TAITASNYI
Paul gv Siti Jinam
Mintamchonam
Taitus jentail nyi go kristan lo aalaku Paulnyi kudungkua ribam ajin gobv okv ninyigv missionary aralo ridur minggv kunv bv rito. Paul gv sitiv Taitusnyi lvkto kret ara lokv ninyigv nyipayapa riduryanv gobv siti go jiging lvkto, gvrja lo rinampanam am japriaparianv bv ripikula dookunvgo. Siti si rijipaji kogv anyik jvngv aomgo lvkdvr linjito.
Atuake bv Taitas gvrja rigvdogv jinv vdwgv nvgwngnv rijidoji nvnga mindw linji toku, asarjvbv Kretan nyi vdwgv alvmabv rinamdonama minji toku. Minsen sinvbv minam si, Taitas gvrja lokv nyipam dvdv ngam oguaingbv tamsarkinu svngvdw um minsar la ritoku, nyikum, ongu bv rikunv (yvvdw, mvngdw laku, mvvgagaado solo bv rinv um tamsar la ridudw um mindu), nyipayapa okv nyira mvnwng nga minji toku. Minyung gaam si, taitasnyi kristan rinamdaknam lo mindin jilaka vla siti jinv vv jitoku, asarjvbv minji namsi himpu nam lvgabv okv ajinaram bv rinam lvgabv, okv kaanwng mabv rinam sum kayu kunam lvgabv, larmisinam sum kayu kunam lvgabv, okv gvrja aralo taknyitagam gobv rimanam lvgabv tamsarkinu la ritokv vla jito.
Arwng lokv darlinnam
Mintamchonam (1:1-4)
Gvrja lo nyigam (1:5-16)
Gvrja aralo nyipam dvdvgv kudungkua (2:1-15)
Mindinminbianam okv gamrwnam (3:1-11)
Minyungminya (3:12-15)
1
1 Paul lokv, Pwknvyarnv gv pakbu akobv okv Jisu kristo gv Apostol akobv rinv ngv.
Ngo darlinkunam okv Pwknvyarnv gv darlinnam mvngjwngnv vdwa rigur yadubv vngmu kunamv okv bunua dormo ngam jvjvrungbv tamsar la rigv dukubv.
2 Turbwngjiku lvgabv mvngtin dubv mvlinrelin jito. Pwknvyarnv mvvmanv, kvvlo atuake lokv ngv soogv turnam am ngonua milvpvvkunamv. 3 Okv tarwkbak dw loku ninyigv doin lo hv kaatam toku. Sum nga ritoka vla parlwk toku, okv ngooka ngonugv ringnvbaanv Pwknvyarnv gv mingkulo ngo japgo kartoku. 4 2Kor 8:23; Gal 2:3; 2Tim 4:10 Taitusnyi ngo siti go lvkto, ngonugv mvngjwng lvyinakinv ngokv jvjvrungnv kuunyilo.
Pwknvyarnv Abu gv okv ringnvbaanv Ahtu Jisu kristo gv Anyuaya okv sarsopoyo nonu gvlo jilwk yilaka.
Kret lo Taitas gv kudungkua.
5 Nam ngo Kret mooku so doomu gvrinv, ogulvgavbolo vjvgv so risv rijinam mvnwng gv rilakv vnam ridung dunv sum riyapaya dubv okv banggu mvnwng gv gvrja lo rigvdogv nvlo laalwk yadobv mvngla vkvlvgabv so nam doomudunv. Ngoogv minsarpvnam sum mvnggap pvvlaka: 6 1Tim 3:2-7 Rigvdogv nvgobv ribolo oguguka rimur kaama rungnv gobv rirungdunv; vv nywng akin mvngchik nvgobv rirungtoka, * Nywng akin mvngchik nvgobv rirungdunv; Vmalo Akin mvngchikgo nyimv laamwng tvka. okv vkvgv umvuu ngv mvngjwng nvgobv rirungtoka okv alvmanv yalungyachung amin gvnv gobv rirungmabvka okv tvvma nvgo bvka rirung mabvka. 7 Vkvlvgabv Pwknvyarnv gv gvrja kudungkua nga rigvdogvnv um kaayadubv klu lokv jilwk dunv, hv rimur nam kaama rungdubv rirungtoka. Hv vdwloka kaimvngsu vmalo biokyibiokcha nvgobv, vmalo tvngkium nvgobv, vmalo tvngngur nvgobv vmalo, morko lvgabv nyilin nvgobv rimare. 8 Hv nyen chigamrainv nvgobv okv ogugonv alvpvdw um paknv gobv rirungtoka. Hv saktv nvbv, alv nvbv, darwk nvbv, okv kachingkamu sunv gobv ritoka. 9 Hv mvngjwng nyola dubv okv oogv doin nga vngdwngbv gakbwngla ritoka okv vv arinjvnv gaambv ridu. Vbvrila vkvnv lamtv lo jvjvnv tamsarnam lokv hv kvvbia mintvmiru jila dubv okv yvvdw um alvmabv mindudw umka alvmanam am kaadin la kaatam rungtoka.
10 Ogulvgavbolo ho hoka achialvgo, asarjvbv bunugv kvbi nyiposoyo vdwa kupnv okv turmilarmi sinv, judaism lokv aanv vdwv rito. 11 Bunugv mindunam sum mintor dukubv rirungdu, ogulvgavbolo bunu rima tvsv yanga rila bunugv tamsarnam lokv vpin dvdv nga mvngru mola riduku, okv hinyinghiru dubv rinam aka morkoain lvgabv bv rinya duku. 12-13 Vv ninyi atubongv kretan go, bunugv atubogv aralo nyijwk akobv rinvgo, vv soogv jvjvnv gaam sum mindu, “Kretan vdwv rukimvvki la ridu, alvmanv svnwngsvmin bv ridu, okv svpelakre la dvdwkdvyit nvbvka ridu.” So lvgabv no dinchirungbv bunua yamtoka, vkvlvgavbolo bunu gvlo mvngjwng ngv vngdwngnam lvgabv. 14 Okv kvvlogv jius vdwgv higuhirak okv nyia gamki lokv aanv oogv jvjv nga laarwk simu manv nyi gobv ridu. 15 Bunu atubongv yvvdw darwk dunv ogumvnwng vka darwk dunv; vbvritola bunu yvvdw alvmadunv okv mvngjwng madunv oguguka vka darwk madunv, ogulvgavbolo bunugv mongramara okv mvngdw nvnv ngv darwk madu. 16 Bunu vdwv mindu bunu Pwknvyarnvnyi chinpvnv vdu, vbvrijvka bunugv gwngdungridung lo rijwkmadu. Bunu kaanwng manamv okv tvvnwng manamv dodu, ogumvnwng alvnvngv ogu vdw um riyin manv ngv.