapat Jehoram gv abuv, Jehoram Ujjiah gv abuv. Ujjiah Jotam gv abuv, Jotam Ahaj gv abuv, Ahaj Hejekiah gv abuv. Hejekiah Mannasse gv abuv, Mannasse Amon gv abuv, Amon Josia gv abuv. Okv Josia Jehoiachin gvla ninyigv boru vdwgv abuv, so si Bebilon lo nyirabv rila doodw ngvku.
12-16 Bebilon lo nyirabv rila dooro koching lokv naalaikula Jisunyi bvngdw lobv soogv nwdw ha lvkpvpv: Jehoiachin Sealtiel gv abuv, Sealtiel Jerubbabel gv abuv. Jerubbabel Abiud gv abuv, Abiud Eliakim gv abuv, Eliakim Ajor gv abuv. Ajor, Jadok gv abuv, Jadok Akim gv abuv, Akim Eliud gv abuv. Eliud Eliajar gv abuv, Eliajar Matan gv abuv, Matan Jakob gv abuv. Okv Jakob, Kristo vla minam Jisunyi bvngnv Meri gv nyilu Josep gv abuv.
17 Vbvrikunamv Abraham lokv Dabid lobv singtam vring gola api go, okv Dabid lokv Bebilon lo nyirabv rila doonam lobv vring gola api singtam go okv hokv naalaikula Jisu Kristonyi bvngnam lobv singtam vring gola api gobv ritoku.
Jisu Kristonyi dwrwboklin kunam
(Lk 2:1-7)
18 Lk 1:27 Jisu Kristonyi svbvching mooku so dwrwboklin toku. Ninyigv anv Merinyi Josep gvlo minggag jitoku, vbvritola bunyiv nywng nyilubv rila dooba sutv madvbv hv Darwknv Dow lokv anga go dootvdu vla chinsu toku. 19 Josep tarwkbaknv nyi go, vkvlvgabv Merinyi nyi vdwgv kaagialo hinying momare mvngla, mingak minsu nama atubongv kayu dukubv rungtoku. 20 Ho lvkwngbv ninyigv vbv mvngdung rilo, Ahtu gv nyidogindung ako yumalo aala ninyia mintoku, “Josep, Dabid gv husi, Merinyi no gv nywngbv naase nga busu mabvka. Ninyigv kuugvnam v Darwknv Dow lokv gvdunv. 21 Lk 1:31 Nw kuunyilo ako bvngri, okv no hum Jisu vla amin minre—ogulvgavbolo hv ninyigv nyi vdwa bunugv rimur loka ringlin reku.”
22 Vjak so mvnwng si ridu Pwknvyarnv gv kvvlo nyijwk vdwlo minam dvdv nga jvjv bv rilin modubv. 23 Aij 7:14 “Darwknv nyijar gunv kuu gvla, okv kuunyilo gubv bvngre, okv ninyia Immanuel vla minre” (So minam si, “Pwknvyarnv ngonugv rikulo reming gvduku,” vnam v).
24 Vkvlvgabv vdwlo Josep gudung tokudw nw nyidogindung gv ninyia ritokv vla mingkubv nw Merinyi nywngbv naatoku. 25 Lk 2:21 Vbvritola nw Meri gv kuunyilo nga bvngtv madv yika nw Merinyi doogvkargv matoku. Okv Josep ninyia Jisu vla amin mintoku.